‘ಪರದೇಶಿ ಕೇರಾಫ್ ಲಂಡನ್’ ಧ್ವನಿಸುರುಳಿ ಬಿಡುಗಡೆ

ರಾಜ ಲವ್ಸ್ ರಾಧೆ ಚಿತ್ರದ ನಂತರ ನಿರ್ದೇಶಕ ರಾಜಶೇಖರ್ ಹಾಗೂ ನಟ ವಿಜಯರಾಘವೇಂದ್ರರ ಕಾಂಬಿನೇಷನ್‍ನ ಪರದೇಶಿ ಕೇರಾಫ್ ಲಂಡನ್ ಚಿತ್ರದ ಚಿತ್ರದ ಬಹುತೇಕ ಮುಗಿದಿದ್ದು ನವೆಂಬರ್‍ನಲ್ಲಿ ತೆರೆಗೆ ಬರಲು ಅಣಿಯಾಗಿದ್ದು ಮೊನ್ನೆ ಚಿತ್ರದ ಧ್ವನಿಸುರುಳಿ ಬಿಡುಗಡೆ ನೆರವೇರಿತು. ಚಲನಚಿತ್ರ ವಾಣಿಜ್ಯಮಂಡಳಿ ಅಧ್ಯಕ್ಷ ಎಸ್.ಎ. ಚಿನ್ನೇಗೌಡ, ಬಾ.ಮಾ.ಹರೀಶ್, ಡ್ಯಾನಿಕುಟ್ಟಪ್ಪ, ಸುನಿಲ್‍ಕುಮಾರ್, ಲಹರಿವೇಲು ಹಾಗೂ ನಟಿ ಪ್ರಣೀತಾ ಮತ್ತಿತರರು ಧ್ವನಿಸುರುಳಿ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಕೋರಿದರು.ನಿರ್ದೇಶಕ ರಾಜಶೇಖರ್ ಮಾತನಾಡಿ, ಚಿತ್ರಕ್ಕೆ 45 ದಿನಗಳಲ್ಲೇ ಚಿತ್ರೀಕರಣ ಮುಗಿಸಿದ್ದೇವೆ, ರಾಘು ಹಾಗೂ ನನ್ನ ಕಾಂಬಿನೇಷನ್ ಎರಡನೇ ಚಿತ್ರ ಇದಾಗಿದ್ದು, ಪರದೇಸಿ ಎಂದರೆ ವಿದೇಶದಿಂದ ಬಂದವನು ಮತ್ತು ದಿಕ್ಕುದಿಸೆ ಇಲ್ಲದವನು ಎಂಬ ಅರ್ಥ ಬರುತ್ತದೆ, ಆದರೆ ನಮ್ಮ ಚಿತ್ರದ ನಾಯಕ ಪರದೇಶದಿಂದ ಬಂದವನೇ ಹೊರತು, ದಿಕ್ಕುದೆಸೆ ಇಲ್ಲದವನಲ್ಲ ಚಿತ್ರಕ್ಕೆ ಮೈಸೂರು, ಪಾಂಡವಪುರ, ಸಿರಗುಪ್ಪದಲ್ಲಿ ಚಿತ್ರೀಕರಣ ಮಾಡಿ ಎಂದರು.

ನಿರ್ಮಾಪಕ ಬದರಿನಾರಾಯಣ್ ಮಾತನಾಡಿ, ವಿಜಯರಾಘವೇಂದ್ರ ಅವರು ಈ ಚಿತ್ರದಲ್ಲಿ ನಟಿಸಲು ಒಪ್ಪದಿದ್ದರೆ ಚಿತ್ರವನ್ನು ಕೈಬಿಡುತ್ತಿದ್ದೇವೆ, ಆದರೆ ಅವರು ನಮಗೆ ಸಹಕಾರ ನೀಡಿದರು, ಈ ಚಿತ್ರವನ್ನು ಮೊದಲು ಕನ್ನಡ ಹಾಗೂ ತೆಲುಗಿನಲ್ಲಿ ನಿರ್ಮಿಸಬೇಕೆಂದು ಅಂದುಕೊಂಡಿದ್ದೆವಾದರೂ ಕನ್ನಡಕ್ಕೆ ಮೊದಲ ಆದ್ಯತೆ ನೀಡಬೇಕೆಂದುಕೊಂಡೆವು ಎಂದರು.

