Movie Review: ಕಳವು ಮಾಡುವ ನಿಮ್ಮ ವಸ್ತುಗಳಿಗೆ ನೀವೇ ಜವಾಬ್ದಾರರು!

ಚಿತ್ರ: ನಿಮ್ಮ ವಸ್ತುಗಳಿಗೆ ನೀವೇ ಜವಾಬ್ದಾರರು
ನಿರ್ದೇಶನ: ಕೇಶವ ಮೂರ್ತಿ
ನಿರ್ಮಾಪಕರು: ಪಿಚ್ಚರ್ ಶಾಪ್, ಮಹೇಶ್ ರವೀಂದ್ರನ್, ಕುಬೇಂದ್ರನ್
ತಾರಾಗಣ: ದಿಲೀಪ್ ರಾಜ್, ಶಿಲ್ಪಾ ಮಂಜುನಾಥ್, ಮಧುಸೂದನ್ ಗೋವಿಂದ್, ಅಪೂರ್ವ ಭಾರದ್ವಾಜ್ ಇತರರು
ರೇಟಿಂಗ್: 3.5

ಫೀಲಿಂಗ್ ಜೊತೆಗೆ ಕಳ್ಳತನದ ಕಥೆಗಳನ್ನು ಹೊಸ ಆಯಾಮದಲ್ಲಿ ಹೇಳುವ ಚಿತ್ರ ಈ ವಾರ ತೆರೆಗೆ ಬಂದಿರುವ ನಿಮ್ಮ ವಸ್ತುಗಳಿಗೆ ನೀವೇ ಜವಾಬ್ದಾರರು.

ಚಿತ್ರದಲ್ಲಿ ಹೊಸಬರು ಹಾಗೂ ಅನುಭವಿಗಳು ಸೇರಿಕೊಂಡು ಪ್ರೇಕ್ಷಕರಿಗೆ ತಾಜಾ ಮನೋರಂಜನೆ ನೀಡುವ ಯತ್ನವನ್ನು ಮಾಡಿದ್ದಾರೆ. ಇಲ್ಲಿ ಒಬ್ಬೊಬ್ಬರ ಕಳ್ಳತನದ ರೀತಿ ಒಂದೊಂದು ಬಗೆ ಇದೆ. ಕಳ್ಳತನದ ಹಲವು ಆಯಾಮಗಳ ಜೊತೆಗೆ ಇಲ್ಲಿ ಪ್ರೇಕ್ಷಕರಿಗೆ ಫೀಲಿಂಗ್ ಅನುಭವ ನೀಡುವ ಯತ್ನ ನಡೆದಿದೆ.

ಚಿತ್ರದಲ್ಲಿ ಮೂರು ಕಥೆಗಳು ಪ್ರಮುಖವಾಗಿ ಬರುತ್ತವೆ. ಮೊದಲ ಕಥೆಯಲ್ಲಿ ಕಾಮಿಡಿ, ಎರಡನೇ ಕಥೆಯಲ್ಲಿ ರೋಮಾನ್ಸ್, ಮೂರನೇ ಕಥೆಯಲ್ಲಿ ಸಸ್ಪೆನ್ಸ್, ಥ್ರಿಲ್ಲರ್ ಅಂಶಗಳು ಇವೆ. ಕಥೆಗಳು ಕಳ್ಳತನದ ಥೀಮ್ ಹೊಂದಿವೆ ಎನ್ನುವುದು ಬಿಟ್ಟರೆ ಇವುಗಳಿಗೆ ಪರಸ್ಪರ ಸಂಬಂಧ ಇಲ್ಲ. ಒಟ್ಟಾರೆ ಪ್ರೇಕ್ಷಕರಿಗೆ ಚಿತ್ರ ನೋಡಿದಾಗ ಒಂದು ಬಗೆಯ ಪೂರ್ಣ ಭಾವ ಆವರಿಸುತ್ತದೆ.

ಬೈಕ್ ಕದಿಯುವ ವ್ಯಕ್ತಿಯ ಪಾತ್ರದಲ್ಲಿ ಪ್ರಸನ್ನ ಶೆಟ್ಟಿ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ. ಲವ್ ಸ್ಟೋರಿಯ ಭಾಗದಲ್ಲಿ ಅಪೂರ್ವ ಭಾರದ್ವಾಜ್ ಮತ್ತು ಮಧುಸೂದನ್ ಗೋವಿಂದ್ ಚೆನ್ನಾಗಿ ನಟಿಸಿದ್ದಾರೆ. ಮನಸ್ಸು ಕದಿಯುವ ಕಳ್ಳರ ಪಾತ್ರದಲ್ಲಿ ಶಿಲ್ಪಾ ಮಂಜುನಾಥ್ ಹಾಗೂ ದಿಲೀಪ್ ರಾಜ್ ಗಮನ ಸೆಳೆಯುತ್ತಾರೆ.

ಚಿತ್ರದ ನಿರೂಪಣೆ, ಹಿನ್ನೆಲೆ ಸಂಗೀತ ಮನಸ್ಸಿಗೆ ಮುದ ನೀಡುತ್ತದೆ. ಸಂಗೀತದ ಮೂಲಕ ಪ್ರಸಾದ್ ಶೆಟ್ಟಿ ಗಮನ ಸೆಳೆಯುತ್ತಾರೆ. ಚಿತ್ರದ ಶೈಲಿ ಭಿನ್ನವಾದ ಕಾರಣ ಹೊಸ ಬಗೆಯ ಸಿನಿಮಾವನ್ನು ಸವಿಯುವ ಅವಕಾಶ ಪ್ರೇಕ್ಷಕರಿಗೆ ಸಿಕ್ಕಿದೆ.