‘ಪುಷ್ಪ 2’ ಅಪ್​ಡೇಟ್ ನೀಡಿದ ಅಲ್ಲು ಅರ್ಜುನ್

 ಹೈದರಾಬಾದ್​ನಲ್ಲಿ ನಡೆದ ‘ಮಂಗಳವಾರಂ’ ಚಿತ್ರದ ಪ್ರೀ-ರಿಲೀಸ್​ ಸಮಾರಂಭದಲ್ಲಿ ಅಲ್ಲು ಅರ್ಜುನ್​ ತಮ್ಮ ಅಭಿಮಾನಿಗಳ ಕೋರಿಕೆಯಂತೆ ‘ಪುಷ್ಪ 2’ ಅಪ್​ಡೇಟ್ ಹಂಚಿಕೊಂಡಿದ್ದಾರೆ.

“ಈಗ ಪುಷ್ಪ 2 ಚಿತ್ರೀಕರಣ ಮುಗಿಸುವ ತಯಾರಿಯಲ್ಲಿದ್ದೇನೆ. ಸದ್ಯ ರಾಮೋಜಿ ಫಿಲ್ಮ್​ ಸಿಟಿಯಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ಸಿನಿಮಾದ ದೃಶ್ಯಗಳಿಗಾಗಿ ನನ್ನ ಕೈಗಳಿಗೆ ಪಾರಾಣಿ (ಮೆಹಂದಿ) ಮತ್ತು ಉಗುರುಗಳಿಗೆ ನೇಲ್​ ಪಾಲಿಷ್​ ಹಚ್ಚಿದ್ದೇನೆ. ಮುಂಬರುವ ಪುಷ್ಪ 2 ನಿಮ್ಮ ಕಲ್ಪನೆಗೂ ಮೀರಿದ್ದು. ಇದಿಷ್ಟು ಈಗಿನ ಅಪ್​ಡೇಟ್​” ಎಂದು ತಿಳಿಸಿದ್ದಾರೆ.

 ಇಷ್ಟು ದಿನ ಅಭಿಮಾನಿಗಳು ‘ಪುಷ್ಪ 2: ದಿ ರೂಲ್​’ ಅಪ್​ಡೇಟ್​ಗಾಗಿ ಕಾಯುತ್ತಿದ್ದರು. ಈ ಬಗ್ಗೆ ಅಲ್ಲು ಅರ್ಜುನ್​ ಮಾಹಿತಿ ನೀಡಿರುವುದು ಫ್ಯಾನ್ಸ್​ಗೆ ಸಂತೋಷ ನೀಡಿದೆ.

ಪುಷ್ಪ ದಿ ರೂಲ್ ಸಿನಿಮಾಗೆ ಸುಕುಮಾರ್ ಆಕ್ಷನ್​ ಕಟ್​ ಹೇಳುತ್ತಿದ್ದಾರೆ. ಇದು 2021ರ ಬ್ಲಾಕ್​ಬಸ್ಟರ್ ಹಿಟ್ ಪುಷ್ಪ ದಿ ರೈಸ್​ ಚಿತ್ರದ ಮುಂದುವರಿದ ಭಾಗ. ಈ ಚಿತ್ರವನ್ನುಮೈತ್ರಿ ಮೂವೀ ಮೇಕರ್ಸ್ ಬ್ಯಾನರ್ ಅಡಿಯಲ್ಲಿ ನವೀನ್ ಎರ್ನೇನಿ ಮತ್ತು ವೈ ರವಿಶಂಕರ್ ಜಂಟಿಯಾಗಿ  ನಿರ್ಮಿಸುತ್ತಿದ್ದಾರೆ. ಚಿತ್ರಕ್ಕೆ ದೇವಿಶ್ರೀಪ್ರಸಾದ್ ಸಂಗೀತ ಸಂಯೋಜಿಸಿದ್ದಾರೆ. ಅಲ್ಲು ಅರ್ಜುನ್​ಗೆ ಜೋಡಿಯಾಗಿ ರಶ್ಮಿಕಾ ಮಂದಣ್ಣ ನಟಿಸಿದ್ದಾರೆ. ಚಿತ್ರದಲ್ಲಿ ಸುನೀಲ್, ಫಹಾದ್ ಫಾಜಿಲ್, ಅನಸೂಯ ಮುಂತಾದವರು ತಮ್ಮ ಪಾತ್ರಗಳಿಗೆ ಜೀವ ತುಂಬಿದ್ದಾರೆ.

 ​’ಪುಷ್ಪ ದಿ ರೂಲ್​’ ಶೂಟಿಂಗ್​ ಭರದಿಂದ ಸಾಗುತ್ತಿದೆ. ಹೈದರಾಬಾದ್​ನ ರಾಮೋಜಿ ಫಿಲ್ಮ್​ ಸಿಟಿಯಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ಈ ನಡುವೆಯೇ ಸೀಕ್ವೆಲ್​ ರೈಟ್ಸ್​ ಭಾರಿ ಮೊತ್ತಕ್ಕೆ ಮಾರಾಟವಾಗಿದೆ ಎಂಬ ಸುದ್ದಿ ಹೊರಬಿದ್ದಿದೆ. ‘ಪುಷ್ಪ : ದಿ ರೂಲ್​’ 200 ಕೋಟಿ ಮೊತ್ತಕ್ಕೆ ಹಿಂದಿ ರೈಟ್ಸ್​ ಮಾರಾಟವಾಗಿದ್ದು, 75 ಕೋಟಿಗೆ ಆಡಿಯೋ ರೈಟ್ಸ್​ ಸೇಲ್​ ಆಗಿದೆ ಎಂಬ ಮಾಹಿತಿ  ಓಡಾಡುತ್ತಿದೆ.

—-