ಡಿ.13ರಂದು ‘ಲೈಫ್ ಈಸ್ ಬ್ಯೂಟಿಫುಲ್’ ತೆರೆಗೆ

ಪೃಥ್ವಿ ಅಂಬರ್, ಪ್ರಿಯಾಂಕಾ ಉಪೇಂದ್ರ  ನಟನೆಯ ‘ಲೈಫ್ ಈಸ್ ಬ್ಯೂಟಿಫುಲ್’ ಚಿತ್ರ  ಡಿ.13ರಂದು ತೆರೆಗೆ ಬರಲಿದೆ.

ನಟ ಉಪೇಂದ್ರ ಚಿತ್ರ ಬಿಡುಗಡೆ ದಿನಾಂಕ ಘೋಷಿಸಿ, ‘ಸಿನಿಮಾದ ತುಣುಕುಗಳನ್ನು ನೋಡಿದ್ದೇನೆ. ಚಿತ್ರ  ಲಿಫ್ಟ್ ಒಳಗೆ ನಡೆಯುವ ಕಥೆ ಎನ್ನಿಸುತ್ತದೆ. ಬದುಕು ಕೂಡ ಲಿಫ್ಟ್‌ನಂತೆ ಮೇಲೆ, ಕೆಳಗೆ ಹೋಗುತ್ತಿರುತ್ತದೆ.  ಈ ಸಿನಿಮಾ ಬಿಡುಗಡೆ ಮೊದಲೇ ಗೊತ್ತಿದ್ದರೆ ‘ಯುಐ’ ಸಿನಿಮಾ ಬಿಡುಗಡೆ  ಸ್ವಲ್ಪ ಮುಂದೂಡುತ್ತಿದ್ದೆವು. ಪ್ರಿಯಾಂಕಾ ಅದ್ಬುತ ಕಲಾವಿದೆ. ಅವರಿಂದ ನಾನು ಸಾಕಷ್ಟು ಕಲಿಯುವುದಿದೆ’ ಎಂದು  ತಂಡಕ್ಕೆ ಶುಭ ಕೋರಿದರು.

‘ಮಹಿಳಾ ಪ್ರಧಾನ ಚಿತ್ರಗಳು ಬರುವುದೇ ಕಡಿಮೆ. ಮಹಿಳೆಯರಿಗಾಗಿ ಸ್ಕ್ರಿಪ್ಟ್ ಬರೆಯುವವರೇ ಕಡಿಮೆ. ಹೀಗಿರುವಾಗ ಇಂಥ ಸಿನಿಮಾಗಳು ಬಂದಾಗ ಬಿಡಲು ಇಷ್ಟವಾಗುವುದಿಲ್ಲ. ಚಿತ್ರದಲ್ಲಿ ಹಲವರಿಗೆ ಸ್ಫೂರ್ತಿ ನೀಡಬಹುದಾದ, ರೋಲ್‌ ಮಾಡೆಲ್‌ ಆಗುವಂಥ ಕಥೆ ಇದೆ. ಇಲ್ಲಿಯವರೆಗೆ ನಾನು ಇಂಥ ಪಾತ್ರದಲ್ಲಿ ನಟಿಸಿಲ್ಲ. ಈ ಸಿನಿಮಾ ತುಂಬಾ ಖುಷಿ ಕೊಡ್ತಿದೆ. ಮೇಕಿಂಗ್‌ ಕೂಡ ಎಕ್ಸ್‌ಕ್ಲೂಸಿವ್‌ ಆಗಿದೆ ‘ ಎಂದಿದ್ದಾರೆ ಪ್ರಿಯಾಂಕಾ ಉಪೇಂದ್ರ .

ಸಾಬು ಅಲೋಶಿಯಸ್ ಮತ್ತು ಅರುಣ್‌ಕುಮಾರ್ ಎಂ ಜಂಟಿಯಾಗಿ ‘ಲೈಫ್ ಈಸ್ ಬ್ಯೂಟಿಫುಲ್’ ಚಿತ್ರ  ನಿರ್ದೇಶಿಸಿದ್ದಾರೆ.  ಫ್ರೈಡೆ ಫಿಲ್ಮ್ಸ್‌ ಮೂಲಕ   ‘ಮಮ್ಮಿ’ ಮತ್ತು ‘ದೇವಕಿ’ ಚಿತ್ರಗಳ ನಿರ್ದೇಶಕ ಲೋಹಿತ್‌ ಎಂ ಗೆಳೆಯರ ಜೊತೆಗೂಡಿ  ಚಿತ್ರವನ್ನು ನಿರ್ಮಿಸಿದ್ದಾರೆ.

‘ಲೈಫ್ ಈಸ್ ಬ್ಯೂಟಿಫುಲ್’ ತಾರಾಗಣದಲ್ಲಿ ಲಾಸ್ಯ ನಾಗರಾಜ್, ಸಿದ್ಲಿಂಗು ಶ್ರೀಧರ್, ‘ಕಾಮಿಡಿ ಕಿಲಾಡಿ’ಗಳು ಖ್ಯಾತಿಯ ಮಹಾಂತೇಶ್ ಮುಂತಾದವರಿದ್ದಾರೆ. ನೊಬಿನ್‌ಪೌಲ್ ಸಂಗೀತ ಚಿತ್ರಕ್ಕಿದೆ.

—-