ತಮಿಳಿನ ಖ್ಯಾತ ನಿರ್ದೇಶಕ ಮಣಿರತ್ನಂ ಮೊದಲ ಬಾರಿಗೆ ವೆಬ್ ಸಿರೀಸ್ ನಿರ್ಮಾಣಕ್ಕೆ ಕೈ ಹಾಕಿದ್ದಾರೆ.
‘ನವರಸ’ ಶೀರ್ಷಿಕೆಯ ವೆಬ್ ಸರಣಿಯಲ್ಲಿ ತಮಿಳು ಚಿತ್ರರಂಗದ ಅನೇಕ ಸ್ಟಾರ್ ನಟರು ಅಭಿನಯಿಸಿದ್ದು ಇದರ ಟ್ರೇಲರ್ ಕುತೂಹಲ ಮೂಡಿಸಿದೆ.
ಜು.27ರಂದು ಟ್ರೇಲರ್ ಬಿಡುಗಡೆ ಆಗಿದ್ದು ಇದಕ್ಕೆ ಜನರಿಂದ ಮೆಚ್ಚುಗೆ ವ್ಯಕ್ತವಾಗಿದೆ. ನೆಟ್ಫ್ಲಿಕ್ಸ್ ಮೂಲಕ ಆಗಸ್ಟ್ 6ರಂದು ‘ನವರಸ’ ಪ್ರಸಾರ ಆಗಲಿದೆ.
ವಿಜಯ್ ಸೇತುಪತಿ, ಸೂರ್ಯ, ಪ್ರಕಾಶ್ ರೈ, ರೇವತಿ, ಸಿದ್ಧಾರ್ಥ್, ಅಶೋಕ್ ಸೆಲ್ವನ್, ನಾಗ ಶೌರ್ಯ, ಅಂಜಲಿ, ಪಾರ್ವತಿ ತಿರುವತ್ತು, ಯೋಗಿ ಬಾಬು, ಅರವಿಂದ್ ಸ್ವಾಮಿ ಸೇರಿದಂತೆ ಅನೇಕ ಕಲಾವಿದರು ವೆಬ್ ಸರಣಿಗಾಗಿ ಬಣ್ಣ ಹಚ್ಚಿದ್ದಾರೆ. ತಮಿಳು, ತೆಲುಗು, ಹಿಂದಿ ಮತ್ತು ಇಂಗ್ಲಿಷ್ನಲ್ಲಿ ಇದು ಪ್ರಸಾರ ಆಗಲಿದೆ.
‘ನವರಸ’ ವೆಬ್ ಸಿರೀಸ್ನಲ್ಲಿ 9 ಕಥೆಗಳ ಸಂಗಮ ಆಗಿದೆ. ಇಲ್ಲಿ 9 ಕಥೆಗಳ ಮೂಲಕ ನವರಸಗಳನ್ನು ವಿವರಿಸುವ ಪ್ರಯತ್ನ ಮಾಡಲಾಗಿದೆ.
ಪ್ರತಿ ಕಥೆಗೂ ಪ್ರತ್ಯೇಕ ನಿರ್ದೇಶಕರು ತಮ್ಮ ಕೈ ಚಳಕ ತೋರಿರುವುದು ವಿಶೇಷ ಆಗಿದೆ. ತಮಿಳಿನ ಖ್ಯಾತ ನಿರ್ದೇಶಕರಾದ ಪ್ರಿಯದರ್ಶನ್, ಕಾರ್ತಿಕ್ ನರೇನ್, ವಸಂತ್ ಎಸ್. ಸಾಯಿ, ಗೌತಮ್ ವಾಸುದೇವ್ ಮೆನನ್, ಬಿಜೋಯ್ ನಂಬಿಯಾರ್, ಕಾರ್ತಿಕ್ ಸುಬ್ಬರಾಜು, ಅರವಿಂದ್ ಸ್ವಾಮಿ, ಸರ್ಜುನ್ ಕೆ.ಎಮ್, ರತೀಂದ್ರನ್ ಆರ್. ಪ್ರಸಾದ್ ನಿರ್ದೇಶನ ಮಾಡಿದ್ದು ಚಿತ್ರ ಪ್ರೇಮಿಗಳಲ್ಲಿ ಕುತೂಹಲ ಮೂಡಿಸಿದೆ.
Be the first to comment