ಕಂಗನಾ ರಣಾವತ್ ರಾಜಕೀಯ ಪ್ರವೇಶ!?

ಬಾಲಿವುಡ್  ಕಂಗನಾ ರಣಾವತ್ ರಾಜಕೀಯ ರಂಗ ಪ್ರವೇಶಿಸಲಿದ್ದಾಳೆಯೇ..?

ಸಂದರ್ಶನವೊಂದರಲ್ಲಿ ಈ ನಟಿ ನೀಡಿರುವ ಉತ್ತರ ನೋಡಿದರೆ ಮುಂದೊಂದು ದಿನ ಈಕೆ ರಾಜಕಾರಣಿಯಾದರೂ ಅಚ್ಚರಿ ಇಲ್ಲ. ದೇಶವನ್ನು ಕಾಡುತ್ತಿರುವ ಜ್ವಲಂತ ಸಮಸ್ಯೆಗಳು, ಗಂಭೀರ ಪ್ರಕರಣಗಳು ಹಾಗೂ ಪ್ರಚಲಿತ ವಿದ್ಯಮಾನಗಳ ಬಗ್ಗೆ ಕಂಗನಾ ಆಗಾಗ ಮಾತನಾಡುವುದು ಹೊಸದೇನಲ್ಲ. ರಾಜಕೀಯ ರಂಗದ ಬಗ್ಗೆಯೂ ಈಕೆ ಕೆಲವೊಮ್ಮೆ ಪ್ರಸ್ತಾಪಿಸಿದ್ದಾಳೆ. ಸಿಡಿಗುಂಡಿನಂಥ ನಟಿ ನೀಡುತ್ತಿರುವ ಹೇಳಿಕೆ ಮತ್ತು ವ್ಯಕ್ತಪಡಿಸುತ್ತಿರುವ ಅಭಿಪ್ರಾಯಗಳನ್ನು ಗಮನಿಸಿ ಕೆಲವರು ಓಹೋ.. ಈಕೆ ಮೊದಲೇ ಜಗಳಗಂಟಿ..

ರಾಜಕೀಯಕ್ಕೆ ಸರಿಯಾಗಿದ್ದಾಳೆ ಎಂದು ಉದ್ಗರಿಸಿದ್ದಾರೆ. ಇದಕ್ಕೆ ಇಂಬು ನೀಡುವಂತೆ ಕಂಗನಾ ವಿಶೇಷ ಸಂದರ್ಶನವೊಂದರಲ್ಲಿ ರಾಜಕೀಯ ರಂಗ ಪ್ರವೇಶದ ಬಗ್ಗೆ ಸಕರಾತ್ಮಕವಾಗಿ ಮಾತನಾಡಿದ್ದಾಳೆ.
ನೀವು ರಾಜಕೀಯದಲ್ಲಿ ಸಕ್ರಿಯವಾಗಲು ಬಯಸುವಿರಾ ಎಂಬ ಪಶ್ನೆಗೆ ಕಂಗನಾ ಉತ್ತರಿಸಿದ್ದು : ನಾನು ಈಗ ರಾಜಕಾರಣ ಪ್ರವೇಶಿಸುವುದಕ್ಕೆ ನನ್ನ ವಯಸ್ಸು ತುಂಬಾ ಚಿಕ್ಕದ್ದು. ಆದರೆ ನಾನು ದೇಶ ಸೇವೆಗಾಗಿ ಈ ಕ್ಷೇತ್ರವನ್ನು ಮುಂದೆ ಆಯ್ಕೆ ಮಾಡಿಕೊಳ್ಳಬಹುದು. ಯೋಧರು ಸೇನೆಗೆ ಸೇರಿ ದೇಶ ರಕ್ಷಿಸುತ್ತಾರೆ. ಅದೇ ರೀತಿ ದೇಶ ಸೇವೆಗಾಗಿ ನಾನು ರಾಜಕೀಯ ಪ್ರವೇಶಿಸಲು ಇಚ್ಚಿಸುತ್ತೇನೆ.

ಭಾರತದ ವೀರಾಗ್ರಣಿ ಝಾನ್ಸಿ ರಾಣಿ ಲಕ್ಷ್ಮೀಬಾಯಿ ಜೀವನ ಚರಿತ್ರೆ ಆಧರಿತ ಮಣಿಕರ್ಣಿಕಾ: ದಿ ಕ್ವೀನ್ ಆಫ್ ಝಾನ್ಸಿ ಸಿನಿಮಾದಲ್ಲಿ ಕಂಗನಾ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾಳೆ. ಈ ಸಿನಿಮಾ ಬಿಡುಗಡೆಗೆ ಮುನ್ನವೇ ಭರ್ಜರಿ ಸುದ್ದಿಯ ಸದ್ದು ಮಾಡುತ್ತಿದೆ. ಮುಂದಿನ ವರ್ಷ ಜನವರಿ 25ರಂದು ಬಿಡುಗಡೆಯಾಗಲಿರುವ ಈ ಸಿನಿಮಾ ಇಬ್ಬರು ಸೂಪರ್‍ಸ್ಟಾರ್‍ಗಳಾದ ಶಾರುಕ್ ಖಾನ್(ಝೀರೋ) ಹಾಗೂ ಹೃತಿಕ್ ರೋಷನ್ (ಸೂಪರ್ 30) ಚಿತ್ರಗಳಿಗೆ ಸಡ್ಡು ಹೊಡೆಯಲಿದೆ.