ನಟ ಚೇತನ್ ನೇತೃತ್ವದಲ್ಲಿ ನಿಧಿ ಸಂಗ್ರಹ

ಕೇರಳ ಹಾಗೂ ಕೊಡಗಿನ ವಿಪರೀತ ಮಳೆಗೆ ಸಿಲುಕಿರುವ ಜನರಿಗಾಗಿ ಅಗತ್ಯ ವಸ್ತುಗಳನ್ನು ತಲುಪಿಸಲು ಇಂದು ಗಾಂಧಿನಗರ ಪ್ರದೇಶದಲ್ಲಿ ಚೇತನ್​ ನಿಧಿ ಸಂಗ್ರಹಿಸಿದರು. ನಟ ಚೇತನ್ ಹಾಗೂ ನೂರಕ್ಕೂ ಹೆಚ್ಚು ಯುವ ಜನರ ಸಂಘಟನೆ, ನಿಧಿ ಸಂಗ್ರಹ, ಬಟ್ಟೆ, ದಿನನಿತ್ಯದ ಅಗತ್ಯ ವಸ್ತುಗಳು ಹಾಗೂ ನೆರೆ ಸಂತ್ರಸ್ತರಿಗೆ ಬೇಕಾದ ಅಗತ್ಯ ವಸ್ತುಗಳನ್ನು ಗಾಂಧಿನಗರದ ಅಂಗಡಿಗಳಿಂದ, ಜನರಿಂದ ಸಂಗ್ರಹಿಸಿದರು. ಕೇವಲ ತಾತ್ಕಾಲಿಕ ನೆರವಿಗಷ್ಟೇ ಅಲ್ಲ. ಮತ್ತೆ ಕೇರಳ, ಕೊಡಗು ಜನರ ಜನಜೀವನ ಸರಿಹೋಗಲು ಆರು ತಿಂಗಳಿಗೂ ಹೆಚ್ಚು ಸಮಯ ಬೇಕಾಗುತ್ತದೆ. ಹಾಗಾಗಿ ಅಗತ್ಯ ವಸ್ತುಗಳಾದ ಸ್ವೆಟರ್, ಕಂಬಳಿ, ಬಟ್ಟೆಗಳು, ಆಹಾರ ಸಾಮಗ್ರಿಗಳನ್ನು ಕೂಡಾ ಸಂಗ್ರಹಿಸಿದರು.

ಈ ವೇಳೆ ಮಾತನಾಡಿದ ನಟ ಚೇತನ್, ನಮ್ಮ ರಾಜ್ಯದವರು, ಪಕ್ಕದ ರಾಜ್ಯದವರು ತೊಂದರೆಯಲ್ಲಿ ಸಿಲುಕಿದಾಗ ನಮ್ಮ ಕೈಲಾದ ಸಹಾಯ ಮಾಡಬೇಕು. ಹಾಗಾಗಿ ತೊಂದರೆಗೆ ಸಿಲುಕಿರುವವರ ರಕ್ಷಣೆಗಾಗಿ ಯುವಕರೆಲ್ಲಾ ಸೇರಿ ಕೆಲಸ ಮಾಡುತ್ತಿದ್ದೇವೆ. ಪ್ರತಿಯೊಬ್ಬರೂ ಬೇರೆ ಬೇರೆ ರೀತಿಯಲ್ಲಿ ಸಹಾಯ ಮಾಡುತ್ತಿದ್ದಾರೆ. ನಮ್ಮ ಜನತೆ ಮಾನವೀಯತೆ ಮೆರೆಯುತ್ತಿದ್ದಾರೆ. ಯಾವುದೇ ಕಷ್ಟ ಬಂದರೂ ಸಹಾಯಕ್ಕೆ ನಮ್ಮ ಯುವಜನತೆ ರೆಡಿ ಇದ್ದಾರೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು