ಶಿವಣ್ಣ ಹೊಸ ಸಿನೆಮಾ ಘೋಷಣೆ

ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ನಟನೆಯ ಹೊಸ ಸಿನಿಮಾ ಘೋಷಣೆ ಆಗಿದ್ದು ಚಿತ್ರಕ್ಕೆ ‘ಸತ್ಯಮಂಗಲ’ ಎಂದು ಹೆಸರು ಇಡಲಾಗಿದೆ.

ಇದು ಶಿವಣ್ಣ ಅವರ 127ನೇ ಸಿನಿಮಾ ಆಗಿದ್ದು, ಯುವ ನಿರ್ದೇಶಕ ಲೋಹಿತ್ ಎಚ್ ಅವರು ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಲಿದ್ದಾರೆ.

ಆಗಸ್ಟ್ 20ರಂದು ಶಿವಣ್ಣ ಅವರ 127ನೇ ಚಿತ್ರದ ಟೈಟಲ್ ಪೋಸ್ಟರ್ ಬಿಡುಗಡೆಯಾಗಿದೆ. ಈ ಚಿತ್ರವನ್ನು ಕೃಷ್ಣ ಸಾರ್ಥಕ್ ನಿರ್ಮಾಣ ಮಾಡುತ್ತಿದ್ದಾರೆ. ಶಿವರಾಜ್ ಕುಮಾರ್ ಅವರ ಬೈರಾಗಿ ಚಿತ್ರಕ್ಕೂ ಕೃಷ್ಣ ಸಾರ್ಥಕ್ ನಿರ್ಮಾಪಕ ಎನ್ನುವುದು ವಿಶೇಷ.

ಚಿತ್ರದ ಪೋಸ್ಟರ್ ಈಗಾಗಲೇ ಬಿಡುಗಡೆ ಆಗಿದೆ. ಅನೂಪ್ ಸೀಳಿನ್ ಸಂಗೀತ ನೀಡಲಿದ್ದಾರೆ. ಸಿನೆಮಾದ ಕಲಾವಿದರು, ತಂತ್ರಜ್ಞರ ಬಗ್ಗೆ ಹೆಚ್ಚಿನ ಮಾಹಿತಿ ಇನ್ನಷ್ಟೇ ಹೊರ ಬೀಳಬೇಕಿದೆ.

ಶಿವಣ್ಣ ಒಂದರ ನಂತರ ಒಂದು ಸಿನಿಮಾಗಳಲ್ಲಿ ನಟಿಸುತ್ತಿರುವುದು ಅವರ ಅಭಿಮಾನಿಗಳಲ್ಲಿ ಸಂತೋಷವನ್ನು ಉಂಟು ಮಾಡಿದೆ.
ಶಿವಣ್ಣ ಅವರು ತಮ್ಮ 123ನೇ ಸಿನಿಮಾ ‘ಬೈರಾಗಿ’ ಯ ಶೂಟಿಂಗ್ ನಲ್ಲಿ ತೊಡಗಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ ಅವರ 124ನೇ ಚಿತ್ರವಾದ ‘ನೀ ಸಿಗೋವರೆಗೂ’ ಇದರ ಮುಹೂರ್ತ ನೆರವೇರಿತ್ತು.

ಶಿವರಾಜ್ ಕುಮಾರ್ ಅವರು ಹರ್ಷ ನಿರ್ದೇಶನದಲ್ಲಿ ‘ವೇದ’ ಸಿನಿಮಾ ಮಾಡಲಿದ್ದು ಇದು ಅವರ 125ನೇ ಸಿನೆಮಾ ಆಗಿದೆ. ಇದಲ್ಲದೇ ಅವರು ರಿಷಬ್ ಶೆಟ್ಟಿ ಅವರ ಜೊತೆ 126ನೇ ಸಿನಿಮಾ ಮಾಡಲಿದ್ದಾರೆ ಎನ್ನುವ ಮಾಹಿತಿ ಹೊರಬಿದ್ದಿದೆ.
___________