ಕನ್ನಡದಲ್ಲೂ ಬರುತ್ತಿದೆ ‘ಧೂಮ್’ ಚಿತ್ರ..!

ಬಾಲಿವುಡ್‍ನಲ್ಲಿ ಕಲೆಕ್ಷನ್‍ನಲ್ಲಿ ದಾಖಲೆ ಮಾಡಿರುವ ಧೂಮ್ ಚಿತ್ರದ ಪ್ರಭಾವದಿಂದಲೋ ಏನೋ ನಿರ್ದೇಶಕ ರಾಜೇಶ್ ವರ್ಮಾ ಅವರು ಸ್ಯಾಂಡಲ್‍ವುಡ್‍ನಲ್ಲಿ ಧೂಮ್ ಚಿತ್ರ ನಿರ್ದೇಶಿಸಲು ಹೊರಟಿದ್ದಾರೆ. ಬಾಲಿವುಡ್ ರೇಂಜಿನಲ್ಲೇ ಈ ಚಿತ್ರವನ್ನು ತೆರೆಗೆ ತರಬೇಕೆಂದು ಯೋಚಿಸಿರುವ ನಿರ್ಮಾಪಕ ಮುನ್ನಾ ಅವರು ಇದಕ್ಕಾಗಿ 20 ಕೋಟಿ ವ್ಯಯಿಸಲು ನಿರ್ಧರಿಸಿದ್ದಾರೆ.

ನಾಲ್ವರು ಹುಡುಗರು ಹಾಗೂ ಇಬ್ಬರು ಹುಡುಗಿಯರ ನಡುವೆ ನಡೆಯುವ ಈ ಧೂಮ್ ಚಿತ್ರದ ಪತ್ರಿಕಾಗೋಷ್ಠಿಯನ್ನು ಮೊನ್ನೆ ಹಮ್ಮಿಕೊಳ್ಳಲಾಗಿದ್ದು, ಹೈದರಾಬಾದ್ ಮೂಲದ ಮಾಡಲ್ ಪಾಟಲಿ ಹೊರತುಪಡಿಸಿದರೆ ಎಲ್ಲಾ ನಾಯಕ, ನಾಯಕಿಯರು ಹಾಜರಿದ್ದರು, ಅವರ ಪರಿಚಯ ಮಾಡಿಕೊಟ್ಟ ನಿರ್ದೇಶಕರು ಮುಂದಿನ ಪತ್ರಿಕಾಗೋಷ್ಠಿಗೆ ಪಾಟಲಿ ಬರುತ್ತಾರೆ ಎಂದರು.

ನಿರ್ಮಾಪಕ ಮುನ್ನಾ ಮಾತನಾಡಿ, ನನಗೆ ಹೊಸಬರ ತಂಡದ ಮೇಲೆ ಭರವಸೆ ಇದೆ, ಈ ಚಿತ್ರದಲ್ಲಿ ಕ್ಯಾನ್ಸರ್ ರೋಗಿಗಳ ವಿಷಯವಿದ್ದು, ಬೈಕ್ ರೇಸ್ ಹಾಗೂ ಆ್ಯಕ್ಷನ್‍ಗಳಿದ್ದು ಪ್ರೇಕ್ಷಕರನ್ನು ರಂಜಿಸಲಿದೆ ಎಂದರು. ನಿರ್ದೇಶಕ ರಾಜೇಶ್‍ವರ್ಮಾ ಮಾತನಾಡಿ, ಯುವಜನರ ಆಶಯವೇನು ಎಂದು ಹೇಳಲು ಹೊರಟಿರುವ ಈ ಚಿತ್ರಕ್ಕಾಗಿ ಮುಂಬೈ, ಬೆಂಗಳೂರು, ಟರ್ಕಿ ದೇಶಗಳಲ್ಲಿ ಚಿತ್ರೀಕರಣ ಮಾಡಿದ್ದೇವೆ ಎಂದರು.  ಸಂಗೀತ ನಿರ್ದೇಶಕ ಗುರುಕಿರಣ್ ಮಾತನಾಡಿ, ಹೊಸಬರ ತಂಡದಲ್ಲಿ ಕ್ಲಾಸ್ ಇದೆ. ಈ ಚಿತ್ರದಲ್ಲಿ ಒಟ್ಟು ಆರು ಹಾಡು ಹಾಗೂ ಒಂದು ರಿಮಿಕ್ಸ್ ಇದೆ. ಕಥೆಯು ತುಂಬಾ ಚೆನ್ನಾಗಿದೆಯಾದರೂ ಸ್ಟಾರ್ ನಟರುಗಳಿಗೆ ಒಪ್ಪುವುದಿಲ್ಲವಾದ್ದರಿಂದ ಹೊಸಬರೇ ಈ ಚಿತ್ರಕ್ಕಾಗಿ ಹಾಕಿಕೊಂಡಿದ್ದೇವೆ. ಮುಂಬೈನ ಒಬ್ಬ ಸ್ಟಾರ್ ಅನ್ನು ಕರೆತರುವ ಚಿಂತೆಯಲ್ಲಿ ನಿರ್ಮಾಪಕರಿದ್ದು, ಹೊಸಬರ ತಂಡದೊಂದಿಗೆ ಕೆಲಸ ಮಾಡಿದ ಅನುಭವ ಚೆನ್ನಾಗಿದೆ ಎಂದರು.

ಕೆ.ಎಂ.ಪ್ರಕಾಶ್ ಸಂಕಲನ, ರವಿವರ್ಮ, ಡಿಫರೆಂಟ್ ಡ್ಯಾನಿ ಸಾಹಸ ಈ ಚಿತ್ರಕ್ಕಿದೆ. ಕ್ಯಾನ್ಸರ್ ಕಾಯಿಲೆಯಿಂದ ನಾಯಕನ ತಂಗಿ ಆಸುನೀಗಿದ ನಂತರ ನಾಯಕನ ಗೆಳೆಯರು ಸಮಾಜದಲ್ಲಿ ಕಷ್ಟದಲ್ಲಿರುವವರಿಗೆ ಯಾವ ರೀತಿ ಸಹಾಯ ಮಾಡುತ್ತಾರೆ ಎಂಬುದನ್ನು ನೋಡಲು ಧೂಮ್ ಚಿತ್ರ ಬೆಳ್ಳಿತೆರೆಗೆ ಬರುವವರೆಗೂ ಕಾಯಲೇಬೇಕು.