ಮತ್ತೆ ಕನ್ನಡಕ್ಕೆ ಮರಳಿದ ಅರ್ಚನಾ

ರಾಷ್ಟ್ರಪ್ರಶಸ್ತಿ ವಿಜೇತ ನಟಿ ಅರ್ಚನಾ ಅವರು 25 ವರ್ಷಗಳ ನಂತರ ನಟ ರಿಷಬ್ ಶೆಟ್ಟಿ ನಿರ್ದೇಶನದ ‘ಕಾಂತಾರ’ ಚಿತ್ರದ ಮೂಲಕ ಕನ್ನಡಕ್ಕೆ ಮರಳುತ್ತಿದ್ದಾರೆ.

1990 ರಲ್ಲಿ ಹುಲಿಯಾ ಸಿನಿಮಾದಲ್ಲಿ ದೇವರಾಜ್ ಜೊತೆ ನಾಯಕಿಯಾಗಿ ನಟಿಸಿದ್ದ ಅರ್ಚನಾ, ಹಲವು ಕನ್ನಡ ಚಿತ್ರಗಳಲ್ಲಿ ನಟಿಸಿದ್ದರು. ಪ್ರೇಮಿಗಳ ಸವಾಲ್, ಬೆಳ್ಳಿ ನಾಗ, ಗುರಿ, ಒಂದು ಮುತ್ತಿನ ಕಥೆ ಸಿನಿಮಾದಲ್ಲಿ ಅಭಿನಯಿಸಿದ್ದ ಅವರು ತೆಲುಗು, ತಮಿಳು, ಮಲಯಾಳಂ ಸಿನಿಮಾ ರಂಗದಲ್ಲಿ ಜನಪ್ರಿಯ ಪಡೆದಿದ್ದಾರೆ.

ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣ ಮಾಡುತ್ತಿರುವ ಕಾಂತಾರ ಚಿತ್ರದ ಮುಹೂರ್ತ ಆಗಸ್ಟ್ 27 ರಂದು ನಡೆಯಲಿದೆ. ರಿಷಬ್ ಶೆಟ್ಟಿ ಅವರು ನಟನೆಯ ಜೊತೆಗೆ ನಿರ್ದೇಶನದ ಹೊಣೆಯನ್ನೂ ಹೊತ್ತಿದ್ದಾರೆ.

ವಿಜಯ ಕಿರಂಗದೂರು ನಿರ್ಮಿಸುತ್ತಿರುವ ಈ ಸಿನಿಮಾದಲ್ಲಿ ಅಚ್ಯುತಕುಮಾರ್, ಕಿಶೋರ್ ಅವರು ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.
ಅಜನೀಶ್ ಲೋಕನಾಥ್ ಸಂಗೀತ, ಅರವಿಂದ್ ಕಶ್ಯಪ್ ಛಾಯಾಗ್ರಾಹಣವಿದೆ.

ಕರಾವಳಿ ಭಾಗದ ಜನಪ್ರಿಯ ಜಾನಪದ ಕ್ರೀಡೆ ಆಗಿರುವ ಕಂಬಳದ ಕುರಿತು ಈ ಸಿನಿಮಾ ಕಥಾ ಹಂದರವನ್ನು ಹೊಂದಿದೆ. ಕಂಬಳದ ಬಗ್ಗೆ ಯಾವುದೇ ಸಿನಿಮಾ ಇದುವರೆಗೆ ಬೆಳ್ಳಿತೆರೆಯ ಮೇಲೆ ಬಾರದಿರುವ ಕಾರಣ ಈ ಚಿತ್ರ ಸಾಕಷ್ಟು ಕುತೂಹಲ ಉಂಟು ಮಾಡಿದೆ.
____________