ಅಕ್ಟೋಬರ್ 1ಕ್ಕೆ ಬರುತ್ತಿದೆ ಕಾಗೆ ಮೊಟ್ಟೆ

ಹಿರಿಯ ನಟ ಜಗ್ಗೇಶ್ ಅವರ ಪುತ್ರ ಗುರುರಾಜ್ ಪ್ರಧಾನ ಪಾತ್ರದಲ್ಲಿ ನಟಿಸಿರುವ ಕಾಗೆ ಮೊಟ್ಟೆ ಚಿತ್ರ ಅಕ್ಟೋಬರ್ 1 ರಂದು ತೆರೆಗೆ ಬರಲಿದೆ.

ರಾಜ್ಯ ಸರಕಾರ ಹೌಸ್ ಫುಲ್ ಪ್ರದರ್ಶನಕ್ಕೆ ಅವಕಾಶ ನೀಡಿರುವ ಮೊದಲ ದಿನವೇ ಈ ಚಿತ್ರ ತೆರೆಗೆ ಬರುತ್ತಿರುವುದು ವಿಶೇಷವಾಗಿದೆ. ಚಂದ್ರಹಾಸ ನಿರ್ದೇಶನದ ಈ ಚಿತ್ರದಲ್ಲಿ ಗುರುರಾಜ್ ಅವರ ಜೊತೆಗೆ ಮಾದೇಶ ಹಾಗೂ ಹೇಮಂತ್ ಪ್ರಧಾನ ಪಾತ್ರದಲ್ಲಿ ನಟಿಸಿದ್ದಾರೆ. ತನುಜ ಅವರು ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ.

ಲಾಕ್ ಡೌನ್ ಮುನ್ನ ತೆರೆಗೆ ಬರಬೇಕಾಗಿದ್ದ ಚಿತ್ರವನ್ನು ಸುಬ್ಬರಾಯಡು, ಎಚ್ ಎನ್ ಶ್ರೀನಿವಾಸಯ್ಯ ಅವರು ನಿರ್ಮಾಣ ಮಾಡಿದ್ದಾರೆ. ಚಿತ್ರವನ್ನು ಕೊಳ್ಳೇಗಾಲ, ಚಾಮರಾಜನಗರ ಸೇರಿದಂತೆ ಬೆಂಗಳೂರಿನ ಸ್ಲಂಗಳಲ್ಲಿ ಚಿತ್ರೀಕರಿಸಲಾಗಿದೆ.

ಈ ಚಿತ್ರ ಹಳ್ಳಿಗಳಲ್ಲಿ ಗಾಬರಿ ಮಾಡಿಕೊಂಡು ಇದ್ದ ಮೂವರು ಹುಡುಗರು ಬೆಂಗಳೂರಿಗೆ ಬಂದ ನಂತರ ಆಗುವ ಘಟನೆಗಳ ಕಥಾಹಂದರವನ್ನು ಹೊಂದಿದೆ. ಈ ಹುಡುಗರಿಗೆ ಬೆಂಬಲ ನೀಡುವ ವೇಶ್ಯೆಯ ಪಾತ್ರದಲ್ಲಿ ಸೌಜನ್ಯ ಅವರು ನಟಿಸಿದ್ದಾರೆ. ಶನಿಯ ವಾಹನ ಆಗಿರುವ ಕಾಗೆಯಂತೆ ಯಾರನ್ನು ಬಿಡದ ಮೂವರು ಹುಡುಗರ ಪಾತ್ರ ಇಲ್ಲಿದೆ. ಬೆಂಗಳೂರಿನಲ್ಲಿ ಅವರು ಅಂದುಕೊಂಡ ಗುರಿಗಳು ಈಡೇರುತ್ತವೆಯೇ ಎನ್ನುವುದು ಚಿತ್ರದ ಸಸ್ಪೆನ್ಸ್ ಆಗಿದೆ.

ಚಿತ್ರಕ್ಕೆ ಶ್ರೀವತ್ಸ ಅವರು ಸಂಗೀತ ಸಂಯೋಜನೆ ಮಾಡಿದ್ದಾರೆ. ಜಗ್ಗೇಶ್ ಅವರು ಒಂದು ಹಾಡಿಗೆ ಸಾಹಿತ್ಯ ರಚಿಸುವ ಜೊತೆಗೆ ಹಾಡಿರುವುದು ಚಿತ್ರದ ವಿಶೇಷ ಆಗಿದೆ. ರವಿ ಅವರ ಛಾಯಾಗ್ರಹಣ ಚಿತ್ರಕ್ಕೆ ಇದೆ.
ಹೌಸ್ ಫುಲ್ ಪ್ರದರ್ಶನದ ಮೊದಲ ದಿನ ಚಿತ್ರಮಂದಿರಕ್ಕೆ ಬರುತ್ತಿರುವ ಕಾಗೆ ಮೊಟ್ಟೆ ಚಿತ್ರ ಪ್ರೇಕ್ಷಕರನ್ನು ಯಾವ ರೀತಿ ರಂಜಿಸುತ್ತದೆ ಎನ್ನುವ ಕುತೂಹಲ ಮೂಡಿದೆ.