ಸ್ಯಾಂಡಲ್ ವುಡ್ ಗೆ ಮರಳಿದ ಕುನಾಲ್ ಗಂಜಾವಾಲ

ಬಾಲಿವುಡ್ ಹಿನ್ನೆಲೆ ಗಾಯಕ ಕುನಾಲ್ ಗಂಜಾವಾಲ ಹಲವು ವರ್ಷಗಳ ನಂತರ ಕನ್ನಡ ಚಿತ್ರರಂಗಕ್ಕೆ ಮರಳುತ್ತಿದ್ದಾರೆ.

ಜುಲೈ 27 ರಂದು ಬಿಡುಗಡೆಯಾಗಲಿರುವ ‘ಪಾರ್ಟ್‌ನರ್’  ಚಿತ್ರಕ್ಕೆ ಕುನಾಲ್ ಗಂಜಾವಾಲ ತಮ್ಮ ಧ್ವನಿಯನ್ನು ನೀಡಿದ್ದಾರೆ. ಕನ್ನಡದ ರೊಮ್ಯಾಂಟಿಕ್ ಹಾಡಿನಲ್ಲಿ ಕುನಾಲ್ ಗಂಜಾವಾಲ   ಧ್ವನಿಯನ್ನು ಮತ್ತೊಮ್ಮೆ ಕೇಳಲು   ಕಾಯುತ್ತಿದ್ದ ಅಭಿಮಾನಿಗಳಲ್ಲಿ ಈ ಹಾಡು ಉತ್ಸಾಹವನ್ನು ಹುಟ್ಟುಹಾಕಿದೆ.

ನಾಗಾರ್ಜುನ ಶರ್ಮಾ ಅವರ ಸಾಹಿತ್ಯದೊಂದಿಗೆ ನಕುಲ್ ಅಭ್ಯಂಕರ್ ಸಂಯೋಜಿಸಿರುವ ಈ ವರ್ಣರಂಜಿತ ಟ್ರ್ಯಾಕ್ ನ್ನು ಪುದುಚೇರಿ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಚಿತ್ರೀಕರಿಸಲಾಗಿದೆ. ಮುರಳಿ ಮಾಸ್ಟರ್ ಅವರ ನೃತ್ಯ ಸಂಯೋಜನೆಯೊಂದಿಗೆ ಅಜಯ್ ರಾವ್  ಸೊಗಸಾದ ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳುವ ನಿರೀಕ್ಷೆಯಿದೆ.

ಅಜಯ್ ರಾವ್ ಜೊತೆಗೆ ಬೃಂದಾ ಆಚಾರ್ಯ ನಟಿಸುತ್ತಿರುವ ‘ಪಾರ್ಟ್‌ನರ್’ ಚಿತ್ರೀಕರಣ  ಪೂರ್ಣಗೊಳಿಸಿದ್ದು, ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ.

ಕುನಾಲ್ ಗಾಂಜಾವಾಲ ಹಲವಾರು ಕನ್ನಡ ಹಾಡುಗಳನ್ನು ಹಾಡಿದ್ದಾರೆ. ಅವುಗಳಲ್ಲಿ ಆಕಾಶ್, ಐಶ್ವರ್ಯ, ಅರಸು, ಮುಂಗಾರು ಮಳೆ, ಚಾರ್ಮಿನಾರ್, ಅರಮನೆ, ಮಿಲನ, ಶೌರ್ಯ,  ಚೆಲುವಿನ ಚಿತ್ತಾರ ಮುಂತಾದ ಚಿತ್ರಗಳ ಹಿಟ್‌ಗಳು ಸೇರಿವೆ. ಅವರ ಭಾವಪೂರ್ಣ ಗಾಯನ  ಸಾಮರ್ಥ್ಯ  2000ದ ದಶಕದಲ್ಲಿ ಕನ್ನಡ ಚಿತ್ರರಂಗದಲ್ಲಿ ಅತ್ಯಂತ ಬೇಡಿಕೆಯ ಹಿನ್ನೆಲೆ ಗಾಯಕರಲ್ಲಿ ಒಬ್ಬರನ್ನಾಗಿ ಮಾಡಿತು.

—–