ಪವನ್ ಕಲ್ಯಾಣ್ ನಟನೆಯ ‘OG’ ಸೆ. 25ರಂದು ಬಿಡುಗಡೆ

ಪವನ್ ಕಲ್ಯಾಣ್ ನಟಿಸಿರುವ  ಆ್ಯಕ್ಷನ್ ಚಿತ್ರ ‘OG’ ಸೆಪ್ಟೆಂಬರ್ 25ರಂದು  ಬಿಡುಗಡೆಯಾಗಲಿದೆ ಎಂದು ಚಿತ್ರತಂಡ ಘೋಷಿಸಿದೆ. 

‘OG’ ಚಿತ್ರೀಕರಣ ಮುಕ್ತಾಯಗೊಂಡಿದೆ. ‘ಗಂಭೀರನಿಗೆ ಪ್ಯಾಕ್ ಅಪ್ ಮಾಡಿ… ಚಿತ್ರ ಬಿಡುಗಡೆಗೆ ಸಿದ್ಧರಾಗಿ… ಸೆಪ್ಟೆಂಬರ್ 25, 2025ರಂದು ಚಿತ್ರಮಂದಿರಗಳಲ್ಲಿ ಭೇಟಿಯಾಗೋಣ’ ಎಂದು ತಯಾರಕರು X ನಲ್ಲಿ ಬರೆದಿದ್ದಾರೆ.

ಕಳೆದ ವರ್ಷ ಕಲ್ಯಾಣ್ ಅವರ ಹುಟ್ಟುಹಬ್ಬದಂದು ಬಿಡುಗಡೆಯಾದ ಈ ಚಿತ್ರದ ಮೊದಲ ಟೀಸರ್ ಅಪಾರ ಪ್ರಶಂಸೆಯನ್ನು ಪಡೆಯಿತು. ಡಿವಿವಿ ಎಂಟರ್ಟೈನ್ಮೆಂಟ್ ಬ್ಯಾನರ್ ಅಡಿಯಲ್ಲಿ ಡಿವಿವಿ ದಾನಯ್ಯ ಈ ಚಿತ್ರವನ್ನು ನಿರ್ಮಿಸಿದ್ದಾರೆ.

‘OG’ ಚಿತ್ರ  ಪವನ್ ಕಲ್ಯಾಣ್ ಅವರು ರಾಜಕೀಯದಲ್ಲಿ ಬ್ಯುಸಿಯಾಗಿದ್ದರಿಂದ ವಿಳಂಬವಾಗಿತ್ತು. 2023ರ ಅಂತ್ಯದ ವೇಳೆಗೆ ಚಿತ್ರ ನಿರ್ಮಾಣವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಯಿತು. ಕಳೆದ ತಿಂಗಳು ಚಿತ್ರೀಕರಣ ಪುನರಾರಂಭವಾಗಿ ಈಗ ಪೂರ್ಣಗೊಂಡಿದೆ.

ಸುಜೀತ್ ನಿರ್ದೇಶನದ ‘OG’ ಒಂದು ಗ್ಯಾಂಗ್‌ಸ್ಟರ್ ಡ್ರಾಮಾ ಆಗಿದೆ. ಪವನ್ ಕಲ್ಯಾಣ್ ಅವರು ಗಡಿಪಾರಾಗಿ ಮುಂಬೈಗೆ ಹಿಂದಿರುಗಿದ ಕ್ರಿಮಿನಲ್ ಓಜಸ್ ಗಂಭೀರ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರದ ತಾರಾಗಣದಲ್ಲಿ ಇಮ್ರಾನ್ ಹಶ್ಮಿ, ಪ್ರಿಯಾಂಕಾ ಮೋಹನ್, ಪ್ರಕಾಶ್ ರಾಜ್, ಶ್ರೀಯಾ ರೆಡ್ಡಿ, ಅರ್ಜುನ್ ದಾಸ್, ಅಂತರರಾಷ್ಟ್ರೀಯ ನಟರಾದ ಕಜುಕಿ ಕಿತಾಮುರಾ, ವಿಥಯಾ ಪನ್ಶ್ರೀಂಗರ್ಮ್ ಇದ್ದಾರೆ.

ಒಜಿ ತಾಂತ್ರಿಕ ತಂಡದಲ್ಲಿ ಛಾಯಾಗ್ರಾಹಕರಾದ ರವಿ ಕೆ ಚಂದ್ರನ್ ಮತ್ತು ಮನೋಜ್ ಪರಮಹಂಸ, ನಿರ್ಮಾಣ ವಿನ್ಯಾಸಕ ಎಎಸ್ ಪ್ರಕಾಶ್ ಇದ್ದಾರೆ.