ರೂಪಾ ರಾವ್ ಮುಂದಿನ ಸಿನಿಮಾ ʻಗೋಚರ’

ಗಂಟುಮೂಟೆ ನಿರ್ದೇಶಕಿ ರೂಪಾ ರಾವ್ ಮುಂದಿನ ಸಿನಿಮಾಕ್ಕೆ ʻಗೋಚರ’ ಎಂಬ ಶೀರ್ಷಿಕೆ ನಿಗದಿಯಾಗಿದೆ.

‘ಗಂಟುಮೂಟೆ’ ಚಿತ್ರ ಪ್ರೇಕ್ಷಕರ ಮನಗೆದ್ದಿತ್ತು. ಈ ಕಾರಣದಿಂದಲೇ ರೂಪಾ ಗಂಟುಮೂಟೆಯ ಸೀಕ್ವೆಲ್ ಕೈಗೆತ್ತಿಕೊಳ್ಳುವ ನಿರೀಕ್ಷೆ ಇತ್ತು. ಇದೀಗ ‘ಗೋಚರ’ ಘೋಷಣೆಯಾದ ಬೆನ್ನಿಗೇ ಇದು ‘ಗಂಟುಮೂಟೆ’ಯ ಮುಂದುವರೆದ ಭಾಗವಾ ಎಂಬ ಪ್ರಶ್ನೆ ಮೂಡಿದೆ.  ರೂಪಾ ರಾವ್ ‘ಗೋಚರ’ ಎಂಬುದು ‘ಗಂಟುಮೂಟೆ’ಯ ನಂಟು ಕಳಚಿಕೊಂಡ ಚಿತ್ರ ಎಂಬಂತೆ ಪೋಸ್ಟರ್ ಮೂಲಕ ಸಂದೇಶ ರವಾನಿಸಿದ್ದಾರೆ.

ಇದೊಂದು ಟ್ರಾವೆಲ್ ಮೂವಿ ಎಂಬ ಸುಳಿವಷ್ಟೇ ಸದ್ಯ ಚಿತ್ರತಂಡದ ಕಡೆಯಿಂದ ಸಿಕ್ಕಿದೆ.  ‘ಗೋಚರ’ ಶೀರ್ಷಿಕೆಯಿಂದಲೇ ಗಮನ ಸೆಳೆಯುತ್ತಿದೆ. ನಿರ್ಮಾಪಕಿಯಾಗಿಯೂ ಭಿನ್ನ ಸಿನಿಮಾದ ಭಾಗವಾಗಿದ್ದ ರೂಪಾ ರಾವ್, ನಿರ್ದೇಶಕಿಯಾಗಿ ಬೆರಗಿನ ಕಥೆಯನ್ನೇ ಆಯ್ದುಕೊಂಡಿದ್ದಾರೆ. ಗೋಚರದ ಬಗೆಗಿನ  ಮಾಹಿತಿಗಳು ಹಂತ ಹಂತವಾಗಿ ಗೋಚರಿಸುವ ಸಾಧ್ಯತೆಗಳಿವೆ.

ಯಾರೂ ಸಲೀಸಾಗಿ ಮುಟ್ಟಲಾಗದ ಕತೆಗೆ ದೃಶ್ಯರೂಪ ಕೊಟ್ಟು ಗೆಲುವು ಕಂಡವರು ನಿರ್ದೇಶಕಿ ರೂಪಾ ರಾವ್. ʻಗಂಟುಮೂಟೆʼ ಮೂಲಕ ಕನ್ನಡ ಚಿತ್ರರಂಗದಲ್ಲಿ ವಿರಳವಾಗಿರುವ ನಿರ್ದೇಶಕಿಯರ ಸಾಲಿನಲ್ಲಿ ವಿಶಿಷ್ಟವಾದ ಸ್ಥಾನ ಗಿಟ್ಟಿಸಿಕೊಂಡಿದ್ದರು.

—-