ಮೇ 3ರಂದು ‘ಕಾಂಗರೂ’ ಸಿನಿಮಾ ಬಿಡುಗಡೆ

ಕಿಶೋರ್ ಮೇಗಳಮನೆ ಅವರ ನಿರ್ದೇಶನದ ‘ಕಾಂಗರೂ’ ಸಿನಿಮಾ ಮೇ 3ರಂದು ಬಿಡುಗಡೆ ಆಗಲಿದೆ.

ಮೇ 4ರಂದು ಅದಿತ್ಯ ಅವರ ಹುಟ್ಟುಹಬ್ಬ. ಅದಕ್ಕೂ ಒಂದು ದಿನ ಮುನ್ನ ಮೇ 3ರಂದು ಸಿನಿಮಾ ಬಿಡುಗಡೆ ಆಗಲಿದೆ. ಸಿನಿಮಾದಲ್ಲಿ ಹಾರರ್, ಸಸ್ಪೆನ್ಸ್, ಥ್ರಿಲ್ಲರ್, ತಾಯಿ ಸೆಂಟಿಮೆಂಟ್​ ಮುಂತಾದ ಅಂಶಗಳು ಇವೆ.

ಅಂದಾಜು 150ರಿಂದ 200 ಚಿತ್ರಮಂದಿರಗಳಲ್ಲಿ ಈ ಸಿನಿಮಾ ರಿಲೀಸ್ ಮಾಡುವುದಾಗಿ ನಿರ್ದೇಶಕ ಕಿಶೋರ್ ಮೇಗಳಮನೆ ತಿಳಿಸಿದ್ದಾರೆ.

ಆದಿತ್ಯ ಹಾಗೂ ‘ಕನ್ನಡತಿ’ ಧಾರಾವಾಹಿ ಖ್ಯಾತಿಯ ರಂಜನಿ ರಾಘವನ್ ಅವರು ‘ಕಾಂಗರೂ’ ಸಿನಿಮಾದಲ್ಲಿ ಪ್ರಧಾನ ಪಾತ್ರಗಳನ್ನು ಮಾಡಿದ್ದಾರೆ.  ಇತ್ತೀಚೆಗೆ ಚಿತ್ರತಂಡದವರು  ಸಿನಿಮಾದ ಟ್ರೇಲರ್​ ಅನಾವರಣ ಮಾಡಿದರು.

ಸಿನಿಮಾದ ನಿರ್ಮಾಪಕರೇ ಟ್ರೇಲರ್​ ರಿಲೀಸ್​ ಮಾಡಿದರು. ಈ ಬಗ್ಗೆ ಮಾತನಾಡಿದ ಆದಿತ್ಯ, ‘ನಿರ್ಮಾಪಕರೇ ನಮ್ಮ ಅನ್ನದಾತರು. ಆದ್ದರಿಂದ ಅವರಿಂದಲೇ ಟ್ರೇಲರ್ ಬಿಡುಗಡೆ ಮಾಡಿಸಬೇಕು ಎಂದು ನಾನು ಮತ್ತು ನಿರ್ದೇಶಕರು ಅಂದುಕೊಂಡೆವು. ಹಾಗಾಗಿ ನಿರ್ಮಾಪಕರೇ ಟ್ರೇಲರ್ ಅನಾವರಣ ಮಾಡಿದ್ದಾರೆ’ ಎಂದು ಹೇಳಿದರು.

 ‘ಆರೋಹ ಪ್ರೊಡಕ್ಷನ್ಸ್’ ಮೂಲಕ ಚೆನ್ನಕೇಶವ, ರಮೇಶ್‌ ಬಂಡೆ, ನರಸಿಂಹಮೂರ್ತಿ ಚಕ್ರಭಾವಿ, ಸ್ವಾಮಿ ಚಕ್ರಭಾವಿ, ಕೆ.ಜಿ.ಆರ್. ಗೌಡ, ರವಿ ಕೀಲಾರ ಮಂಡ್ಯ ಅವರು ನಿರ್ಮಾಣ ಮಾಡಿದ್ದಾರೆ.

