ಸ್ಯಾಂಡಲ್ವುಡ್ನಲ್ಲಿ ನಾಯಕ ನಟರುಗಳ ಚಿತ್ರಗಳು ಒಂದು ಮೈಲುಗಲ್ಲು ದಾಟುತ್ತಿದ್ದಂತೆ ಸುದ್ದಿಯಾಗುವುದು ಸಾಮಾನ್ಯ. ಆದರೆ ಈ ಬಾರಿ ನಾಯಕಿಯೊಬ್ಬರು ತಮ್ಮ 25ನೇ ಸಿನಿಮಾ ಮೂಲಕ ಸಖತ್ ಸದ್ದು ಮಾಡಿದ್ದಾರೆ. ನಟಿ ಹರಿಪ್ರಿಯಾ ತಮ್ಮ ವೃತ್ತಿ ಜೀವನದ ಹೊಸ ಮೈಲುಗಲ್ಲು ಡಾಟರ್ ಆಫ್ ಪಾರ್ವತಮ್ಮ ಸಿನಿಮಾದಲ್ಲಿ ಅಭಿನಯಿಸುತ್ತಿರುವುದು ಗೊತ್ತಿದೆ. ಮಹಿಳಾ ಪ್ರಧಾನ ಕಥಾಹಂದರದ ಈ ಸಿನಿಮಾದ ಟೀಸರ್ ಇಂದು ಬಿಡುಗಡೆಯಾಗಿದೆ. ಈ ಹಿಂದಿನ ಸಿನಿಮಾಗಳಲ್ಲಿ ಬೋಲ್ಡ್ ಅಂಡ್ ಬ್ಯೂಟಿಫುಲ್ ಆಗಿ ಕಾಣಿಸಿದ್ದ ಹರಿಪ್ರಿಯ ಈ ಬಾರಿ ಮಾತ್ರ ಖಡಕ್ ಅಧಿಕಾರಿಯಾಗಿ ಬಣ್ಣ ಹಚ್ಚಿದ್ದಾರೆ.
ಇದೊಂದು ತಾಯಿ-ಮಗಳ ಬಾಂಧವ್ಯದ ಕಥಹಂದರವಿರುವ ಈ ಸಿನಿಮಾವಾಗಿದ್ದು, ಇಲ್ಲಿ ಪಾರ್ವತಮ್ಮ ಎಂಬ ಮದರ್ ಇಂಡಿಯಾ ಪಾತ್ರದಲ್ಲಿ ಸುಮಲತಾ ಅಂಬರೀಶ್ ಅಭಿನಯಿಸಿದ್ದಾರೆ. ಪಾರ್ವತಮ್ಮನ ಪಾತ್ರವು ಕರುಣಾಮಯಿಯಾದರೆ, ಮಗಳು ವೈದೇಹಿ ಪಾತ್ರದಲ್ಲಿ ಅನ್ಯಾಯವನ್ನು ತಟ್ಟಿ ಕೇಳುವ ದಕ್ಷ ತನಿಖಾಧಿಕಾರಿಯಾಗಿ ಹರಿಪ್ರಿಯ ಕಾಣಿಸಿಕೊಂಡಿದ್ದಾರೆ.
ಈ ಸಿನಿಮಾವನ್ನು ಯುವ ನಿರ್ದೇಶಕ ಶಂಕರ್ ಜೆ ನಿರ್ದೇಶಿಸಿದ್ದು, ಮಿಥುನ್ ಮುಕುಂದನ್ ಸಂಗೀತ ನೀಡಿದ್ದಾರೆ. ಟೀಸರ್ನಲ್ಲಿ ಕೇಳಿ ಬಂದಿರುವ ಚಿತ್ರದ ಹಿನ್ನಲೆ ಸಂಗೀತವು ಹರಿಪ್ರಿಯ ಅವರ ರಗಡ್ ಪಾತ್ರದ ತೂಕವನ್ನು ಮತ್ತಷ್ಟು ಹೆಚ್ಚಿಸಿದೆ ಎಂಬ ಮಾತುಗಳು ಕೇಳಿಬರುತ್ತಿದೆ.
ಈ ಹಿಂದೆಯೇ ಟೈಟಲ್ ಮತ್ತು ಫಸ್ಟ್ ಲುಕ್ ಮೂಲಕ ಒಂದಷ್ಟು ಕುತೂಹಲ ಕೆರಳಿಸಿದ್ದ ಚಿತ್ರತಂಡ ಟೀಸರ್ ಮೂಲಕ ಅದನ್ನು ಡಬಲ್ ಮಾಡಿದ್ದಾರೆ. ಡಾಟರ್ ಆಫ್ ಪಾರ್ವತಮ್ಮ ವಿಭಿನ್ನ ಪ್ರಯತ್ನದ ಸಿನಿಮಾ ಎಂಬ ಮಾತುಗಳು ಈಗಾಗಲೇ ಗಾಂಧಿನಗರದಲ್ಲಿ ಓಡಾಡುತ್ತಿದೆ. ತಮ್ಮ 25ನೇ ಸಿನಿಮಾಗಾಗಿ ಆ್ಯಕ್ಷನ್ ಒರಿಯೆಂಟೆಡ್ ಸಬ್ಜೆಕ್ಟ್ ಹಾರಿಸಿಕೊಂಡಿರುವ ಹರಿಪ್ರಿಯ ಟೀಸರ್ ಮೂಲಕ ಹೆಣ್ಮಕ್ಳೆ ಸ್ಟ್ರಾಂಗು ಗುರು ಎಂಬ ಸಂದೇಶವನ್ನು ಕೂಡ ನೀಡಿದಂತಿರುವುದು ಸಿನಿಮಾ ಮೇಲಿನ ಕುತೂಹಲವನ್ನು ಮತ್ತಷ್ಟು ಹೆಚ್ಚಿಸಿದೆ.
Be the first to comment