ಅ.6ಕ್ಕೆ‌ ‘ಮಾರಕಾಸ್ತ್ರ’ ವಿಶ್ವಾದ್ಯಂತ ಬಿಡುಗಡೆ ; ಬಾರಿ ಮೊತ್ತಕ್ಕೆ ಹಿಂದಿ ಹಕ್ಕುಗಳು ಮಾರಾಟ!

2017ರಲ್ಲಿ ಉಪ್ಪು ಹುಳಿ ಖಾರ ಸಿನಿಮಾದ ಬಳಿಕ ಬೇರಾವ ಚಿತ್ರದಲ್ಲಿಯೂ ಮಾಲಾಶ್ರೀ ನಟಿಸಿರಲಿಲ್ಲ. ಈಗ ಮಾರಕಾಸ್ತ್ರ ಮೂಲಕ ಆರು ವರ್ಷಗಳ ಬಳಿಕ ಕಂಬ್ಯಾಕ್‌ ಮಾಡಿದ್ದಾರೆ. ಸಿನಿಮಾದ ಎಲ್ಲ ಕೆಲಸ ಮುಗಿಸಿ ಚಿತ್ರ ಅಕ್ಟೋಬರ್‌ 6ಕ್ಕೆ ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ.

ಗುರುಮೂರ್ತಿ ಸುನಾಮಿ ನಿರ್ದೇಶನ ಹಾಗೂ ಕೋಮಲಾ ನಟರಾಜ್ ನಿರ್ಮಾಣದ ಮಾಲಾಶ್ರೀ ಮುಖ್ಯ ಪಾತ್ರದಲ್ಲಿರುವ ‘ಮಾರಕಾಸ್ತ್ರ’ ಚಿತ್ರ ಬಿಡುಗಡೆಗೆ ಮುನ್ನವೇ ಮಾರಾಟದ ಭರಾಟೆಯಲ್ಲಿ ದಾಖಲೆ ಸೃಷ್ಟಿ ಮಾಡಿದ್ದು, ಹಿಂದಿ ಡಬ್ಬಿಂಗ್ ಹಕ್ಕುಗಳು ಬಾರಿ ಮೊತ್ತಕ್ಕೆ ಮಾರಾಟವಾಗುವ ಮೂಲಕ ನಿರ್ಮಾಪಕರನ್ನು ಸೇಫ್ ಮಾಡಿದೆ.

ವಿಶೇಷ ಚೇತನರಾಗಿರುವ ಗುರುಮೂರ್ತಿ ಸುನಾಮಿ ಅವರ ಮೊದಲ ನಿರ್ದೇಶನದ ಚಿತ್ರ ಇದಾಗಿದ್ದು, ಮೇಕಿಂಗ್ ಹಾಗೂ ಕಲಾವಿದರ ಆಯ್ಕೆ ಎರಡರಲ್ಲಿಯೂ ವಿಶೇಷತೆ ಪಡೆದುಕೊಂಡಿದೆ.

ಮಾಲಾಶ್ರೀ ಅವರ ಪಾತ್ರದ ಜೊತೆಗೆ ಮತ್ತೊಂದು ಯುವ ಜೋಡಿ ಚಿತ್ರದಲ್ಲಿ ಗಮನ ಸೆಳೆಯಲಿದ್ದು, ಆನಂದ್ ಆರ್ಯ ಹಾಗೂ ಹರ್ಷಿಕಾ ಪೂಣಚ್ಚ ಆ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

ಸಾಕಷ್ಟು ಹೊಸ ಕಲಾವಿದರಿಗೂ ಅವಕಾಶವಿರುವ ಚಿತ್ರದಲ್ಲಿ ಪ್ರೇಕ್ಷಕರನ್ನು ಮೋಹಕತೆಗೆ ಸೆಳೆವ ಹಾಡು ಇದೆ. ಅದೇ ಗ್ಲಾಮರ್ ಗಾಡಿ..!ಮಂಜು ಕವಿ ಬರೆದಿರುವ ಹಾಗೂ ಅನನ್ಯ ಭಟ್ ಹಾಡಿರುವ ‘ಗ್ಲಾಮರ್ ಗಾಡಿ..’ ಹಾಡು ಯೂಟ್ಯೂಬ್ ನಲ್ಲಿ ಈಗಾಗಲೇ ಮಿಲಿಯನ್ ಗಟ್ಟಲೆ ವೀಕ್ಷಕರನ್ನು ತಲುಪಿದೆ.