ಸಿನಿಮಾ ಪ್ರಚಾರಕ್ಕೆ ಅಭಿಮಾನಿಗಳ ನೆರವು ಕೋರಿದ ಕೆಜಿಎಫ್ 2 ತಂಡ

ಕೆಜಿಎಫ್ 2 ಪ್ರಚಾರ ಸಂಬಂಧ ನಿರ್ಮಾಪಕ ವಿಜಯ್ ಕಿರಗಂದೂರು ಅಭಿಮಾನಿಗಳಿಗೆ ಬಹಿರಂಗ ಪತ್ರವೊಂದನ್ನು ಬರೆದಿದ್ದು, ಸಿನಿಮಾದ ಪ್ರಚಾರಕ್ಕೆ ಅಭಿಮಾನಿಗಳ ಸಹಕಾರ ಕೋರಿದ್ದಾರೆ.

“ಭಾರತೀಯ ಸಿನಿಮಾ ಚರಿತ್ರೆಯಲ್ಲಿ ಮೊದಲ ಬಾರಿಗೆ ನಾವು ನಮ್ಮ ಸಿನಿಮಾದ ಪ್ರಚಾರವನ್ನು ನಿಮ್ಮದೇ ಕಲಾಕೃತಿಗಳ ಮೂಲಕ ಮಾಡಲಿದ್ದೇವೆ. ಸಿನಿಮಾದ ಬಗ್ಗೆ ನೀವು ಕಳಿಸುವ ಚಿತ್ರಗಳನ್ನೇ ನಾವು ದೊಡ್ಡ ಹೋರ್ಡಿಂಗ್‌ಗಳಾಗಿ ದೇಶದೆಲ್ಲೆಡೆ ಹಾಕಲಿದ್ದೇವೆ” ಎಂದು ವಿಜಯ್ ಕಿರಗಂದೂರು ಹೇಳಿದ್ದಾರೆ.

ಅಭಿಮಾನಿಗಳು ಬರೆದು ಕಳಿಸುವ ‘ಕೆಜಿಎಫ್ 2’ ಸಿನಿಮಾದ ವಿವಿಧ ಬಗೆಯ ಚಿತ್ರಗಳನ್ನೇ ದೊಡ್ಡ ದೊಡ್ಡ ಹೋಲ್ಡಿಂಗ್‌ಗಳಾಗಿ ಚಿತ್ರತಂಡ ಬಳಸಿಕೊಳ್ಳಲಿದೆ. ಕೆಲವು ದಿನಗಳ ಹಿಂದಷ್ಟೆ ಮುಂಬೈನ ದೊಡ್ಡ ಬಹುಮಹಡಿ ಕಟ್ಟಡದ ಮೇಲೆ ‘ಕೆಜಿಎಫ್ 2’ ಸಿನಿಮಾದ ಪೋಸ್ಟರ್‌ ಹಾಕಲಾಗಿತ್ತು. ದೇಶದೆಲ್ಲೆಡೆ ಬೃಹತ್ ಪೋಸ್ಟರ್‌, ಹೋರ್ಡಿಂಗ್ ಗಳನ್ನು ಚಿತ್ರತಂಡ ಹಾಕಲಿದೆ. ಅಭಿಮಾನಿಗಳು ಬರೆದ ಚಿತ್ರಗಳೇ ಆ ಹೋರ್ಡಿಂಗ್ ಗಳಲ್ಲಿ ಇರಲಿವೆ.

‘ಕೆಜಿಎಫ್ 2’ ಸಿನಿಮಾ ಏಪ್ರಿಲ್ 14 ರಂದು ಬಿಡುಗಡೆ ಆಗಲಿದೆ. ಸಿನಿಮಾದಲ್ಲಿ ಸಂಜಯ್ ದತ್ ವಿಲನ್ ಆಗಿ ನಟಿಸಿದ್ದಾರೆ. ರವೀನಾ ಟಂಡನ್, ಪ್ರಕಾಶ್ ರೈ, ರಾವ್ ರಮೇಶ್ ಇನ್ನೂ ಹಲವರು ‘ಕೆಜಿಎಫ್ 2’ ಸಿನಿಮಾದಲ್ಲಿ ನಟಿಸಿದ್ದಾರೆ. ನಿನ್ನೆ ಸಿನಿಮಾದ ‘ತೂಫಾನ್’ ಹಾಡು ಬಿಡುಗಡೆ ಆಗಿದ್ದು, ಬಿಡುಗಡೆ ಆದ ಕೆಲವೇ ಗಂಟೆಗಳಲ್ಲಿ ಅತಿ ಹೆಚ್ಚು ನೋಡಲ್ಪಟ್ಟ ಹಾಡೆಂಬ ದಾಖಲೆ ಬರೆದಿದೆ.

ಮಾರ್ಚ್​ 27ರಂದು ಸಿನಿಮಾದ ಟ್ರೇಲರ್ ರಿಲೀಸ್​ ಮಾಡುವ ಬಗ್ಗೆ ಚಿತ್ರತಂಡ ಈಗಾಗಲೇ ಘೋಷಣೆ ಮಾಡಿದೆ. ಭುವನ್‌ ಗೌಡ ಕ್ಯಾಮೆರಾ ಈ ಚಿತ್ರಕ್ಕಿದೆ.

ಕೆಜಿಎಫ್: ಚಾಪ್ಟರ್ 2ನ್ನು ಏಪ್ರಿಲ್ 13ರಂದು ಪ್ರೀಮಿಯರ್‌ ಶೋ ನಡೆಸುವುದಾಗಿ ತಿಳಿಸಲಾಗಿದೆ. ಪ್ರೀಮಿಯರ್ ಶೊ ಉತ್ತರ ಅಮೇರಿಕಾದಲ್ಲಿ ನಡೆಯಲಿದೆ. ಈ ಕುರಿತು ಮಾಹಿತಿ ನೀಡಿರುವ ಹೊಂಬಾಳೆ ಫಿಲ್ಸ್ಮ್​, ‘ಉತ್ತರ ಅಮೆರಿಕ ನಾನು ಬರುತ್ತಿದ್ದೇನೆ. ಸಿಡಿಲಿನ ಅನುಭವ ಪಡೆಯಲು ತಯಾರಾಗಿ’ ಎಂದು ಟ್ವೀಟ್ ಮಾಡಿದೆ. ದಕ್ಷಿಣ ಭಾರತದಲ್ಲಿ ಪ್ರೀಮಿಯರ್ ಶೋವನ್ನು ಸರೆಗಮ ಸಿನಿಮಾಸ್ ಆಯೋಜನೆ ಮಾಡಲಿದೆ.

ಕೆಜಿಎಫ್ ಚಾಪ್ಟರ್ 2 ಚಿತ್ರದಲ್ಲಿ ಯಶ್​ಗೆ ನಾಯಕಿಯಾಗಿ ಶ್ರೀನಿಧಿ ಶೆಟ್ಟಿ ಕಾಣಿಸಿಕೊಂಡಿದ್ದಾರೆ.
__