‘ಸಾರ್ವಜನಿಕರಲ್ಲಿ ವಿನಂತಿ’

‘ಸಾರ್ವಜನಿಕರಲ್ಲಿ ವಿನಂತಿ’
ಕ್ರೈಂ ಕಂಟ್ರೋಲ್‍ಗೆ ಸಹಕರಿಸಿ

ಕನ್ನಡ ಚಿತ್ರರಂಗದಲ್ಲಿ ಹೊಸ ಅಲೆ ಶುರುವಾಗಿದೆ. ಹೊಸತನದ ಮತ್ತು ವಿಭಿನ್ನ ಶೀರ್ಷಿಕೆಯುಳ್ಳ ಚಿತ್ರಗಳು ಒಂದರ ಹಿಂದೆ ಒಂದು ಬಿಡುಗಡೆಯಾಗುತ್ತಿವೆ. ಇವುಗಳ ಸಾಲಿಗೆ ಹೊಸ ಸೇರ್ಪಡೆ ‘ಸಾರ್ವಜನಿಕರಲ್ಲಿ ವಿನಂತಿ’. ಶೀರ್ಷಿಕೆಯಲ್ಲಿಯೇ ಪ್ರೇಕ್ಷಕರನ್ನು ಸೆಳೆಯುವ ಈ ಚಿತ್ರದ ನಿರ್ದೇಶಕ ಕೃಪಾಸಾಗರ್. ಈ ಹಿಂದೆ ಬಹದ್ದೂರ್ ಚೇತನ್, ಎ.ಆರ್. ಬಾಬು, ನಂದಕಿಶೋರ್, ಸತೀಶ್ ಪ್ರಧಾನ್ ಮುಂತಾದವರ ಜೊತೆ ಅಸೋಸಿಯಟ್ ಆಗಿ ಕೆಲಸ ಮಾಡಿರುವ ಇವರು, ಈ ಚಿತ್ರದ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಅಲ್ಲದೆ ಮದನ್ ಮತ್ತು ಅಮೃತಾ ಎಂಬ ಕ್ಯೂಟ್ ಜೋಡಿ ಕನ್ನಡ ಚಿತ್ರರಂಗಕ್ಕೆ ನಾಯಕ-ನಾಯಕಿಯಾಗಿ ಪರಿಚಯವಾಗುತ್ತಿದ್ದಾರೆ. ರಮೇಶ್ ಪಂಡಿತ್ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದು, ಮಂಡ್ಯ ರಮೇಶ್, ಸಂಜು ಬಸಯ್ಯ ಅವರ ಗೆಸ್ಟ್ ಅಪಿಯರೆನ್ಸ್ ಇದೆ. ಅಜಿತ್ ಸಿ.ಕೆ. ಸಂಗೀತ ಸಂಯೋಜಿಸಿರುವ ಈ ಚಿತ್ರಕ್ಕೆ ಅನಿಲ್ ಕುಮಾರ್ ಛಾಯಾಗ್ರಹಣ ಮತ್ತು ಸಂಕಲನ ಮಾಡಿದ್ದಾರೆ. ದಕ್ಷಿಣ ಕೃಪಾಸಿಂಧು ಬ್ಯಾನರ್ ಅಡಿಯಲ್ಲಿ ಉಮಾ ನಂಜುಂಡರಾವ್ ಹಾಗೂ ರಾಘವೇಂದ್ರ ಎಂ ಈ ಚಿತ್ರಕ್ಕೆ ಹಣ ಹೂಡಿದ್ದಾರೆ. ಈಗಾಗಲೇ ಪೋಸ್ಟ್ ಪ್ರೊಡಕ್ಷನ್ ಕೆಲಸ ಮುಗಿಸಿಕೊಂಡು ಬಿಡುಗಡೆಗೆ ಸಿದ್ಧಗೊಂಡಿರುವ ತಮ್ಮ ಸಿನಿಮಾ ಬಗ್ಗೆ ಇಡೀ ಚಿತ್ರತಂಡ ‘ಸಾರ್ವಜನಿಕರಲ್ಲಿ ವಿನಂತಿ’ ಮಾಡಿಕೊಂಡಿದ್ದು ಹೀಗೆ.

