ಜೀ ಕನ್ನಡದಲ್ಲಿ “ಫಿಯರ್ ಫೈಲ್ಸ್”

ಕೌಟುಂಬಿಕ, ಸಾಮಾಜಿಕ,ಆಧ್ಯಾತ್ಮಿಕ ಧಾರಾವಾಹಿಗಳ ಮೂಲಕ ಕನ್ನಡದ ನಂಬರ್ ಒನ್ ಚಾನೆಲ್ ಎನಿಸಿಕೊಂಡಿರುವ ಜೀ ಕನ್ನಡ, ಈಗ ಹೊಸತೊಂದು ಕಾರ್ಯಕ್ರ‌ಮವದ ಮೂಲಕ ವೀಕ್ಷಕರನ್ನು ರೋಮಾಂಚನಗೊಳಿಸಲು ಸಜ್ಜಾಗಿದೆ. ‘ಫಿಯರ್ ಫೈಲ್ಸ್’ ಎಂಬ ನೂತನ ಧಾರಾವಾಹಿ ಮೂಲಕ ವೀಕ್ಷಕರಿಗೆ ಹೊಸ ಥ್ರಿಲ್ ನೀಡಲು ಚಾನೆಲ್ ಮುಂದಾಗಿದೆ.

ಇದೇ ಅಕ್ಟೋಬರ್ 3ರಿಂದ ಶನಿವಾರ ಹಾಗೂ ಭಾನುವಾರ ರಾತ್ರಿ 10.30ರಿಂದ 11.30ರವರೆಗೆ ಪ್ರಸಾರವಾಗಲಿರುವ ‘ಫಿಯರ್ ಫೈಲ್ಸ್’ ಹಾರರ್, ಸಸ್ಪೆನ್ಸ್ ಮತ್ತು ಥ್ರಿಲರ್ ಅಂಶಗಳನ್ನು ಇಷ್ಟಪಡುವ ವೀಕ್ಷಕರನ್ನು ರಂಜಿಸಲಿದೆ.

ಪ್ರತಿ ಕಂತಿನಲ್ಲೂ ವಿಭಿನ್ನ ಕಥಾ ಹಂದರ, ಭಯ ಹುಟ್ಟಿಸುವ ತಾಣಗಳ ಹುಡುಕಾಟ, ಶಾಪಗ್ರಸ್ತ ವಸ್ತುಗಳ ರಹಸ್ಯ, ಭಯಾನಕ ತಿರುವು ಹೊಂದಿದ ಪ್ರೇಮಕಥೆಗಳು, ಮಿಥ್ಯೆಗಳು ಮತ್ತು ನಿಗೂಢಗಳ ಅನಾವರಣವನ್ನು ಈ ಧಾರಾವಾಹಿ ಮಾಡಲಿದೆ. ಈ ಧಾರಾವಾಹಿಯ ಮೂಲಕ ಹಾರರ್ ನ ಹಲವು ಆಯಾಮಗಳನ್ನು ವೀಕ್ಷಕರು ಅನುಭವಿಸಲಿದ್ದಾರೆ.

ನಿಜ ಜೀವನದ ಕಥೆಗಳು, ನೈಜ ಪಾತ್ರಗಳು, ಪ್ರತಿನಿತ್ಯದ ಸನ್ನಿವೇಶಗಳು, ಹಿಂದೆಂದೂ ಕಾಣದ ರೋಮಾಂಚನವನ್ನು ವೀಕ್ಷಕರಿಗೆ ಈ ಸರಣಿ ನೀಡಲಿದೆ. ಈ ‘ಫಿಯರ್ ಫೈಲ್ಸ್’ ನಾವು ಕಾಣುವ ಆದರೆ ವಿವರಿಸಲಾಗದ ಸಂಗತಿಗಳು, ಮಾಂತ್ರಿಕತೆ, ದೆವ್ವ ಭೂತಗಳು, ನಿಜವಾದ ಭಯವನ್ನು ಹುಟ್ಟಿಸುವ ಸನ್ನಿವೇಶಗಳನ್ನು ಒಳಗೊಂಡಿರಲಿದೆ.

ಫಿಯರ್ ಫೈಲ್ಸ್ ಪ್ರಾರಂಭ ಕುರಿತು ಜೀ ಕನ್ನಡ ಬಿಸಿನೆಸ್ ಹೆಡ್ ರಾಘವೇಂದ್ರ ಹುಣಸೂರು, “ಕಿರುತೆರೆ ವೀಕ್ಷಕರಿಗೆ ಅವರ ಅಭಿರುಚಿ, ಆಸಕ್ತಿಗೆ ಅನುಗುಣವಾಗಿ ಫಿಕ್ಷನ್ ಹಾಗೂ ನಾನ್-ಫಿಕ್ಷನ್ ಕಾರ್ಯಕ್ರಮಗಳನ್ನು ರೂಪಿಸುವಲ್ಲಿ ಜೀ ಕನ್ನಡ ಸದಾ ಮುಂಚೂಣಿಯಲ್ಲಿದೆ.

ಫಿಯರ್ ಫೈಲ್ಸ್ ಮೂಲಕ ಇದೀಗ ವೀಕ್ಷಕರಿಗೆ ವಿಶಿಷ್ಟ ರೋಮಾಂಚಕ ಅನುಭವ ನೀಡಲು ನಮ್ಮ ವಾಹಿನಿ ಸನ್ನದ್ಧವಾಗಿದೆ. ಹಾರರ್ ಇಷ್ಟಪಡುವ ವೀಕ್ಷಕರಿಗೆ ಇಲ್ಲಿ ನಂಬಲಾಗದ ನೈಜ ಕಥೆಗಳಿವೆ. ಪ್ರತಿಯೊಂದು ಕಥೆಯೂ ವಿಭಿನ್ನವಾಗಿವೆ. ಈ ಕಾರ್ಯಕ್ರಮವನ್ನು ನಮ್ಮ ಎಲ್ಲ ಕಾರ್ಯಕ್ರಮಗಳಂತೆ ವೀಕ್ಷಕರು ಸ್ವಾಗತಿಸುತ್ತಾರೆ ಎಂಬ ಭರವಸೆ ನಮ್ಮದು” ಎನ್ನುತ್ತಾರೆ.