ಅಮರನಾಥ್ ದಾನ ಶೂರ ಕರ್ಣ!

ಒಮ್ಮೆ ಸುಧೀರ್ ಮನೆ ಕಟ್ಟುವ ಸಂದರ್ಭದಲ್ಲಿ ಅಂಬರೀಶ್ ಅವರ ಬಳಿ ಸಾಲ ಕೇಳುತ್ತಾರೆ. ಆಗ ಅಂಬಿ, ನೀನು ನನ್ನ ಗೆಳೆಯ ಸಾಲ ಎಂದು ತಿಳಿಯದೇ ಗಿಫ್ಟ್ ಎಂದು ತೆಗೆದುಕೋ ಎಂದಿದ್ದರಂತೆ. ಖಳ ನಟ
ವಜ್ರಮುನಿ ಅವರು ಹಲವು ಚಿತ್ರಗಳನ್ನು ನಿರ್ಮಿಸಿ ಆರ್ಥಿಕವಾಗಿ ಸಂಕಷ್ಟಕ್ಕೆ ಒಳಗಾಗಿದ್ದರು. ಆ ಸಂದರ್ಭದಲ್ಲಿ ಗಂಡಭೇರುಂಡ ಚಿತ್ರ ನಿರ್ಮಿಸುವಂತೆ ಅಂಬರೀಶ್ ತಿಳಿಸಿ ತಾವು ಕೂಡ ನಟಿಸಿದ್ದರು. ಆದರೆ ಯಾವುದೇ ಸಂಭಾವನೆ ಪಡೆದಿರಲಿಲ್ಲ. ಈ ಚಿತ್ರದಲ್ಲಿ ಕಡಿಮೆ ಸಂಭಾವನೆಗೆ ನಟಿಸುವಂತೆ ಶಂಕರ್ ನಾಗ್ ಹಾಗೂ ಶ್ರೀನಾಥ ಅವರಿಗೂ ಮನವಿ ಮಾಡಿದ್ದರಂತೆ ಮಂಡ್ಯದ ಗಂಡು.ಚಿತ್ರರಂಗದವರಿಷ್ಟೇ ಅಲ್ಲ ಸಾರ್ವಜನಿಕರಿಗೂ ಹಲವು ಸಹಾಯ ಮಾಡಿದ್ದಾರೆ. ಮಂಡ್ಯ ಜಿಲ್ಲೆಗೆ ಭೇಟಿ ನೀಡಿದಾಗ ಅವರ ಮನೆಗೆ ಸಹಾಯ ಕೇಳಲೆಂದೇ ನೂರಾರು ಜನ ಬರುತ್ತಿದ್ದರು. ಒಮ್ಮೆ ರಾಮನಗರದಲ್ಲಿ ಚುನಾವಣೆಗೆ ಸ್ಪರ್ಧಿಸುವ ವೇಳೆ ಕಾರ್ಖಾನೆಯೊಂದರಲ್ಲಿ ಘರ್ಷಣೆ ನಡೆದು ಒಬ್ಬ ವ್ಯಕ್ತಿ ಮೃತಪಟ್ಟಿದ್ದರು. ಇದರಿಂದ ತೀವ್ರ ಮನನೊಂದ ಅಂಬರೀಶ್ ಅವರು ಮೃತ ವ್ಯಕ್ತಿಯ ಮಕ್ಕಳಿಗೆ ವಿದ್ಯಾಭ್ಯಾಸಕ್ಕಾಗಿ ಹಣ ನೀಡುತ್ತಿದ್ದರು.

ಬೆಂಗಳೂರಿನ ಕಪಾಲಿ ಚಿತ್ರಮಂದಿರದ ಬಳಿಯ ಗಂಗಾರಾಮ್ ಕಟ್ಟಡ ಕುಸಿದು ಬಿದ್ದ ಸಂದರ್ಭದಲ್ಲಿ ಹಲವು ಮಂದಿ ಅಸುನೀಗಿದ್ದರು. ಆ ಸಂದರ್ಭದಲ್ಲಿ ಕುಟುಂಬಸ್ಥರಿಗೆ ಸಾಂತ್ವನ ಹೇಳಿ ಅಲ್ಲಿನ ಜನರಿಗೆ ಊಟ ಉಪಚಾರ ಸೇರಿದಂತೆ ತಮ್ಮ ಕೈಲಾದ ಸಹಾಯ ಮಾಡಿದ್ದರು.

ಸಹಾಯ ಕೇಳಿ ಬಂದವರಿಗೆ ಸಹಾಯ ಹಸ್ತ ನೀಡುತ್ತಿದ್ದ ಅಂಬರೀಶ್ ಅವರ ಈ ಗುಣದಿಂದಾಗಿ ಅವರನ್ನು ಕನ್ನಡ ಚಿತ್ರರಂಗದ ದಾನ ಶೂರ ಕರ್ಣ ಎಂದೇ ಕರೆಯುತ್ತಿದ್ದರು.