ಹನ್ನೋಂದು ವರುಷಗಳ ಕೆಳಗೆ ಮೂವರು ನಾಯಕರು ಮತ್ತು ನಾಯಕಿರುಗಳ ‘ಗಾಳಿ ಪಟ’ ಚಿತ್ರಕ್ಕೆ ಕತೆ ಬರೆದು ಆಕ್ಷನ್ ಕಟ್ ಹೇಳಿದ್ದ ಯೋಗರಾಜಭಟ್, ಈಗ ಅದೇ ಹೆಸರಿಗೆ 2 ಅಂತ ಸೇರಿಸಿಕೊಂಡು ‘ಗಾಳಿಪಟ-2’ ಸಿನಿಮಾಗೆ ತಯಾರಿ ನಡೆಸಿದ್ದಾರೆ. ಇದರಲ್ಲೂ ಮೂರು ಹೀರೋಗಳು ಇರುವಂತೆ, ನಾಯಕಿಯರ ಪೈಕಿ ಇಬ್ಬರು ಹೆಚ್ಚಿಗೆ ಇರುವುದು ವಿಶೇಷ. ಶರಣ್, ಆಪರೇಶನ್‍ಅಲಮೇಲಮ್ಮ ಖ್ಯಾತಿಯ ರಿಷಿ ಮತ್ತು ಪವನ್‍ಕುಮಾರ್ ನಾಯಕರು. ಅದರಂತೆ ನಾಯಕಿಯರುಗಳ ಪೈಕಿ ಶರ್ಮಿಳಾಮಾಂಡ್ರೆ, ಸೋನಾಲ್‍ಮೊಂತೆರೋ ಹಾಗೂ ಬಾಂಬೆ ಮಾಡೆಲ್ ಇವರೊಂದಿಗೆ ಬೆಂಗಾಲಿ ಬೆಡಗಿ ಮತ್ತು ಚೈನಿಸ್ ಹುಡುಗಿಯೊಬ್ಬಳು ನಟಿಸಲಿದ್ದಾರೆ. ಭಟ್ಟರ ಸಿನಿಮಾದಲ್ಲಿ ಆಸ್ಥಾನಕವಿಯಂತೆ ಇರುವ ಅನಂತ್‍ನಾಗ್, ರಂಗಾಯಣರಘು ಮುಂತಾದವರ ನಟನೆ ಇದೆ.
ಪ್ರಚಾರದ ಮೊದಲ ಹಂತವಾಗಿ ಸಿನಿಮಾದ ಶೀರ್ಷಿಕೆ ಹಾಗೂ ಫಸ್ಟ್ ಲುಕ್ ಅನಾವರಣಗೊಂಡಿತು. ಕತೆಯ ಅರ್ಧ ಭಾಗ ಕರ್ನಾಟಕ, ಉಳಿದದ್ದು ವಿದೇಶಿ ನೆಲದಲ್ಲಿ ನಡೆಯಲಿರುವುದರಿಂದ ಬೆಂಗಳೂರು,ವಿದೇಶದಲ್ಲಿ ಚಿತ್ರೀಕರಣ ನಡೆಸಲು ಯೋಜನೆ ಹಾಕಲಾಗಿದೆ. ಬೆಂಗಳೂರು, ಮಂಡ್ಯಾ, ಧಾರವಾಡ ಸ್ಥಳಗಳಿಂದ ಬಂದವರಾಗಿದ್ದ ಕಥಾನಾಯಕರ ಪೈಕಿ ಒಬ್ಬನು ಮೇಲ್ವರ್ಗ, ಇನ್ನೊಬ್ಬ ಮಧ್ಯಮ ವರ್ಗ, ಕೊನೆಯವನು ಕೆಳವರ್ಗದಲ್ಲಿ ಇರುತ್ತಾನೆ. ಇವರ ಬಾಳು-ಗೋಳು-ಪ್ರೇಮ-ಕಾಮ-ಶಿಕ್ಷಣ,ವೃತ್ತಿ ಮುಂತಾದ ವಿಷಯಗಳು ಬರಲಿದೆ ಎಂಬುದು ಒನ್ ಲೈನ್ ಮಾಹಿತಿ ಲಭ್ಯವಾಗಿದೆ. ಹಳೆ ಗಾಳಿಪಟಕ್ಕೆ ಹರಿಕೃಷ್ಣ ಸಂಗೀತದಲ್ಲಿ ಹಾಡುಗಳು ಹಿಟ್ ಆಗಿದ್ದವು. ಬದಲಾವಣೆ ಎನ್ನುವಂತೆ ಇದರಲ್ಲಿ ಜಯಂತ್‍ಕಾಯ್ಕಣಿ ಮತ್ತು ಭಟ್ಟರು ಬರೆದಿರುವ ಸಾಹಿತ್ಯಕ್ಕೆ ಅರ್ಜುನ್‍ಜನ್ಯಾ ರಾಗಗಳನ್ನು ಹೊಸೆಯುತ್ತಿದ್ದಾರೆ. ಛಾಯಗ್ರಹಣ ಅದ್ವೈತಗುರುಮೂರ್ತಿ ಅವರದಾಗಿದೆ. ಬೆಳಗಾವಿ ಮೂಲದ ಮಹೇಶ್‍ದಾನನ್ನವರ್ ಎಂಡಿ ಮೀಡಿಯಾ ಕಾರ್ಪ್ ಬ್ಯಾನರ್‍ನಡಿ ಚಿತ್ರಕ್ಕೆ ಹಣ ಹೂಡುತ್ತಿದ್ದಾರೆ. ಇವರೊಂದಿಗೆ ಪಿನಾಕಿನ್‍ಭಕ್ತ ಸಹ ನಿರ್ಮಾಪಕರಾಗಿ ಗುರುತಿಸಿಕೊಂಡಿದ್ದಾರೆ. ಮಾರ್ಚ್ ಒಂದರಿಂದ ಶೂಟಿಂಗ್ ಶುರುವಾಗಲಿದೆ. ವೈಬಿ ಬತ್ತಳಿಕೆಯಲ್ಲಿ ಪಾತ್ರಗಳು ವಿಶೇಷವಾಗಿರುತ್ರವೆ ಅಂತ ಹಿಂದಿನ ಸಿನಿಮಾಗಳಲ್ಲಿ ಸಾಬೀತು ಆಗಿರುವುದರಿಂದ ಅದು ಈ ಚಿತ್ರದಲ್ಲೂ ಮುಂದುವರೆಯಲಿದೆ.
Pingback: her explanation