ಜ.21ಕ್ಕೆ ಗರುಡ ತೆರೆಗೆ

ಧನ ಕುಮಾರ್ ನಿರ್ದೇಶನದ ಗರುಡ ಚಿತ್ರ ಮುಂದಿನ ವರ್ಷದ ಜನವರಿ 21ರಂದು ಚಿತ್ರಮಂದಿರಗಳಲ್ಲಿ ತೆರೆಗೆ ಬರಲಿದೆ.

ಈ ಆಕ್ಷನ್ ಚಿತ್ರವನ್ನು ಡಿಕೆ ರಾಜ ರೆಡ್ಡಿ, ಕಿಶೋರ್ ಅವರು ಆರೆಂಜ್ ಪಿಕ್ಸೆಲ್ಸ್ ಬ್ಯಾನರ್ ನಲ್ಲಿ ನಿರ್ಮಾಣ ಮಾಡಿದ್ದಾರೆ. ಚಿತ್ರದಲ್ಲಿ ಸಿದ್ದಾರ್ಥ್ ಮಹೇಶ್, ಶ್ರೀನಗರ ಕಿಟ್ಟಿ, ಐಂದ್ರಿತಾ ರೇ, ಆಶಿಕಾ ರಂಗನಾಥ್ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಆದಿ ಲೋಕೇಶ್, ರಂಗಾಯಣ ರಘು, ಮೈಕೋ ನಾಗರಾಜ್, ರಘು ದೀಕ್ಷಿತ್, ರಾಜೇಶ್ ನಟರಂಗ, ರವಿಶಂಕರ್ ಗೌಡ ತಾರಾಗಣದಲ್ಲಿ ಇದ್ದಾರೆ.

2017ರಲ್ಲಿ ಗರುಡ ಚಿತ್ರದ ಮಹೂರ್ತ ನೆರವೇರಿತ್ತು. ಚಿತ್ರದ ಟ್ರೈಲರ್ ಈ ಹಿಂದೆಯೇ ಬಿಡುಗಡೆ ಆಗಿದೆ. ಸಿನಿಮಾ ದೊಡ್ಡ ಕಂಟೆಂಟ್, ಹೆಚ್ಚು ಲೊಕೇಶನ್, ದೊಡ್ಡ ತಾರಾಗಣ ಹೊಂದಿದೆ. ಇದು ಸಿದ್ದಾರ್ಥ್ ಮಹೇಶ್ ಅವರ ಎರಡನೆಯ ಚಿತ್ರ ಆಗಿದೆ.
ಸ್ವತಂತ್ರ ನೃತ್ಯ ನಿರ್ದೇಶಕರಾಗಿ ಕೆಲಸ ಮಾಡಿರುವ ಧನ ಕುಮಾರ್ ಅವರು ಕಥೆ, ಚಿತ್ರಕಥೆ ಬರೆಯುವ ಜೊತೆಗೆ ಗರುಡ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಚಿತ್ರದಲ್ಲಿ ಶ್ರೀನಗರ ಕಿಟ್ಟಿ ಅವರು ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರೆ. ನಟಿ ಐಂದ್ರಿತಾ ರೇ ಅವರು ಕಾಲೇಜು ಹುಡುಗಿಯ ಪಾತ್ರವನ್ನು ಮಾಡಿದ್ದಾರೆ. ಆದಿ ಲೋಕೇಶ್ ವಿಲನ್ ಪಾತ್ರ ಮಾಡಿದ್ದಾರೆ.

ರಘು ದೀಕ್ಷಿತ್ ಅವರು ನಟನೆಯ ಜೊತೆಗೆ ಚಿತ್ರಕ್ಕೆ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಭಜರಂಗಿ ಖ್ಯಾತಿಯ ಜೈ ಆನಂದ ಅವರು ಛಾಯಾಗ್ರಾಹಕರಾಗಿ ಕೆಲಸ ಮಾಡಿದ್ದಾರೆ.

ನಾಯಕ ನಟ ಸಿದ್ಧಾರ್ಥ್ ಮಹೇಶ್ ಅವರು ಮೂರು ಶೇಡ್ ನಲ್ಲಿ ಕಾಣಿಸಿಕೊಂಡಿದ್ದಾರೆ. ಸುಂದರವಾದ ಕುಟುಂಬದಲ್ಲಿ ಆಕಸ್ಮಿಕವಾಗಿ ನಡೆಯುವ ಘಟನೆಯೊಂದು ಮನೆಯ ಜವಾಬ್ದಾರಿ ಹೊತ್ತ ಹುಡುಗನ ಜೀವನವನ್ನು ಹೇಗೆ ಬದಲಾಯಿಸುತ್ತದೆ ಎನ್ನುವ ಚಿತ್ರದ ಕಥೆಯನ್ನು ಸಿನಿಮಾ ಹೊಂದಿದೆ ಎಂದು ನಿರ್ದೇಶಕ ಧನ ಕುಮಾರ್ ಹೇಳಿದ್ದಾರೆ.
___