ನಟ ವಿಜಯರಾಘವೇಂದ್ರ ಮಾತನಾಡಿ, ನಾನು ನಟಿಸಿರುವ ಈ ಚಿತ್ರದ ಧ್ವನಿಸುರುಳಿಯನ್ನು ನಮ್ಮ ತಂದೆಯವರೇ ಬಿಡುಗಡೆ ಮಾಡಿರುವುದು ತುಂಬಾ ಸಂತಸವಾಗುತ್ತಿದೆ, ಆದರೆ ಅವರ ಮುಂದೆ ಮಾತನಾಡಲು ಮುಜುಗರವಾಗುತ್ತದೆ. ಈ ಚಿತ್ರದ ಟೈಟಲ್‍ನಲ್ಲಿ ಎರಡು ಅರ್ಥವಿದೆ. ಹಣೇಬರಹದ ಪ್ರಕಾರ ಅದೃಷ್ಟ ಬದಲಾಗುವಂಥಹ ಕಥೆ ಹೊಂದಿರುವ ಈ ಚಿತ್ರಕ್ಕೆ ವೀರ್‍ಸಮರ್ಥ್ ತುಂಬಾ ಒಳ್ಳೇ ಸಂಗೀತವನ್ನು ನೀಡಿದ್ದಾರೆ ಎಂದರು.

ವೇದಿಕೆಯಲ್ಲಿದ್ದ ಲಹರಿ ವೇಲು ಮನ ಮೆಚ್ಚಿದ ಹುಡುಗಿ ಚಿತ್ರದ ಆಡಿಯೋ ಹಕ್ಕುಗಳನ್ನು ಲಹರಿ ಸಂಸ್ಥೆಗೆ ಕೊಡುವ ಮೂಲಕ ವಜ್ರೇಶ್ವರಿ ಸಂಸ್ಥೆಯ ನಂಟು ಆರಂಭವಾಗಲು ಚಿನ್ನೇಗೌಡರು ನೆರವಾಗಿದ್ದರು ಎಂದು ಹೇಳಿದರು.  ಚಿತ್ರದಲ್ಲಿ ನಾಲ್ಕು ಗೀತೆಗಳಿದ್ದು, ಕವಿರಾಜ್, ಯೋಗರಾಜ ಭಟ್, ಶಿವು ಬೆರಗಿ, ಡಾ|| ವಿ. ನಾಗೇಂದ್ರ ಪ್ರಸಾದ್, ಸಾಹಿತ್ಯ ರಚಿಸಿದ್ದು, ಶಂಶಾಕ್ ಶೇಷಗಿರಿ, ವಿಜಯಪ್ರಕಾಶ್, ರವೀಂದ್ರ ಸೊರಗಾವಿ, ಶಮಿತಾ ಮಲ್ನಾಡ್, ಅನುರಾಧ ಭಟ್, ಹೇಮಂತ್, ಗಂಗಮ್ಮ, ಚಿತ್ರಕ್ಕೆ ದನಿಗೂಡಿಸಿದ್ದಾರೆ. ಲಹರಿ ಆಡಿಯೋ ಮೂಲಕ ಚಿತ್ರದ ಹಾಡುಗಳು ಮಾರುಕಟ್ಟೆಗೆ ತಲುಪಿದೆ. ಚಿದಾನಂದ ಛಾಯಾಗ್ರಹಣ, ಥ್ರಿಲ್ಲರ್ ಮಂಜು ಸಾಹಸ, ಪತ್ರಕರ್ತ ವಿಜಯ್ ಭರಮಸಾಗರ ಸಂಭಾಷಣೆ, ಕಲೈ ಮಾಸ್ಟರ್ ನೃತ್ಯ ನಿರ್ದೇಶನ ಚಿತ್ರಕ್ಕಿದೆ.

ಈ ಚಿತ್ರದಲ್ಲಿ ವಿಜಯರಾಘವೇಂದ್ರಗೆ ನಾಯಕಿಯಾಗಿ ರಾಶಿ ಕಾಣಿಸಿಕೊಂಡಿದ್ದರೆ ರಂಗಾಯಣರಘು, ಶುಚೀಂದ್ರ ಪ್ರಸಾದ್, ತಬಲನಾಣಿ, ಪ್ರಶಾಂತ್ ಸಿದ್ದಿ, ಭಾಸ್ಕರ್, ಸಂಗೀತಾ, ಶೋಭರಾಜ್, ಪೆಟ್ರೋಲ್‍ಪ್ರಸನ್ನ ಮುಂತಾದವರು ನಟಿಸಿದ್ದಾರೆ. ನವೆಂಬರ್ ತಿಂಗಳಲ್ಲಿ ಬಿಡುಗಡೆಯಾಗಲಿರುವ ಪರದೇಶಿ ಕೇರಾಫ್ ಲಂಡನ್ ಚಿತ್ರ ಸಕ್ಸಸ್ ಕಂಡು ವಿಜಯರಾಘವೇಂದ್ರ ಹಾಗೂ ನಿರ್ದೇಶಕ ರಾಜಶೇಖರ್ ಅವರ ಕಾಂಬಿನೇಷನ್ ಮೂರನೇ ಚಿತ್ರ ಸೆಟ್ಟೇರುವಂತಾಗಲಿ.