ಅಲ್ಲು ಅರ್ಜುನ್ ನಟನೆಯ ಪುಷ್ಪ2 ಚಿತ್ರ ಡಿಸೆಂಬರ್ 5 ರಂದು ಬಿಡುಗಡೆ ಆಗುತ್ತಿದ್ದು, ಈ ಸಂದರ್ಭದಲ್ಲಿ ಬಿಡುಗಡೆ ಆಗುತ್ತಿರುವ ಚಿತ್ರಗಳಿಗೆ ನಡುಕ ಹುಟ್ಟಿಸಿದೆ.
‘ಮಿಸ್ ಯೂ’ :
ಪುಷ್ಪ2 ಚಿತ್ರದ ಬಿಡುಗಡೆ ದಿನಾಂಕ ಘೋಷಣೆ ಹಿನ್ನೆಲೆಯಲ್ಲಿ ಹಲವು ಚಿತ್ರ ಬಿಡುಗಡೆ ಮುಂದಕ್ಕೆ ಹೋಗಿದೆ. ಈ ನಡುವೆ ಸಿದ್ದಾರ್ಥ್ ನಟನೆಯ ‘ಮಿಸ್ ಯೂ ‘ ಚಿತ್ರ ನವೆಂಬರ್ 29ರಂದು ತೆಲುಗು ಹಾಗೂ ತಮಿಳುನಲ್ಲಿ ಬಿಡುಗಡೆಯಾಗುತ್ತಿದೆ.
ಚಿತ್ರದ ಬಿಡುಗಡೆ ಕುರಿತು ಮಾತನಾಡಿರುವ ಸಿದ್ಧಾರ್ಥ ಅವರು, ಪುಷ್ಪ 2 ಬಿಡುಗಡೆಯ ಬಗ್ಗೆ ನಾನು ಹೆದರುವುದಿಲ್ಲ. ಅದೆಲ್ಲಾ ನನ್ನ ನಿಯಂತ್ರಣದಲ್ಲಿಲ್ಲ. ಸಿನಿಮಾದ ಯಶಸ್ಸು ಬಿಗ್ ಬಜೆಟ್ ಎನ್ನುವ ಕಾರಣಕ್ಕೆ ನಿರ್ಧಾರ ಆಗುವುದಿಲ್ಲ. ಉತ್ತಮ ಸಿನಿಮಾ ಖಂಡಿತ ಚಿತ್ರಮಂದಿರದಲ್ಲಿ ಇರುತ್ತದೆ. ಜನರು ಬಂದು ನೋಡುತ್ತಾರೆ. ನನ್ನ ಚಿತ್ರಗಳು ಮೊದಲ ಒಂದು ವಾರ ಸಪ್ಪೆ ಅನಿಸಿದರೂ, ಆನಂತರ ಚಿತ್ರಮಂದಿರಗಳಲ್ಲಿ ಯಶಸ್ಸು ಕಂಡಿವೆ ಎಂದಿದ್ದಾರೆ.
ಮಿಸ್ ಯೂ ಸಿನಿಮಾವನ್ನು ರಾಜಶೇಖರ್ ನಿರ್ದೇಶಿಸುತ್ತಿದ್ದಾರೆ. ಇದೊಂದು ಕಾಮಿಡಿ ಆಕ್ಷನ್ ಡ್ರಾಮಾ ಚಿತ್ರ ಆಗಿದೆ. ಆಶಿಕಾ ರಂಗನಾಥ್ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.
ಧೀರ ಭಗತ್ ರಾಯ್ :
ಬಾಹುಬಲಿ ಚಿತ್ರದ ಎದುರು ರಂಗಿತರಂಗ ಗೆದ್ದಿತ್ತು. ಅದೇ ರೀತಿ ಪುಷ್ಪ2 ವಿರುದ್ಧ ನಮ್ಮ ಚಿತ್ರ ಗೆಲ್ಲಲಿದೆ. ನಮಗೆ ಥಿಯೇಟರ್ ಸಮಸ್ಯೆ ಆಗಲ್ಲ ಎಂದು ನಿರ್ದೇಶಕ ಕರ್ಣನ್ ಹೇಳಿದ್ದಾರೆ.
ಪುಷ್ಪ 2 ವಿತರಕರಿಗೆ ಧೀರ ಭಗತ್ ರಾಯ್ ತಂಡ ಖಡಕ್ ಎಚ್ಚರಿಕೆ ನೀಡಿದೆ. ರಂಗಿತರಂಗದ ಗೆಲುವು ಪುಷ್ಪ2 ಬಿಡುಗಡೆಯಂದೇ ಈ ಚಿತ್ರ ರಿಲೀಸ್ ಮಾಡಲು ಕಾರಣ ಎಂದು ಚಿತ್ರತಂಡ ಹೇಳಿಕೊಂಡಿದೆ.
ಅದ್ದೂರಿ ವೆಚ್ಚದ, ಬಹು ತಾರಾಗಣದ ಪುಷ್ಪ2 ಚಿತ್ರದ ಬಿಡುಗಡೆ ಕಾರಣದಿಂದ ಹಲವು ಚಿತ್ರಗಳು ಚಿತ್ರಮಂದಿರಗಳಿಗೆ ಬರಲು ಹೆದರುತ್ತಿವೆ.
_
Be the first to comment