‘ನೈಜತೆಗೆ ಹೆಚ್ಚು ಹೊತ್ತು ಕೊಡಲಾಗಿದೆ’- ಕೃಪಾಸಾಗರ್, ನಿರ್ದೇಶಕ

‘ಸಾರ್ವಜನಿಕರಲ್ಲಿ ವಿನಂತಿ’ ಸಿನಿಮಾ ಶೀರ್ಷಿಕೆಯೇ ಹೇಳುವಂತೆ ಇದೊಂದು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವ ಸಿನಿಮಾವಾಗಿದ್ದು, ನೈಜತೆಗೆ ಹೆಚ್ಚು ಹೊತ್ತು ಕೊಡಲಾಗಿದೆ. ಇದು ಹಳ್ಳಿ ಸೊಗಡಿನ ಚಿತ್ರವಾಗಿದ್ದು, ಇಡೀ ಸಿನಿಮಾ ನಮ್ಮ ಕಣ್ಣಮುಂದೆ ನಡೆಯುತ್ತಿರುವ ಘಟನೆಯಂತೆ ಭಾಸವಾಗುತ್ತದೆ. ದಿನದಿಂದ ಅಪರಾಧ ಕೃತ್ಯಗಳು ಹೆಚ್ಚಾಗುತ್ತಲೇ ಇವೆ. ಅದರಲ್ಲೂ ನಮಗೆ ಗೊತ್ತಿಲ್ಲದೆ ನಮ್ಮಿಂದ ಕಾನೂನಿಗೆ ವಿರುದ್ಧವಾದ ಕೆಲವು ಅಪರಾಧಗಳು ನಡೆದು ಹೋಗುತ್ತವೆ. ಅವುಗಳಿಂದ ಹೇಗೆ ಮುನ್ನೆಚ್ಚರಿಕೆ ವಹಿಸಬೇಕು ಅನ್ನೋದನ್ನ ಈ ಚಿತ್ರದ ಮೂಲಕ ಹೇಳುವ ಪ್ರಯತ್ನ ಮಾಡಿದ್ದೇನೆ. ‘ದೇವಸ್ಥಾನದಲ್ಲಿ ಭಕ್ತಾದಿಗಳಲ್ಲಿ ವಿನಂತಿ’ ಎಂಬ ನಾಮಫಲಕ ನಮ್ಮ ಸಿನಿಮಾ ಶೀರ್ಷಿಕೆಗೆ ಪ್ರೇರಣೆಯಾಗಿದೆ. ಚಿತ್ರದಲ್ಲಿನ ಒಂದು ಹಾಡನ್ನು ಪೊಲೀಸ್ ಇಲಾಖೆಗೆ ಅರ್ಪಿಸುತ್ತಿದ್ದೇವೆ. ಬಂದ್ ಸಂದರ್ಭದಲ್ಲಿ ಸಾರ್ವಜನಿಕ ಆಸ್ತಿಪಾಸ್ತಿ ನಾಶಪಡಿಸಬೇಡಿ. ಅಪರಾಧಕೃತ್ಯಗಳನ್ನು ತಡೆಯಲು ನಿಮ್ಮ ಸಹಕಾರ ನೀಡಿ ಅಂತ ಈ ಹಾಡಿನ ಮೂಲಕ ಮನವಿ ಮಾಡಿಕೊಳ್ಳುತ್ತಿದ್ದೇವೆ. ಈ ಹಾಡನ್ನು ಖ್ಯಾತ ಗಾಯಕ ವಿಜಯ್ ಪ್ರಕಾಶ್ ಹಾಡಿರುವುದು ನಮಗೆ ಖುಷಿ ತಂದಿದೆ. ತುಮಕೂರು ಜಿಲ್ಲೆಯ ಗೊರವನಹಳ್ಳಿ, ಬೆಂಗಳೂರು ಸಿಟಿ, ತೀರ್ಥಹಳ್ಳಿ, ಅಜ್ಜಂಪುರ, ತಲಕಾಡು ಮುಂತಾದ ಸ್ಥಳಗಲ್ಲಿ ಶೂಟಿಂಗ್ ಮಾಡಿದ್ದೇವೆ. ಐದಾರು ಶೆಡ್ಯೂಲ್‍ನಲ್ಲಿ ಶೂಟಿಂಗ್ ಕಂಪ್ಲೀಟ್ ಆಯ್ತು. ಈ ವರ್ಷದ ಅಂತ್ಯದಲ್ಲಿ ಸಿನಿಮಾ ಬಿಡುಗಡೆ ಮಾಡುವ ಪ್ಲಾನ್ ಮಾಡಿಕೊಂಡಿದ್ದೇವೆ.