250 ಕೋಟಿಗೂ ಅಧಿಕ ಗಳಿಕೆ ಕಂಡ ‘ಜನ ನಾಯಗನ್’

ತಮಿಳುನಾಡು ಸಿಎಂ ವಿಜಯ್ ನಟನೆಯ ‘ಜನ ನಾಯಗನ್’ ಚಿತ್ರ ಬಿಡುಗಡೆಯಾದ ಒಂದು ವಾರದೊಳಗೆ ವಿಶ್ವದಾದ್ಯಂತ  250 ಕೋಟಿಗೂ ಹೆಚ್ಚು ಗಳಿಕೆ ಕಂಡಿದೆ.

ಜುಲೈ 23 ರಂದು ಬಿಡುಗಡೆಯಾದ ಮತ್ತು ಎಚ್ ವಿನೋದ್ ನಿರ್ದೇಶನದ  ಚಿತ್ರ  ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ತನ್ನ ಭರ್ಜರಿ ಓಟವನ್ನು ಮುಂದುವರಿಸಿದೆ. ವಿಜಯ್ ಅವರು ರಾಜಕೀಯದತ್ತ ಸಂಪೂರ್ಣ ಗಮನಹರಿಸುವ ಮುನ್ನ ನಟಿಸಿದ ಕೊನೆಯ ಚಿತ್ರವಾದ ಇದು ಈ ವರ್ಷದ ಅತ್ಯಂತ ಹೆಚ್ಚು ಚರ್ಚಿತ ತಮಿಳು  ಚಿತ್ರಗಳಲ್ಲಿ ಒಂದಾಗಿದೆ.

ತಮಿಳು ಚಿತ್ರರಂಗದ ಅತ್ಯಂತ ದೊಡ್ಡ ತಾರೆಗಳಲ್ಲಿ ಒಬ್ಬರಾಗಿ ದಶಕಗಳ ಕಾಲ ಮೆರೆದ ವಿಜಯ್ ಅವರ ವೃತ್ತಿಜೀವನದ ಕೊನೆಯ ಚಿತ್ರವಾದ ಇದು ಅಭಿಮಾನಿಗಳಿಗೆ ವಿಶೇಷ ಚಿತ್ರವಾಗಿದೆ.  ವಿಶಿಷ್ಟ ಶೈಲಿಯ ‘ಮಾಸ್’ ದೃಶ್ಯಗಳು, ಪ್ರಭಾವಶಾಲಿ ಸಂಭಾಷಣೆ ಹಾಗೂ ತೆರೆಯ ಮೇಲಿನ ಆಕರ್ಷಕ ಉಪಸ್ಥಿತಿ  ಪ್ರೇಕ್ಷಕರನ್ನು ಚಿತ್ರಮಂದಿರಗಳತ್ತ ಸೆಳೆಯುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ.

ಚಿತ್ರವನ್ನು ಬೆಂಗಳೂರು ಮೂಲದ ‘ಕೆವಿಎನ್ ಪ್ರೊಡಕ್ಷನ್ಸ್ ‘  ನಿರ್ಮಿಸಿದೆ.  ಪೂಜಾ ಹೆಗ್ಡೆ ನಾಯಕಿಯಾಗಿ ನಟಿಸಿದ್ದಾರೆ. ಬಾಬಿ ಡಿಯೋಲ್ ಖಳನಾಯಕನ ಪಾತ್ರವನ್ನು ನಿರ್ವಹಿಸಿದ್ದಾರೆ. ಪೋಷಕ ಪಾತ್ರವರ್ಗದಲ್ಲಿ ಮಮಿತಾ ಬೈಜು, ಗೌತಮ್ ವಾಸುದೇವ್ ಮೆನನ್, ಪ್ರಕಾಶ್ ರಾಜ್, ನರೇನ್ ಇದ್ದಾರೆ.