‘ಚಂದನವನ ಫಿಲ್ಮ್ ಕ್ರಿಟಿಕ್ಸ್ ಅಕಾಡೆಮಿ’ಗೆ ನಾಳೆ ಶಿವಣ್ಣ ಚಾಲನೆ

ಕನ್ನಡ ಸಿನಿಮಾ ಪತ್ರಕರ್ತರ ಸಮೂಹದಿಂದ ಆರಂಭವಾಗಲಿರುವ ‘ಚಂದನವನ ಫಿಲ್ಮ್ ಕ್ರಿಟಿಕ್ಸ್ ಅಕಾಡೆಮಿ’ಗೆ ನಾಳೆ ಚಾಲನೆ ದೊರೆಯಲಿದೆ.ಹ್ಯಾಟ್ರಿಕ್​ ಹೀರೋ, ಕಲಾವಿದರ ಸಂಘದ ಕಾರ್ಯದರ್ಶಿ ಶಿವರಾಜ್​ಕುಮಾರ್​ ಅಕಾಡೆಮಿ ಉದ್ಘಾಟಿಸಲಿದ್ದಾರೆ. ವಾಣಿಜ್ಯ ಮಂಡಳಿ ಅಧ್ಯಕ್ಷ ಜೈರಾಜ್, ಹಿರಿಯ ನಿರ್ಮಾಪಕ ರಾಕ್​ಲೈನ್ ವೆಂಕಟೇಶ್, ಕನ್ನಡ ಚಲನಚಿತ್ರ ನಿರ್ದೇಶಕರ ಸಂಘದ ಅಧ್ಯಕ್ಷ ಡಾ.ವಿ. ನಾಗೇಂದ್ರ ಪ್ರಸಾದ್ ಉದ್ಘಾಟನಾ ಸಮಾರಂಭದಲ್ಲಿ ಉಪಸ್ಥಿತರಿರುತ್ತಾರೆ.

‘ಚಂದನವನ ಫಿಲ್ಮ್ ಕ್ರಿಟಿಕ್ಸ್ ಅಕಾಡೆಮಿ’ ಹಲವು ಸದುದ್ದೇಶಗಳನ್ನು ಒಳಗೊಂಡಿದೆ. ಮುದ್ರಣ, ಎಲೆಕ್ಟ್ರಾನಿಕ್​ ಹಾಗೂ ಆನ್​ಲೈನ್​ ಮಾಧ್ಯಮದ ಹಿರಿಯರು ಹಾಗೂ ಕಿರಿಯರು ‘ಚಂದನವನ ಫಿಲ್ಮ್ ಕ್ರಿಟಿಕ್ಸ್ ಅಕಾಡೆಮಿ’ ಸದಸ್ಯರಾಗಿರುತ್ತಾರೆ. ಈ ಅಕಾಡೆಮಿಗೆ ಕೇಂದ್ರ ಸರ್ಕಾರದಿಂದ ಈಗಾಗಲೇ ನಾನ್​-ಪ್ರಾಫಿಟ್​ ಸಂಸ್ಥೆ ಎಂದು ಮಾನ್ಯತೆ ಸಿಕ್ಕಿದೆ.

ಇನ್ನು ಈ ಅಕಾಡೆಮಿ ಮೂಲಕ 2020ರಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭವನ್ನು ಆಯೋಜಿಸಲಿದ್ದಾರೆ. ಒಟ್ಟು 20 ಕ್ಯಾಟಗರಿಯಲ್ಲಿ ಪ್ರಶಸ್ತಿ ನೀಡಲಿದ್ದು, ಪ್ರತಿ ಕ್ಯಾಟಗರಿಗೆ 5 ನಾಮಿನೇಷನ್ ಇರಲಿದೆ. ಪತ್ರಕರ್ತರೇ ವಿಜೇತರನ್ನು ಆಯ್ಕೆ ಮಾಡಲಿದ್ದು, ಪತ್ರಕರ್ತರಿಂದ ಯಾರು ಹೆಚ್ಚು ವೋಟ್ ಪಡೆದಿರುತ್ತಾರೋ, ಅದರ ಮೇಲೆ ಪ್ರಶಸ್ತಿ ಯಾರಿಗೆ ಹೋಗಬೇಕು ಅನ್ನೋದು ನಿರ್ಧಾರವಾಗಲಿದೆ.

ಈ ಹಿಂದೆ 1987ರಿಂದ ಕರ್ನಾಟಕ ಚಲನಚಿತ್ರ ಪತ್ರಕರ್ತರ ಪರಿಷತ್ ಪ್ರತಿ ವರ್ಷ ಒಂದು ಪ್ರಶಸ್ತಿಯನ್ನು ನೀಡುತ್ತಾ ಬಂದಿತ್ತು. ಈಗ ಅಸ್ತಿತ್ವಕ್ಕೆ ಬರುವ ‘ಚಂದನವನ ಫಿಲ್ಮ್ ಕ್ರಿಟಿಕ್ಸ್ ಅಕಾಡೆಮಿ’ 20 ವಿಭಾಗಗಳಲ್ಲಿ ಪ್ರಶಸ್ತಿ ಘೋಷಣೆ ಮಾಡಲಿದೆ. 2020ರ ಜನವರಿ ತಿಂಗಳಿನಲ್ಲಿ ಪ್ರಶಸ್ತಿ ಸಮಾರಂಭ ನಡೆಯಲಿದೆ.