ನಟ ಕಿಚ್ಚ ಸುದೀಪ್ ಕನ್ನಡದ ಜನಪ್ರಿಯ ರಿಯಾಲಿಟಿ ಶೋ ಬಿಗ್ ಬಾಸ್ ಕನ್ನಡದ ನಿರೂಪಣೆ ಬಿಟ್ಟು ಹೊರಬರುವಂತೆ ಅಭಿಮಾನಿಯೊಬ್ಬರು ಪತ್ರ ಬರೆದಿದ್ದಾರೆ.
ನಿರಂಜನ್ ದಾಸ್ ಎಂಬ ಇನ್ ಸ್ಟಾಗ್ರಾಮ್ ನಲ್ಲಿ ಖಾತೆದಾರರು ಸುದೀಪ್ ಗೆ ಬಹಿರಂಗ ಪತ್ರ ಬರೆದಿದ್ದಾರೆ. ಬಿಗ್ ಬಾಸ್ ರಿಯಾಲಿಟಿ ಶೋ ನಡೆಯುತ್ತಿರುವ ರೀತಿ ಕುರಿತು ಆಕ್ಷೇಪ ವ್ಯಕ್ತಪಡಿಸಿರುವ ಅವರು ಇಂತಹ ಕಳಪೆ ವ್ಯಕ್ತಿತ್ವಗಳ ನಡುವೆ ನಿಮ್ಮನ್ನು ನೋಡಲು ಇಚ್ಛಿಸುವುದಿಲ್ಲ ಎಂದು ಪತ್ರದಲ್ಲಿ ಹೇಳಿದ್ದಾರೆ.
‘ಪ್ರೀತಿಯ ಕಿಚ್ಚಾ.. 2013-14ರಿಂದ ಸತತವಾಗಿ ಬಿಗ್ ಬಾಸ್ ರಿಯಾಲಿಟಿ ಶೋನ ನಿರೂಪಣೆಯ ಜವಾಬ್ದಾರಿಯನ್ನು ಅತ್ಯಂತ ಪ್ರೀತಿಯಿಂದ ನಿರ್ವಹಿಸಿರುವ ನಿಮಗೆ ನಮ್ಮ ಕಡೆಯಿಂದ ತುಂಬಾ ಪ್ರೀತಿ ಹಾಗೂ ಧನ್ಯವಾದಗಳು.
ಒಂದು ಕಾಲದಲ್ಲಿ ಬಿಗ್ ಬಾಸ್ ಶೋನಲ್ಲಿ ಅವಕಾಶ ಸಿಕ್ಕರೆ ಮುಂದಿನ ಜೀವನಕ್ಕೆ ಒಳ್ಳೆಯ ಅಡಿಪಾಯ ಸಿಗಲಿದೆ ಎಂಬ ಭಾವನೆ ಇತ್ತು. ಇಷ್ಟೂ ವರ್ಷಗಳಲ್ಲಿ ಎಷ್ಟೋ ವ್ಯಕ್ತಿಗಳನ್ನು ತಿದ್ದಿದ್ದೀರಿ. ಆದರೆ ಈ ಬಾರಿಯ ಬಿಗ್ ಬಾಸ್ ಅತಿರೇಕ, ಅಸಹ್ಯ.. ಅಸಭ್ಯ ನಡವಳಿಕೆ, ಕೆಟ್ಟ ಪದ ಬಳಕೆ ಎಲ್ಲವೂ ಅಸಹ್ಯ. ನೀವು ತಿದ್ದಲು ಸಾಕಷ್ಟು ಪ್ರಯತ್ನಿಸಿದ್ದೀರಿ.
ಆದರೆ ಇನ್ನು ಸಾಕು. ಇಂತಹ ಕೆಟ್ಟ ಮನಸ್ಥಿತಿಗಳನ್ನು ತಿದ್ದುವ ಸಲುವಾಗಿ ನಿಮ್ಮ ಅಮೂಲ್ಯ ವೃತ್ತಿ ಜೀವನದ ಸಮಯ ವ್ಯರ್ಥ ಮಾಡಬೇಡಿ. ಇಂತಹ ಕೊಳೆತ ಮನಸ್ಥಿತಿಗಳಿಗೆ ಪಾಠ ಹೇಳುವ ಸ್ಥಿತಿಯಲ್ಲಿ ನಾವು ನಿಮ್ಮನ್ನು ನೋಡಲು ಇಚ್ಛಿಸುವುದಿಲ್ಲ. ಅಂತರ, ಆತ್ಮವಿಲ್ಲದ ಮನುಷ್ಯರಲ್ಲದ ಮನುಷ್ಯರನ್ನ ತಿದ್ದಲು ನೀವು ಪ್ರಯತ್ನಿಸಬೇಡಿ. ಶೋ ಬಿಟ್ಟು ಹೊರ ಬನ್ನಿ’ ಎಂದು ಮನವಿ ಮಾಡಿದ್ದಾರೆ.
ಬಿಗ್ ಬಾಸ್ ಕನ್ನಡ ರಿಯಾಲಿಟಿ ಶೋ ವಿವಿಧ ವಿಚಾರಗಳಿಂದಾಗಿ ಸುದ್ದಿಯಾಗುತ್ತಿದ್ದು ಅಭಿಮಾನಿ ಸುದೀಪ್ ಗೆ ಬರೆದ ಪತ್ರದ ಮೂಲಕ ಮತ್ತೆ ಚರ್ಚೆಗೆ ಕಾರಣವಾಗಿದೆ.
—–
Be the first to comment