‘ಲವ್ ಯೂ ರಚ್ಚು’ ಮೆಲೋಡಿ ಸಾಂಗ್ ರಿಲೀಸ್

ನಿರಂತರ ವಿವಾದದ ಮೂಲಕ ಸದ್ದು ಮಾಡುತ್ತಿರುವ ʼಲವ್ ಯೂ ರಚ್ಚುʼ ಸಿನಿಮಾದ ಮೆಲೋಡಿ ಸಾಂಗ್ ‘ ನೋಡುತಾ ನನ್ನನೇ ‘ ಇಂದು ರಿಲೀಸ್ ಆಗಿದೆ.

ಅನುರಾಧಾ ಭಟ್ ಅವರ ಧ್ವನಿಯಲ್ಲಿ ಮೂಡಿಬಂದಿರುವ ಹಾಡು ಬಿಡುಗಡೆ ಆದ 1 ಗಂಟೆಯ ಒಳಗೆ 12 ಸಾವಿರಕ್ಕೂ ಹೆಚ್ಚು ವೀಕ್ಷಣೆ ಪಡೆದು ಮೆಚ್ಚುಗೆ ಪಡೆದಿದೆ. ಪುನೀತ್ ಆರ್ಯ ಅವರು ಬರೆದಿರುವ ಹಾಡಿಗೆ ಮಣಿಕಾಂತ್ ಕದ್ರಿ ಅವರು ಸಂಗೀತ ಸಂಯೋಜನೆ ಮಾಡಿದ್ದಾರೆ.

ಕೆಲ ದಿನಗಳ ಹಿಂದೆ ಅಜಯ್‌ ರಾವ್‌ ಮತ್ತು ರಚಿತಾ ರಾಮ್‌ ಅಭಿನಯದ ʼ ಲವ್ ಯೂ ರಚ್ಚುʼ ಚಿತ್ರದ ಟ್ರೈಲರ್ ರಿಲೀಸ್ ಆಗಿತ್ತು. ಟ್ರೈಲರ್ ನಲ್ಲಿ ಪ್ರೀತಿಯ ಜೊತೆಗೆ ಕೊಲೆ, ಸಸ್ಪೆನ್ಸ್ ಇದ್ದು ಕುತೂಹಲ ಮೂಡಿಸುವಲ್ಲಿ ಯಶಸ್ವಿಯಾಗಿದೆ.

ಜಿ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ಗುರು ದೇಶಪಾಂಡೆ ನಿರ್ಮಿಸುತ್ತಿರುವ “ಲವ್‌ ಯು ರಚ್ಚು’ ಚಿತ್ರಕ್ಕೆ ಶಂಕರ್‌ ಎಸ್‌. ರಾಜ್‌ ನಿರ್ದೇಶನ ಇದೆ. “ಕೃಷ್ಣನ್‌ ಲವ್‌ಸ್ಟೋರಿ’, “ಕೃಷ್ಣಲೀಲಾ’ ಸಿನಿಮಾಗಳ ಸಕ್ಸಸ್‌ ನಂತರ ನಿರ್ದೇಶಕ ಶಶಾಂಕ್‌, ನಟ ಅಜೇಯ್‌ ರಾವ್‌ ಅವರಿಗಾಗಿಯೇ ಮಾಡಿಕೊಂಡಿದ್ದ ಕಥೆ ಇದಾಗಿದ್ದು, “ಲವ್‌ ಯು ರಚ್ಚು’ ಚಿತ್ರಕ್ಕೆ ಶಶಾಂಕ್‌ ಕಥೆಯ ಜೊತೆಗೆ ಚಿತ್ರಕಥೆ, ಸಂಭಾಷಣೆ ಬರೆದಿದ್ದಾರೆ. ಶ್ರೀಕ್ರೇಜಿ ಮೈಂಡ್ಸ್‌ ಛಾಯಾಗ್ರಹಣ ಮತ್ತು ಸಂಕಲನ ಚಿತ್ರಕ್ಕಿದೆ.

ಲವ್‌ ಯು ರಚ್ಚು’ ಚಿತ್ರ ಡಿ.31ಕ್ಕೆ ತೆರೆಗೆ ಬರುತ್ತಿದೆ. ಈ ದಿನ ಪ್ರಜ್ವಲ್ ದೇವರಾಜ್ ನಟನೆಯ ʼಅರ್ಜುನ್ ಗೌಡʼ, ಯೋಗಿ ನಟನೆಯ ‘ಒಂಬತ್ತನೇ ದಿಕ್ಕು’, ದಿಗಂತ್ ನಟನೆಯ ʼ ಹುಟ್ಟುಹಬ್ಬದ ಶುಭಾಶಯಗಳುʼ ಚಿತ್ರಗಳು ಸಹ ತೆರೆಗೆ ಬರುತ್ತಿವೆ. ಚಿತ್ರದ ಶೂಟಿಂಗ್ ವೇಳೆ ಸ್ಟಂಟ್ ಮಾಸ್ಟರ್ ಸಾವು, ನಿರ್ಮಾಪಕ ಗುರುದೇಶಪಾಂಡೆ ಹಾಗೂ ನಾಯಕ ನಟ ಅಜಯ್ ರಾವ್ ನಡುವಣ ಮನಸ್ತಾಪ ಸೇರಿದಂತೆ ಹಲವಾರು ವಿವಾದಗಳನ್ನು ‘ಲವ್ ಯೂ ರಚ್ಚು’ ಚಿತ್ರ ಮೈಮೇಲೆ ಎಳೆದುಕೊಂಡಿದೆ. ವಿವಾದಗಳಿಗೆ ಕಾರಣವಾಗಿರುವ ಚಿತ್ರವನ್ನು ಪ್ರೇಕ್ಷಕರು ಯಾವ ರೀತಿ ಇಷ್ಟಪಡುತ್ತಾರೆ ಎನ್ನುವುದಕ್ಕೆ ಡಿಸೆಂಬರ್ 31ರಂದು ಉತ್ತರ ಸಿಗಲಿದೆ.
___