‘ಸರ್ಸೆ’ ‘ಸಾಂಗ್ ರಿರೈಟ್ ಮಾಡ್ತೀನಿ ಎಂದ ಪ್ರೇಮ್

‘ಕೆಡಿ: ದ ಡೆವಿಲ್’ ಚಿತ್ರದ  ‘ಸರ್ಸೆ ನಿನ್ನ ಸೆರಗ ಸರ್ಸೆ’  ಹಾಡಿನಿಂದ ನೋವಾಗಿದ್ದರೆ ನಾನು ಮತ್ತೆ ಆ ಹಾಡನ್ನು ರಿರೈಟ್ ಮಾಡ್ತೀನಿ ಎಂದು ಜೋಗಿ ಪ್ರೇಮ್ ಹೇಳಿದ್ದಾರೆ.

ಈ ಹಾಡಿನಲ್ಲಿ ಅಶ್ಲೀಲ ಸಾಹಿತ್ಯ ಇದೆ ಎಂಬ ಕಾರಣಕ್ಕೆ ಹಿಂದಿ ಆವೃತ್ತಿಯ ಹಾಡನ್ನು ನಿರ್ಬಂಧಿಸಲಾಗಿದೆ. ಕೇಂದ್ರ ಸರ್ಕಾರ  ಈ ಹಾಡಿನ ಕುರಿತು  ಸೆನ್ಸಾರ್ ಮಂಡಳಿ ಕ್ರಮ ಕೈಗೊಳ್ಳುವಂತೆ ಸೂಚಿಸಿದೆ ಎನ್ನಲಾಗಿದೆ. ಹಾಡಿನಲ್ಲಿ ಕಾಣಿಸಿಕೊಂಡಿರುವ ನಟಿ ನೋರಾ ಫತೇಹಿ ಮತ್ತು ಹಿಂದಿ ಸಾಹಿತಿ ರಕೀಬ್ ಆಲಂ ವಿರುದ್ಧವೂ ಆಕ್ರೋಶ ವ್ಯಕ್ತವಾದ ಹಿನ್ನಲೆಯಲ್ಲಿ ಇಬ್ಬರೂ  ಪ್ರೇಮ್ ರತ್ತ ಬೊಟ್ಟು ಮಾಡಿ  ಅಸಮಾಧಾನ ವ್ಯಕ್ತಪಡಿಸಿದ್ದು, ಪ್ರೇಮ್ ಈ ಕುರಿತು ಸ್ಪಷ್ಟನೆ ನೀಡಿದ್ದಾರೆ.

”ಯಾರಿಗೂ ನೋವು ಮಾಡುವ ಉದ್ದೇಶದಿಂದ ಈ ಹಾಡು ಬರೆದಿಲ್ಲ. ಈ ಹಾಡನ್ನು ನಾನು  ಒಂದು ಬಾಟಲ್, ಒಂದು ಉಪ್ಪಿನಕಾಯಿ ಕಟೆಂಟ್ ಇಟ್ಕೊಂಡು ಬರೆದೆ.  ಬಾಟಲ್ ನ ಮೇಲೆ ಎತ್ತಿ ಎನ್ನುವ ಪದವನ್ನು ಹಿಂದೆ ಹಾಕಬಹುದಿತ್ತು. ಆದ್ರೆ ನಾನು ಕುತೂಹಲ ಇರಲಿ ಎಂದು ಆ ಪದವನ್ನು ಕೊನೆಯಲ್ಲಿ ಹಾಕಿದೆ. ಹಾಡನ್ನು ಅಶ್ಲೀಲವಾಗಿಯಾಗಲಿ,  ತೊಂದರೆ ನೀಡಲಾಗಲಿ ಬರೆಯಲಿಲ್ಲ. ಕೆಲವರು ಲೈಕ್ ಮತ್ತು ಕಮೆಂಟ್ ಗಳಾಗಿ ತಮ್ಮನ್ನು ನಿಂದಿಸುತ್ತಿದ್ದಾರೆ” ಎಂದು ಹೇಳಿದ್ದಾರೆ.

”ಹಾಡಿನಿಂದ ನೋವಾಗಿದ್ದರೆ ನಾನು ಮತ್ತೆ ಆ ಹಾಡನ್ನು ಪುನಃ ಬರೆಯುತ್ತೇನೆ. ಮತ್ತೆ ದೇಶಾದ್ಯಂತ ರಿಲೀಸ್ ಮಾಡ್ತೇನೆ. ಹಿಂದಿ ಹಾಡು ಬರೆದಿದ್ದು ರಕೀಬ್ ಆಲಂ ಅವರು. ರಕೀಬ್ ಅವರು ಕನ್ನಡವನ್ನೇ ಅನುವಾದ ಮಾಡಿದ್ದಾಗಿ ಹೇಳಿಕೆ ನೀಡಿದ್ದಾರೆ. ವಿವಾದದಿಂದಾಗಿ ಅವರು ಆ ರೀತಿ ಹೇಳಿರಬಹುದು. ನೋರಾ ಫತೇಹಿ  ಅವರ ಹೇಳಿಕೆ ತಪ್ಪು. ಯಾರೇ ನಟರಾಗಲಿ  ಚಿತ್ರೀಕರಣಕ್ಕಿಂತ ಮೊದಲು  ಹಾಡು ಕೇಳುತ್ತಾರೆ. ಸಾಹಿತ್ಯ ಬರದೇ ಅವರು ಹೇಗೆ ಎಕ್ಸ್ ಪ್ರೆಷನ್ ನೀಡಲು ಸಾಧ್ಯ?   ಅವರೇಕೆ ಆ ರೀತಿ ಮಾತನಾಡಿದರೋ ಗೊತ್ತಿಲ್ಲ. ವಿವಾದವಾಗುತ್ತಿದೆ ಅದರಿಂದ ತಪ್ಪಿಸಿಕೊಳ್ಳಬೇಕು ಎಂದು ಬಹುಶಃ ಅವರು ಆ ರೀತಿ ಹೇಳಿಕೆ ನೀಡಿರಬಹುದು. ಆದರೆ ಮೊನ್ನೆ ಹಾಡು ಬಿಡುಗಡೆ ವೇಳೆಯೂ ನೋರಾ ಅವರು ಹಾಡಿನ ಬಗ್ಗೆ ಮಾತನಾಡಿ ಸಂತೋಷ ವ್ಯಕ್ತಪಡಿಸಿದ್ದರು” ಎಂದು ಹೇಳಿದ್ದಾರೆ.