ಹನುಮಂತನ ಭಾಗ್ಯದ ಬಾಗಿಲು ತೆರೆದ ಜೀ ಕನ್ನಡ ವಾಹಿನಿ

ಕುರಿ ಕಾಯುವ ಹನುಮಂತನ ಭಾಗ್ಯದ ಬಾಗಿಲು ತೆರೆದ ಸರಿಗಮಪ ವೇದಿಕೆ

ಎಲ್ಲೋ ಎಲೆ ಮರೆಯ ಕಾಯಿಗಳಂತಿದ್ದ ಪ್ರತಿಭೆಗಳನ್ನು ಹೊರಗೆಳೆದು ಎಲ್ಲಾ ಕಡೆ ಅವರ ಪ್ರತಿಭೆ ಪಸರಿಸುವಂತೆ ಮಾಡಿದ ಖ್ಯಾತಿ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುವ ಸರಿಗಮಪ ವೇದಿಕೆಗೆ ಸೇರುತ್ತದೆ. ಇದೇ ಸರಿಗಮಪ ವೇದಿಕೆಯ ಮೇಲೆ ಇದೀಗ ಯಾವುದೇ ಸಂಗೀತ ತರಬೇತಿಗೆ ಹೋಗದೆ ಕುರಿ ಕಾಯುತ್ತಾ ಹಾಡುಗಳನ್ನು ಹಾಡಿಕೊಂಡು ಬಂದ ಹಾವೇರಿಯ ಹನುಮಂತ ಅವರ ಭಾಗ್ಯದ ಬಾಗಿಲು ಈಗ ತೆರೆದಿದೆ.

ಹೌದು, ಹಾವೇರಿಯ ಹನುಮಂತ ಎಂಬುವವರು ಯಾವುದೇ ಸಂಗೀತ ತರಬೇತಿಗೆ ಹೋಗದೆ ಕುರಿ ಕಾಯುತ್ತಾ ಹಾಡುಗಳನ್ನು ಹಾಡಿಕೊಂಡು ಇಂದು ಸರಿಗಮಪ ವೇದಿಕೆಯನ್ನೇರಿ ಜನರ ಮೆಚ್ಚುಗೆಯನ್ನು ಗಳಿಸಿದ್ದಾರೆ. ಹನುಮಂತ ಅವರು ‘ಸರಿಗಮಪ ಸೀಸನ್ 15’ ಮೆಗಾ ಆಡಿಷನ್ ನಲ್ಲಿ ‘ನಿನ್ನೊಳಗ ನೀನು ತಿಳಿದು ನೋಡಣ್ಣ….’ ಎಂಬ ಜನಪದ ಗೀತೆಯನ್ನ ಹಾಡಿ ಆಯ್ಕೆಯಾಗಿದ್ದಾರೆ.

ಇವರ ಹಾಡನ್ನು ಕೇಳಿ ತೀರ್ಪುಗಾರರು ಮೆಚ್ಚುಗೆಯನ್ನು ಸೂಚಿಸಿದ್ದಾರೆ. ಹನುಮಂತ ಅವರ ಪ್ರತಿಭೆ ನೋಡಿ ಗಾಯಕ ವಿಜಯ್ ಪ್ರಕಾಶ್ ಅವರು, ತಾವೇ ಹನುಮಂತನಿಗೆ ಸಂಗೀತ ಕಲಿಸುವ ಭರವಸೆ ನೀಡಿದ್ದಾರೆ. ಅಷ್ಟೇ ಅಲ್ಲದೇ ಮಹಾ ಗುರುಗಳಾದ ನಾದಬ್ರಹ್ಮ ಹಂಸಲೇಖ ಅವರು ತಮ್ಮ ಹೆಗಲ ಮೇಲೆ ಇದ್ದ ಶಲ್ಯವನ್ನು ಹನುಮಂತರಿಗೆ ಹಾಕಿ, ಅವರು ಹಾಕಿದ್ದ ಟವೆಲ್ ಅನ್ನು ತಮ್ಮ ಹೆಗಲ ಮೇಲೆ ಹಾಕಿಸಿಕೊಂಡು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.