ಉದ್ಘರ್ಷ ಚಿತ್ರದ ಫಸ್ಟ್ ಲುಕ್ ನಲ್ಲಿ ರಕ್ತ ಸಿಕ್ತ ಹುಡುಗಿಯೊಬ್ಬಳ ಕಾಲುಗಳನ್ನು ತೋರಿಸಿ ಪೋಸ್ಟರ್‌ನಲ್ಲೇ ಕುತೂಹಲ ಮೂಡಿಸಿದ್ದ ನಿರ್ದೇಶಕ ಸುನೀಲ್ ಕುಮಾರ್ ದೇಸಾಯಿ ಚಿತ್ರದ ಮತ್ತೊಂದು ಪೋಸ್ಟರ್ ಬಿಡುಗಡೆ ಮಾಡಿದ್ದು ಮತ್ತೆ ಎಲ್ಲರ ತಲೆಗೆ ಹುಳ ಬಿಟ್ಟಿದ್ದಾರೆೆ. ಫಸ್ಟ್ ಪೋಸ್ಟರ್‌ನಲ್ಲಿ ಯಾರದ್ದು ಆ ಕಾಲುಗಳು ಅನ್ನೋ ಕುತೂಹಲ ಕೆರಳಿಸಿದ್ರೆ, ಈಗ ಯಾರದ್ದು ಈ ಕೈಗಳು? ಅನ್ನೋ ಪ್ರಶ್ನೆ ಎಬ್ಬಿಸಿದ್ದಾರೆ. ಪೋಸ್ಟರ್‌ನಲ್ಲಿ ಬಟ್ಟೆಯಿಂದ ಕಟ್ಟಿರೋ ಗಂಡಿನ ಕೈಗಳಿದ್ದು ಹುಡುಗಿಯೊಬ್ಬಳು ಕೈನಲ್ಲಿ ಚಾಕು ಹಿಡಿದಿರೋದನ್ನ ತೋರಿಸಲಾಗಿದೆ. ಇಷ್ಟೇ ಅಲ್ಲ ಮುಂದೆ ಬರೋ ಚಿತ್ರದ ಎಲ್ಲಾ ಪೋಸ್ಟರ್, ಮೋಷನ್ ಪೋಸ್ಟರ್‌ಗಳಲ್ಲೂ ಕೇವಲ ಪಾತ್ರಗಳ ಕೈಕಾಲುಗಳು, ಮುಖದ ನೆರಳು, ಭಯ ಹುಟ್ಟಿಸೋ ಕಣ್ಣುಗಳು ಇವುಗಳನ್ನ ಮಾತ್ರ ತೋರಿಸ್ತಾರೇ ಹೊರತು ಕೊನೇವರೆಗೂ ಪಾತ್ರಗಳ ಮುಖ ಅನಾವರಣ ಆಗೋದೆ ಇಲ್ವಂತೆ.
ವಿಶೇಷ ಪೋಸ್ಟರ್‌ನಿಂದ್ಲೇ ಸಿಗ್ತಿದೆ ಪ್ರಮೋಷನ್!