ಸಾಧು ಕೋಕಿಲ ಅವರು ಈ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. ಈ ಮೊದಲು ಆದಿತ್ಯ ಅವರ ಕಾಂಬಿನೇಷನ್​ನಲ್ಲಿ ‘ನೀನೊಂದು ಮುಗಿಯದ ಮೌನ..’ ಹಾಡನ್ನು ಸಾಧುಕೋಕಿಲ ನೀಡಿದ್ದರು.

‘ಸಾಧು ಕೋಕಿಲ ಅವರು ಮತ್ತೊಮ್ಮೆ ನನ್ನ ಸಿನಿಮಾಗೆ ಅದ್ಭುತವಾದ ಸಂಗೀತ ನೀಡಿದ್ದಾರೆ. ಕ್ಯಾಮೆರಾ ವರ್ಕ್ ಕೂಡ ನಮ್ಮ ಸಿನಿಮಾದ ಮತ್ತೊಂದು ಹೈಲೈಟ್. ಉದಯಲೀಲಾ ಅವರು ತುಂಬಾ ಚೆನ್ನಾಗಿ ಛಾಯಾಗ್ರಹಣ ಮಾಡಿದ್ದಾರೆ. ನನಗೆ ಈ ಚಿತ್ರದಲ್ಲಿ ತನಿಖಾಧಿಕಾರಿ ಪಾತ್ರವಿದೆ’ ಎಂದಿದ್ದಾರೆ ಆದಿತ್ಯ.

 ‘ನಾನು ಆದಿತ್ಯ ನಟನೆಯ ಸಿನಿಮಾಗಳನ್ನು ನೋಡಿ ಬೆಳೆದವಳು. ಈಗ ಅವರೊಂದಿಗೆ ನಟಿಸುವ ಅವಕಾಶ ಸಿಕ್ಕಿತು. ಪ್ರೇಕ್ಷಕಳಾಗಿ ನಾನು ಈಗಾಗಲೇ ಸಿನಿಮಾ ನೋಡಿದ್ದೇನೆ. ನಿರ್ದೇಶಕರು ಪ್ರತಿ ಪಾತ್ರವನ್ನು ಬಹಳ ಅಚ್ಚುಕಟ್ಟಾಗಿ ತೆರೆಗೆ ತಂದಿದ್ದಾರೆ’ ಎಂದಿದ್ದಾರೆ ರಂಜನಿ ರಾಘವನ್​.

ಬೆಂಗಳೂರು, ಶೃಂಗೇರಿ, ಕೊಪ್ಪ, ಚಿಕ್ಕಮಗಳೂರು, ಹೊರನಾಡು ಸುತ್ತಮುತ್ತ ಶೂಟಿಂಗ್​ ಮಾಡಲಾಗಿದೆ. ‘ಯು ಟರ್ನ್’ ಸಿನಿಮಾದಿಂದ ಸ್ಫೂರ್ತಿ ಪಡೆದು ಕಿಶೋರ್​ ಮೇಗಳಮನೆ ಅವರು ‘ಕಾಂಗರೂ’ ಸಿನಿಮಾ ಮಾಡಿದ್ದಾರೆ. ಒಂದು ಚಿಕ್ಕ ತಪ್ಪಿನಿಂದ ಮುಂದೆ ಏನೆಲ್ಲ ಆಗಬಹುದು ಎಂಬುದು ಈ ಸಿನಿಮಾವನ್ನು ಅವರು ತೋರಿಸಿದ್ದಾರೆ.

ನಿರ್ಮಾಪಕ ರಮೇಶ್ ಬಂಡೆ, ‘ನಾವು ಆರು ಮಂದಿ ಸ್ನೇಹಿತರು ಪೀಣ್ಯದಲ್ಲಿ ಇಂಡಸ್ಟ್ರಿ ನಡೆಸುತ್ತಿದ್ದೇವೆ. ಹೊಸದಾಗಿ ಏನಾದರೂ ಮಾಡೋಣ ಎಂಬ ಉದ್ದೇಶದಿಂದ ಈ ಸಿನಿಮಾ ನಿರ್ಮಾಣ ಮಾಡಿದ್ದೇವೆ. ಜನರು ಕೊಡುವ ಹಣಕ್ಕೆ ಈ ಸಿನಿಮಾ ನ್ಯಾಯ ಒದಗಿಸುತ್ತದೆ’ ಎಂದಿದ್ದಾರೆ.

——