‘ಭುವನಂ ಗಗನಂ’ ವಿತರಣಾ ಹಕ್ಕು ಚಂದನ್ ಸುರೇಶ್ ಪಾಲು

ಪ್ರಮೋದ್, ಪೃಥ್ವಿ ಅಂಬಾರ್ ನಟನೆಯ ‘ಭುವನಂ ಗಗನಂ’ ಚಿತ್ರದ ಕರ್ನಾಟಕದ ವಿತರಣಾ ಹಕ್ಕುಗಳನ್ನು ಚಂದನ್ ಸುರೇಶ್ ಅವರ ಕಂಪನಿಯು  ಪಡೆದುಕೊಂಡಿದೆ.

ಪ್ರಮೋದ್ ಮತ್ತು ಪೃಥ್ವಿ ಅಂಬಾರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ‘ಭುವನಂ ಗಗನಂ’ ಚಿತ್ರ  ಫೆಬ್ರುವರಿ 14 ರ ಪ್ರೇಮಿಗಳ ದಿನದಂದು ರಾಜ್ಯದಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.   ಗಿರೀಶ್ ಮೂಲಿಮನಿ ನಿರ್ದೇಶನದ ಈ ಚಿತ್ರವನ್ನು ಎಸ್‌ವಿಸಿ ಫಿಲಂಸ್ ಬ್ಯಾನರ್ ಅಡಿಯಲ್ಲಿ ಎಂ ಮುನೇಗೌಡ ನಿರ್ಮಿಸಿದ್ದಾರೆ.

ಭುವನಂ ಗಗನಂ ಚಿತ್ರವು ಅನನ್ಯ ಪ್ರೇಮ ಕಥೆಯಾಗಿದೆ. ನಾಯಕರಾದ ಪ್ರಮೋದ್ ಮತ್ತು ಪೃಥ್ವಿ ಅವರಿಗೆ ಜೋಡಿಯಾಗಿ ರಾಚೆಲ್ ಡೇವಿಡ್ ಮತ್ತು ಅಶ್ವತಿ ನಟಿಸಿದ್ದಾರೆ. ಇನ್ನುಳಿದಂತೆ ಅಚ್ಯುತ್ ಕುಮಾರ್, ಶರತ್ ಲೋಹಿತಾಶ್ವ, ಪ್ರಕಾಶ್ ತುಮ್ಮಿನಾಡು, ಹರಿಣಿ ಮತ್ತು ಸ್ಪರ್ಶ ರೇಖಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

‘ಭುವನಂ ಗಗನಂ’  ಚಿತ್ರವು  ಆಕರ್ಷಕ ಹಾಡುಗಳು ಮತ್ತು ಟೀಸರ್‌ನೊಂದಿಗೆ ಆಸಕ್ತಿ  ಹುಟ್ಟುಹಾಕಿದೆ. ಚಿತ್ರ ಪ್ರೇಮ, ಪ್ರಣಯ ಮತ್ತು ಕೌಟುಂಬಿಕ ಭಾವನೆಗಳನ್ನು ಹೊಂದಿದೆ. ನಗರ ಮತ್ತು ಗ್ರಾಮೀಣ ಪ್ರದೇಶಗಳೆರಡರಲ್ಲೂ ಕಥೆ ನಡೆಯುತ್ತದೆ.

ಚಿತ್ರ ಕಥೆಯು ಎರಡು ಟ್ರ್ಯಾಕ್‌ಗಳಲ್ಲಿ ತೆರೆದುಕೊಳ್ಳುತ್ತದೆ. ಪ್ರಮೋದ್ ಮತ್ತು ಪೃಥ್ವಿಯ ಪ್ರಯಾಣಗಳು ಪ್ರತ್ಯೇಕವಾಗಿ ಸಾಗುತ್ತವೆ. ಒಂದು ಹಂತದಲ್ಲಿ ಎರಡೂ ಪಾತ್ರಗಳು ಒಂದಾಗುತ್ತವೆ. ಅವರು ಯಾಕೆ ಭೇಟಿಯಾಗುತ್ತಾರೆ ಮತ್ತು ನಂತರ ಏನಾಗುತ್ತದೆ ಎಂಬುದು ಚಿತ್ರದ ಹೈಲೈಟ್.

—-