ಗರುಡ ಗಮನ ವೃಷಭ ವಾಹನಕ್ಕೆ ರಕ್ಷಿತ್ ಶೆಟ್ಟಿ ಬೆಂಬಲ

ಒಂದು ಮೊಟ್ಟೆಯ ಕಥೆ ಸಿನಿಮಾ ಖ್ಯಾತಿಯ ರಾಜ್ ಬಿ. ಶೆಟ್ಟಿ ನಟಿಸಿ ನಿರ್ದೇಶಿಸುತ್ತಿರುವ ‘ ಗರುಡ ಗಮನ ವೃಷಭ ವಾಹನ’ ಸಿನಿಮಾವನ್ನು ರಕ್ಷಿತ್ ಶೆಟ್ಟಿ ಅವರು ತಮ್ಮ ಪರಂವಾಹ್ ಬ್ಯಾನರ್ ನಲ್ಲಿ ಬಿಡುಗಡೆಗೊಳಿಸುವುದಾಗಿ ಘೋಷಣೆ ಮಾಡಿದ್ದಾರೆ.

“ಲೂಸಿಯ, ರಾಮಾ ರಾಮಾ ರೇ, ದಿಯಾ ಸಿನಿಮಾಗಳ ಬಗ್ಗೆ ಒಳ್ಳೆಯ ಮಾತನ್ನಾಡಿ ಪ್ರೋತ್ಸಾಹಿಸಿದ್ದೆ. ಈ ಚಿತ್ರ ಉತ್ತಮವಾಗಿದ್ದು, ಒಳ್ಳೆಯ ಪ್ರಾಜೆಕ್ಟ್ ಗಳ ಬಗ್ಗೆ ಪ್ರಚಾರ ನೀಡಲು ನಾನು ಸದಾ ಸಿದ್ಧ ಇರುತ್ತೇನೆ” ಎಂದು ರಕ್ಷಿತ್ ಶೆಟ್ಟಿ ಹೇಳಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ರಾಜ್ ಬಿ ಶೆಟ್ಟಿ, “ಈ ಹಿಂದೆ ನಿರ್ಮಿಸಿದ್ದ ಒಂದು ಮೊಟ್ಟೆಯ ಕಥೆ ಸಿನಿಮಾಗೆ ಪವನ್ ಕುಮಾರ್ ಪ್ರೋತ್ಸಾಹ ಲಭಿಸಿತ್ತು. ಈಗ ತಮ್ಮ ನಿರ್ದೇಶನದ ಎರಡನೇ ಸಿನಿಮಾವನ್ನು ಪ್ರೇಕ್ಷಕರೆದುರು ತರಲು ರಕ್ಷಿತ್ ಶೆಟ್ಟಿ ಬೆಂಬಲ ನೀಡಿದ್ದಾರೆ. ಇದು ನನ್ನ ಅದೃಷ್ಟ” ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.

ಗರುಡ ಗಮನ ವೃಷಭ ವಾಹನ ಚಿತ್ರ ಗ್ಯಾಂಗ್ ಸ್ಟರ್ ಸಿನಿಮಾ ಆಗಿದ್ದು, ರಾಜ್ ಬಿ. ಶೆಟ್ಟಿ ಎದುರಾಗಿ ರಿಷಬ್ ಶೆಟ್ಟಿ ಅವರು ನಟಿಸುತ್ತಿದ್ದಾರೆ. ಆಕಸ್ಮಿಕವಾಗಿ ಭೂಗತ ಲೋಕವನ್ನು ಪ್ರವೇಶಿಸುವ ಇಬ್ಬರ ಪೈಕಿ ಒಬ್ಬ ವಿಷ್ಣುವಿನ ರೀತಿ ಎಲ್ಲ ಸನ್ನಿವೇಶಗಳನ್ನು ಸಾಕಷ್ಟು ಜಾಣ್ಮೆಯಿಂದ ನಿಭಾಯಿಸುವ ಸಾಮರ್ಥ್ಯ ಹೊಂದಿದ್ದರೆ, ಇನ್ನೊಬ್ಬ ಶಿವನಂತೆ ತನ್ನ ಕೆಲಸದ ಮೇಲೆ ಯಾವುದೇ ರೀತಿಯ ಹಿಡಿತ ಇಲ್ಲದ ರೀತಿಯ ಪಾತ್ರ ಇಲ್ಲಿದೆ. ಮಂಗಳೂರಿನ ನೆಲಕ್ಕೆ ಸೂಕ್ತ ಆಗುವ ಕಥೆಯನ್ನು ಹೆಣೆಯಲಾಗಿದೆ ಎನ್ನುವುದು ನಿರ್ದೇಶಕರ ಮಾತು.

ಈ ಚಿತ್ರದಲ್ಲಿ ಗೋಪಾಲಕೃಷ್ಣ ದೇಶಪಾಂಡೆ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.