ನ. 21 ರಂದು ‘ಫುಲ್ ಮೀಲ್ಸ್’ ಬಿಡುಗಡೆ

ಲಿಖಿತ್ ಶೆಟ್ಟಿ ನಟನೆಯ ರೊಮ್ಯಾಂಟಿಕ್ ಕಾಮಿಡಿ ಚಿತ್ರ ‘ಫುಲ್ ಮೀಲ್ಸ್’  ನವೆಂಬರ್ 21 ರಂದು ರಾಜ್ಯದಾದ್ಯಂತ ಚಿತ್ರಮಂದಿರಗಳಲ್ಲಿ ತೆರೆಗೆ ಬರಲಿದೆ.

ಸಂಕಷ್ಟಹರ ಗಣಪತಿ ಮತ್ತು ಫ್ಯಾಮಿಲಿ ಪ್ಯಾಕ್ ಚಿತ್ರಗಳಿಗೆ ಹೆಸರುವಾಸಿಯಾದ ಲಿಖಿತ್ ಶೆಟ್ಟಿ ಛಾಯಾಗ್ರಾಹಕನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ‘ದಿಯಾ’  ಖ್ಯಾತಿಯ ಖುಷಿ ರವಿ ವಧುವಿನ ಪಾತ್ರದಲ್ಲಿ ನಟಿಸಿದ್ದಾರೆ. ತೇಜಸ್ವಿನಿ ಶರ್ಮಾ ಮೇಕಪ್ ಕಲಾವಿದೆಯಾಗಿ ಕಾಣಿಸಿಕೊಂಡಿದ್ದಾರೆ. ಇದೊಂದು ತ್ರಿಕೋನ ಪ್ರೇಮಕಥೆಯಾಗಿದೆ.

ನಿರ್ದೇಶಕ ಎನ್ ವಿನಾಯಕ್ ಅವರ ‘ಫುಲ್ ಮೀಲ್ಸ್’ ಚಿತ್ರ ಪ್ರೀ-ವೆಡ್ಡಿಂಗ್‌ ಶೂಟ್‌ಗಾಗಿ ಪ್ರಯಾಣಿಸುವ ಫೋಟೊಗ್ರಾಫರ್ ಸುತ್ತ ಸುತ್ತುತ್ತದೆ.  ವಧು, ಫೋಟೊಗ್ರಾಫರ್ ಬಗ್ಗೆ ಭಾವನೆಗಳನ್ನು ಬೆಳೆಸಿಕೊಳ್ಳುತ್ತಾಳೆ. ಈ ಸನ್ನಿವೇಶಗಳನ್ನು ಹಾಸ್ಯ ಮತ್ತು ಭಾವನೆಗಳ ಸಮತೋಲನದೊಂದಿಗೆ ತೆರೆ ಮೇಲೆ ತರಲಾಗಿದೆ.

ಲಿಖಿತ್ ಶೆಟ್ಟಿ ಚಿತ್ರಕ್ಕೆ ನಿರ್ಮಾಪಕರಾಗಿದ್ದಾರೆ. ರಂಗಾಯಣ ರಘು, ಸೂರಜ್ ಲೋಕ್ರೆ, ವಿಜಯ್ ಚೆಂಡೂರ್, ರವಿಶಂಕರ್ ಗೌಡ, ರಾಜೇಶ್ ನಟರಂಗ, ಸುಜಯ್ ಶಾಸ್ತ್ರಿ, ಚಂದ್ರಕಲಾ ಮೋಹನ್, ಹೊನ್ನವಳ್ಳಿ ಕೃಷ್ಣ, ರಮೇಶ್ ಪಂಡಿತ್, ಗಣೇಶ್ ರಾವ್, ಕೋಟೆ ಪ್ರಭಾಕರ್, ಚೇತನ್ ದುರ್ಗಾ, ನಾಗೇಂದ್ರ ಅರಸ್, ಮೂಗು ಸುರೇಶ್ ಮುಂತಾದವರು ನಟಿಸಿದ್ದಾರೆ.

ಚಿತ್ರಕ್ಕೆ ಗುರು ಕಿರಣ್ ಅವರು ಸಂಗೀತ ನಿರ್ದೇಶಕ, ಮನೋಹರ್ ಜೋಶಿ ಛಾಯಾಗ್ರಾಹಕ, ದೀಪು ಎಸ್ ಕುಮಾರ್ ಸಂಕಲನಕಾರ, ಹರೀಶ್ ಗೌಡ ಸಂಭಾಷಣೆ ಬರಹಗಾರರಾಗಿ ಕೆಲಸ ಮಾಡಿದ್ದಾರೆ. ವಿಶ್ವಾಸ್ ಕಶ್ಯಪ್ ಅವರ ಕಲಾ ನಿರ್ದೇಶನ, ಅರ್ಜುನ್ ರಾಜ್ ಸಾಹಸ ದೃಶ್ಯಗಳ ಸಂಯೋಜನೆ, ಕವಿರಾಜ್ ಮತ್ತು ಪ್ರಮೋದ್ ಮರವಂತೆ ಸಾಹಿತ್ಯ ಇದೆ.

——