ಕರಣ್ ಜೋಹರ್ ಚಿತ್ರದಲ್ಲಿ ಜಾಹ್ನವಿ

ನೂಲಿನಂತೆ ಸೀರೆ, ತಾಯಿ ಯಂತೆ ಮಗಳು ಎಂಬ ನಾಣ್ಣುಡಿ ಹಿರಿಯ ಅಭಿನೇತ್ರಿ ದಿವಂಗತ ಶ್ರೀದೇವಿ ಪುತ್ರಿ ಜಾಹ್ನವಿ ಕಪೂರ್‍ಗೆ ಅನ್ವಯವಾಗುತ್ತಿದೆ. ಚೊಚ್ಚಲ ದಢಕ್ ಸಿನಿಮಾದಲ್ಲೇ ವಯಸ್ಸಿಗೆ ಮೀರಿದ ನಟನಾ ಕೌಶಲ್ಯ ಪ್ರದರ್ಶಿಸಿ ಬಾಲಿವುಡ್ ಮಂದಿ ಗಮನ ಸೆಳೆದಿದ್ದಾಳೆ ಜಾನು. ಈ ಚಿತ್ರ ಬಾಕ್ಸ್ ಆಫೀಸ್‍ನಲ್ಲಿ ಯಶಸ್ವಿ ಯಾಗಿದ್ದು, ನವತಾರೆಗೆ ಅವಕಾಶಗಳು ಲಭಿಸತೊಡಗಿವೆ.ಖ್ಯಾತ ನಿರ್ದೇಶಕ- ನಿರ್ಮಾಪಕ ಕರಣ್ ಜೋಹರ್ ಅವರ ಧರ್ಮ ಪ್ರೊಡಕ್ಷನ್ಸ್‍ನ ಮಲ್ಟಿಸ್ಟಾರರ್ ಬಿಗ್ ಪ್ರಾಜೆಕ್ಟ್ ತಖ್ತ್‍ನಲ್ಲಿ ಜಾನುಗೂ ಚಾನ್ಸ್ ಲಭಿಸಿದೆ. ಬಿ-ಟೌನ್ ಹೆವಿ ವೇಟ್‍ಗಳಾದ ರಣವೀರ್ ಸಿಂಗ್, ಕರೀನಾ ಕಪೂರ್, ಅಲಿಯಾ ಭಟ್, ಅನಿಲ್ ಕಪೂರ್ ಮತ್ತು ವಿಕ್ಕಿ ಕೌಶಲ್ ತಖ್ತ್ ಸಿನಿಮಾದ ತಾರಾಗಣದಲ್ಲಿದ್ದಾರೆ.

ಬಹು ತಾರಾಗಣದ ಐತಿಹಾಸಿಕ ಅದ್ಧೂರಿ ಸಿನಿಮಾದಲ್ಲಿ ಖ್ಯಾತ ನಟ-ನಟಿಯರೊಂದಿಗೆ ನಟಿಸುವ ಅವಕಾಶ ಲಭಿಸಿರುವುದಕ್ಕೆ ಜಾನು ಫುಲ್ ಖುಷ್ ಆಗಿದ್ದಾಳೆ. ಇದಕ್ಕಾಗಿ ಕರಣ್ ಜೋಹರ್‍ಗೆ ಕೃತಜ್ಞತೆಗಳನ್ನೂ ಸಲ್ಲಿಸಿದ್ದಾಳೆ. ದಢಕ್ ಸಿನಿಮಾ ಯಶಸ್ಸಿನ ಹಿನ್ನೆಲೆಯಲ್ಲಿ ನಿರ್ದೇಶಕ ಶಶಾಂಕ್ ಖೈತಾನ್, ನಿರ್ಮಾಪಕ ಕರಣ್ ಜೋಹರ್, ನಟ ಇಶಾನ್ ಖಟ್ಟರ್ ಹಾಗೂ ಸಹೋದರಿ ಖುಷಿ ಕಪೂರ್ ಜೊತೆ ಮಾಧ್ಯಮ ಸಂವಾದದಲ್ಲಿ ಜಾನು ಮಾತನಾಡಿದಳು.

ಕರಣ್ ಜೋಹರ್ ಅಂಕಲ್ ನನಗೆ ತಮ್ಮ ಎರಡನೇ ಪ್ರಾಜೆಕ್ಟ್‍ನಲ್ಲೂ ಅವಕಾಶ ನೀಡಿದ್ದಾರೆ. ಹೊಸಬಳಾದ ನನಗೆ ದೊಡ್ಡ ಬ್ಯಾನರ್ ಸಿನಿಮಾದಲ್ಲಿ ಅವಕಾಶ ಲಭಿಸಿರುವುದು ನನ್ನ ಅದೃಷ್ಟ. ನನಗೆ ತುಂಬಾ ಖುಷಿಯಾಗಿದೆ. ಇದಕ್ಕಾಗಿ ನಾನು ಅವರಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ ಎಂದು ಸಂತಸದಿಂದ ನುಡಿದಿದ್ದಾಳೆ ಜಾನು.