ವೀಕ್ಷಕರಿಗೆ ಮ್ಯೂಸಿಕ್ ಕಿಕ್ ಕೊಡಲಿದೆ ಸರಿಗಮಪ ಕ್ವಾರ್ಟರ್ ಫಿನಾಲೆ

ಕನ್ನಡ ಕಿರುತೆರೆಯ ರಿಯಾಲಿಟಿ ಷೋಗಳಲ್ಲೇ, ಅಗ್ರ ಸ್ಥಾನದಲ್ಲಿರುವ ಏಕೈಕ ಸಂಗೀತ ಕಾರ್ಯಕ್ರಮ ಸರಿಗಮಪ. ಸಂಗೀತ ಲೋಕದ ಶ್ರೇಷ್ಟ ತೀರ್ಪುಗಾರರಾದ, ಕನ್ನಡದ ಕಂಚಿನ ಕಂಠ ವಿಜಯ ಪ್ರಕಾಶ್, ಮ್ಯಾಜಿಕಲ್ ಕಂಪೋಸರ್ ಅರ್ಜುನ್ ಜನ್ಯ, ಮೆಲೋಡಿ ಕಿಂಗ್ ರಾಜೇಶ್ ಕೃಷ್ಣನ್ ಹಾಗೂ ನಾದಬ್ರಹ್ಮ ಡಾ. ಹಂಸಲೇಖ, ಇವರುಗಳ ಸಾರಥ್ಯದಲ್ಲಿ ಹಾಗೂ ನಾಡಿನ ಪ್ರತಿಭಾವಂತ ಸ್ಪರ್ಧಿಗಳ ಜೊತೆ ನಡೆದುಕೊಂಡು ಬರುತ್ತಿರುವ ಈ ಕಾರ್ಯಕ್ರಮದ 15ನೇ ಆವೃತ್ತಿಯು ಈಗ ಕ್ವಾರ್ಟರ್ ಫಿನಾಲೆಯ ಹಂತಕ್ಕೆ ಬಂದು ತಲುಪಿದೆ.ಈಗಾಗಲೇ ಈ ಸೀಸನ್ ನಲ್ಲಿ ಹಲವಾರು ಸುತ್ತುಗಳನ್ನು ಯಶಸ್ವಿಯಾಗಿ ಪೂರೈಸಿರುವ ಈ ಕಾರ್ಯಕ್ರಮದಲ್ಲಿ, ಒಟ್ಟು 12 ಸ್ಪರ್ಧಿಗಳು ಸಂಗೀತದ ಜಟಾಪಟಿ ನಡೆಸಲಿದ್ದು, ಇದರ ಮೂಲಕ ಇನ್ನು ಮುಂದೆ ಸ್ಪರ್ಧಾ ಶಾಖ ಇನ್ನಷ್ಟು ಹೆಚ್ಚಾಗುವುದಂತೂ ಸತ್ಯ.

ಇನ್ನು ಈಗಾಗಲೇ ಹೇಳಿರುವಂತೆ, ಕ್ವಾರ್ಟರ್ ಫೈನಲ್ಸ್ ಗೆ ತಲುಪಿರುವ 12 ಸ್ಪರ್ಧಿಗಳು, ಈ ಸುತ್ತಿನಲ್ಲಿ ತಮ್ಮ ತಮ್ಮ ಸಂಗೀತದ ಸಾಮರ್ಥ್ಯವನ್ನು ತೋರುವುದರ ಮುಖಾಂತರ, ಮುಂದಿನ ಹಂತಕ್ಕೆ ತಲುಪಲಿದ್ದಾರೆ.ಸರಿಗಮಪ ಸೀಸನ್ 15ರ ಕ್ವಾರ್ಟರ್ ಫೈನಲ್ಸ್ ನ ಇನ್ನೊಂದು ಬಹುದೊಡ್ಡ ವಿಶೇಷವೆಂದರೆ, ಕನ್ನಡದ ಸುಪ್ರಸಿದ್ದ ಸಂಗೀತ ನಿರ್ದೇಶಕ ವಿ. ಹರಿಕೃಷ್ಣ ಹಾಗೂ ಕನ್ನಡದ ವಿಕಟಕವಿ ಯೋಗರಾಜ್ ಭಟ್ ಅವರುಗಳು ಈ ಕ್ವಾರ್ಟರ್ ಫೈನಲ್ಸ್ ಗೆ ವಿಶೇಷ ಅತಿಥಿಗಳಾಗಿ ಆಗಮಿಸುತ್ತಿದ್ದಾರೆ.

ಈ ಮೂಲಕ, ಕನ್ನಡದ ಸದ್ಯದ ಸೆನ್ಸೇಷನಲ್ ಸಂಗೀತ ನಿರ್ದೇಶಕರುಗಳಾದ ವಿ. ಹರಿಕೃಷ್ಣ ಮತ್ತು ಅರ್ಜುನ್ ಜನ್ಯ, ಇದೇ ಮೊದಲ ಬಾರಿಗೆ ಸರಿಗಮಪ ವೇದಿಕೆಯಲ್ಲಿ ಜೊತೆಯಾಗಲಿದ್ದಾರೆ.

ಇದರ ಜೊತೆಗೆ, ಹರಿಕೃಷ್ಣ ಅವರೂ ಕೂಡಾ ಜನ್ಯ ಜೊತೆಗೆ ಅವರ ಸಿಗ್ನೇಚರ್ ಸ್ಟೆಪ್ ಹಾಕಿದ್ದೂ ಕೂಡಾ ಈ ಸಂಚಿಕೆಯ ವಿಶೇಷ ಎನ್ನಬಹುದು. ಈ ರೀತಿಯಾಗಿ ಕನ್ನಡದ ಪ್ರತಿಭಾನ್ವಿತ ಸಂಗೀತ ನಿರ್ದೇಶಕರೊಡನೆ, ಈ ಬಾರಿಯ ಸರಿಗಮಪ ಸೀಸನ್ 15 ರ ಕ್ವಾರ್ಟರ್ ಫೈನಲ್ ಇನ್ನಷ್ಟು ರಂಗೇರುವುದಂತೂ ಸತ್ಯ.

ಇನ್ನು, ಈ ಕ್ವಾರ್ಟರ್ ಫೈನಲ್ಸ್ ನ ಜಟಾಪಟಿಯಲ್ಲಿ ಯಾವ ಸ್ಪರ್ಧಿ ಸೆಮಿ ಫೈನಲ್ಸ್ ಗೆ ತಲುಪುತ್ತಾರೆ ಎಂಬುದನ್ನು, ಈ ಶನಿವಾರ ಹಾಗೂ ಭಾನುವಾರ ಸಂಜೆ 8 ಗಂಟೆಗೆ ತಳಿಯುವುತ್ತದೆ. ಒಟ್ಟಾರೆಯಾಗಿ ಈ ಮೂಲಕ, ಈ ವಾರದ ಸರಿಗಮಪ ಸೀಸನ್ 15 ರ ಕ್ವಾರ್ಟರ್ ಫಿನಾಲೆಯಂತೂ ನೋಡುಗರಿಗೆ ರಸದೌತಣವೇ ಸರಿ.