ಎರಡು ವರ್ಷಗಳ ಬಳಿಕ ಮತ್ತೆ ಕಮ್ ಬ್ಯಾಕ್ ಮಾಡಿರೋ ಸುನೀಲ್ ಕುಮಾರ್ ದೇಸಾಯಿ ಪ್ರಕಾರ ಸಿನಿಮಾ ಪೋಸ್ಟರ್ ಇಡೀ ಚಿತ್ರದ ಕಥೆ ಹಾಗೂ ಕ್ಯಾರೆಕ್ಟರ್‌ಗಳ ಬಗ್ಗೆ ಕುತೂಹಲ ಮೂಡಿಸೋ ಹಾಗಿರಬೇಕಂತೆ. ಹೀಗಾಗೇ ಈ ಹೊಸ ಫಾರ್ಮುಲಾ ಕಂಡುಹಿಡಿದುಕೊಂಡಿದ್ದಾರೆ. ಹಾಗೆ ನೋಡಿದ್ರೆ ಈಗಾಗ್ಲೇ ಬೇರೆ ಚಿತ್ರರಂಗದ ಹಲವು ಚಿತ್ರಗಳ ಪೋಸ್ಟರ್‌ಗಳು ಇಂಥಾ ಫಾರ್ಮುಲಾದಿಂದಲೇ ಹೆಸ್ರು ಮಾಡಿದ್ವು. ಬಾಲಿವುಡ್‌ನ ಮರ್ಡರ್-3 ಚಿತ್ರದ ಪೋಸ್ಟರ್‌ನಲ್ಲಿ ಹೀಗೆ ಕೇವಲ ಹೆಣ್ಣಿನ ತುಟಿಗಳಲ್ಲಿ ಗುಲಾಬಿ ಮುಳ್ಳಿನಿಂದ ರಕ್ತ ಸೋರುತ್ತಿರೋ ಪೋಸ್ಟರ್ ಗಮನ ಸೆಳೆದಿತ್ತು. ಈ ಚಿತ್ರದ ಪೋಸ್ಟರ್‌ಗಳನ್ನ ನೋಡ್ತಿದ್ರೆ ಇದೊಂದು ಪಕ್ಕಾ ಸಸ್ಪೆನ್ಸ್ ಪ್ಯಾಕಡ್ ಥ್ರಿಲ್ಲರ್ ಸಿನಿಮಾ ಅನ್ನೋ ನಿರೀಕ್ಷೆ ಹುಟ್ಟಿಸಿದೆ. ಹೊಸವರ್ಷದ ದಿನದಂದು ರೆಸಾರ್ಟ್‌ವೊಂದ್ರಲ್ಲಿ ನಡೆಯೋ ಒಂದು ಕೊಲೆ ಚಿತ್ರದ ಒನ್‌ಲೈನ್‌ ಸ್ಟೋರಿ. 10 ನಿಮಿಷದಲ್ಲಿ ನಡೆಯೋ ಘಟನೆಯನ್ನ ಸಿನಿಮಾ ಮಾಡಲಾಗಿದೆ. ಇಡೀ ಚಿತ್ರದಲ್ಲಿರೋದು ಕೇವಲ 20 ನಿಮಿಷದ ಡೈಲಾಗ್ಸ್ ಅಷ್ಟೇ.
ಚಿತ್ರದಲ್ಲಿ ಠಾಕೂರ್‌ ಅನೂಪ್‌ ಸಿಂಗ್‌, ಧನ್ಸಿಕಾ, ತಾನ್ಯ ಹೋಪ್‌, ಕಬೀರ್‌ ಸಿಂಗ್‌ ದುಹಾನ್‌, ಬಾಹುಬಲಿ ಖ್ಯಾತಿಯ ಪ್ರಭಾಕರ್‌, ಶ್ರದ್ಧಾ ದಾಸ್‌, ಹರ್ಷಿಕಾ ಪೂಣಚ್ಚ ಸೇರಿದಂತೆ ದೊಡ್ಡ ತಾರಾಗಣವಿದೆ. ಹೈದ್ರಾಬಾದ್, ಕೇರಳ, ಮಡಿಕೇರಿ, ಬೆಂಗಳೂರಿನಲ್ಲಿ ಮುಕ್ಕಾಲು ಭಾಗ ಚಿತ್ರೀಕರಣ ಆಗಿದ್ದು ಸಿನಿಮಾದ ಟಾಕಿ ಭಾಗ ಈಗಾಗಲೇ ಮುಗಿದಿದೆ. ಚಿತ್ರವನ್ನು ಏಕಕಾಲದಲ್ಲಿ ಕನ್ನಡ, ತೆಲಗು, ತಮಿಳಿನಲ್ಲಿ ರಿಲೀಸ್ ಮಾಡಲಿದ್ದಾರೆ. ಆದಷ್ಟೂ ಬೇಗ ಚಿತ್ರ ತೆರೆಮೇಲೆ ಬರಲಿದೆ.
Be the first to comment