ಸ್ಯಾಂಡಲ್‍ವುಡ್‍ನಲ್ಲಿ ಪುಣ್ಯಾತ್‍ಗಿತ್ತೀರು ಎಂಬ ಮಹಿಳಾ ಪ್ರಧಾನ ಚಿತ್ರವು ಬಿಡುಗಡೆ ಹಂತಕ್ಕೆ ಬಂದಿದ್ದು, ರಾಜ್ ಬಿ.ಎನ್. ಅವರು ನಿರ್ದೇಶಿಸಿರುವ ಈ ಚಿತ್ರದ ಫಸ್ಟ್ ಲುಕ್ ಅನಾವರಣ ಮೊನ್ನೆ ನೆರವೇರಿತು. ಹೆಂಗಸರನ್ನು ದೂಷಿಸಲು ಮತ್ತು ತೆಗಳುವುದಕ್ಕೆ ಪುಣ್ಯಾತ್‍ಗಿತ್ತಿಯರು ಎಂಬ ಪದವನ್ನು ಸಂಶೋಧಿಸುತ್ತಾರೆ, ಆದರೆ ನಿರ್ದೇಶಕ ರಾಜ್ ಅವರು ತಮ್ಮ ಚಿತ್ರದ ಟೈಟಲ್ ಕ್ಯಾಚಿಯಾಗಿರಲೆಂದೇ ಈ ಟೈಟಲ್ ಇಟ್ಟಿದ್ದಾರಂತೆ.
ನಿರ್ದೇಶಕ ರಾಜ್ ಮಾತನಾಡಿ, ಡಿಸೆಂಬರ್ ತಿಂಗಳಿನಲ್ಲಿ ಪುಣ್ಯಾತ್‍ಗಿತ್ತೀರನ್ನು ಚಿತ್ರಮಂದಿರಕ್ಕೆ ಕರೆತರುವ ಪ್ಲಾನ್ ಹಾಕಿಕೊಂಡಿದ್ದೇವೆ, ಸಮಾಜದಲ್ಲಿ ಮೋಸ ಹೋದ ಹುಡುಗಿಯರೆಲ್ಲಾ ಒಂದೆಡೆ ಸೇರಿ ಹೋರಾಟ ನಡೆಸುತ್ತಾರೆ, ಯಾಕಾಗಿ ಅವರು ಹೀಗೆ ಮಾಡುತ್ತಾರ ಎನ್ನುವುದನ್ನು ತಿಳಿಯಬೇಕಾದರೆ ಚಿತ್ರವನ್ನು ನೋಡಬೇಕು, ಚಿತ್ರಕ್ಕಾಗಿ ಬಳ್ಳಾರಿ, ಬೆಂಗಳೂರು, ಕನಕಪುರ ಸೇರಿದಂತೆ ವಿವಧೆಡೆಗಳಲ್ಲಿ ಸುಮಾರು 30 ದಿನಗಳ ಕಾಲ ಈ ಚಿತ್ರದ ಚಿತ್ರೀಕರಣ ನಡೆಸಿದ್ದೇವೆ ಎಂದರು.
ನಿರ್ಮಾಪಕ ಸತ್ಯನಾರಾಯಣ ಮನ್ನೆ ಮಾತನಾಡಿ, ಒಂದು ಉತ್ತಮ ಚಿತ್ರವನ್ನು ನಿರ್ಮಿಸಬೇಕೆಂಬ ಬಯಕೆ ನ 
ನಗೆ ಮೊದಲಿನಿಂದಲೂ ಇತ್ತು ನಿರ್ದೇಶಕರು ಹೇಳಿದ ಈ ಕಥೆ ತುಂಬಾ ಹಿಡಿಸಿತು ಆದ್ದರಿಂದ ಬಂಡವಾಳ ಹೂಡಿದೆ, ಚಿತ್ರವು ತುಂಬಾ ಚೆನ್ನಾಗಿ ಮೂಡಿ ಬಂದಿದ್ದು ಎಲ್ಲರಿಗೂ ಇಷ್ಟವಾಗಲಿದೆ ಎಂದರು. ನಟಿ ಮಮತಾರಾಹುತ್ ಮಾತನಾಡಿ, ನಾನು ಈ ಚಿತ್ರದಲ್ಲಿ ಸಿನಿಮಾ ಹೀರೋಯಿನ್ ಆಗಿ ಕಾಣಿಸಿಕೊಂಡಿದ್ದೇನೆ, ಸಿನಿಮಾದಲ್ಲಿ ನಟಿಸಲು ಹೋಗಿ ಅವಕಾಶ ಸಿಗದಿದ್ದಾಗ ಏನು ಮಾಡುತ್ತೇನೆ ಎಂಬುದನ್ನು ನಿರ್ದೇಶಕರು ತುಂಬಾ ಚೆನ್ನಾಗಿ ತೋರಿಸಿದ್ದಾರೆ ಎಂದರು.
ನಟಿ ದಿವ್ಯಶ್ರೀ ಮಾತನಾಡಿ ಇದು ನಾನು ಅಭಿನಯಿಸುತ್ತಿರುವ ಮೊದಲ ಚಿತ್ರ, ನನ್ನದು ಒಬ್ಬ ಹೋಮ್ಲಿ ಹುಡುಗಿಯ ಪಾತ್ರವೇ ಆದರೂ ಕೈಲಿ ಲಾಂಗ್ ಹಿಡಿದಿದ್ದೇನೆ, ಅದು ಯಾಕೆ ಎನ್ನುವುದನ್ನು ಸಿನಿಮಾದಲ್ಲಿಯೇ ನೋಡಬೇಕು ಎಂದು ಹೇಳಿದರು. ನಟಿ ಸಂಭ್ರಮ ಮಾತನಾಡಿ ಸುಳ್ಳು ಹೇಳುವುದರಲ್ಲಿ ಎತ್ತಿದ ಕೈ, ಸುಳ್ಳೇ ಈ ಚಿತ್ರದ ತಿರುವಿಗೆ ಕಾರಣ ಎಂದು ತಮ್ಮ ಪಾತ್ರದ ಬಗ್ಗೆ ಹೇಳಿಕೊಂಡರೆ, ನಾನು ನಾನ್ ಸ್ಟಾಪ್ ಮಾತನಾಡುತ್ತೇನೆ. ಅದು ಜನರಿಗೆ ಇಷ್ಟವಾಗಲಿದೆ ಎಂದು ಮತ್ತೊಬ್ಬ ನಟಿ ಐಶ್ವರ್ಯ ಹೇಳಿದರು.
ನೃತ್ಯ ನಿರ್ದೇಶಕ ತ್ರಿಭುವನ್ ಮಾತನಾಡಿ, ಈ ಚಿತ್ರದ ಎಲ್ಲಾ ಹಾಡುಗಳು ತುಂಬಾ ಚೆನ್ನಾಗಿ ಮೂಡಿದ್ದು ಎಲ್ಲಾ ಹಾಡುಗಳಿಗೆ ನಾನೇ ನೃತ್ಯ ನಿರ್ದೇಶನ ಮಾಡಿರುವುದು ಖುಷಿ ತಂದಿದೆ ಎಂದರು. ಇನ್ನು ಈ ಚಿತ್ರಕ್ಕೆ ಶರತ್ ಕುಮಾರ್ ಅವರ ಕ್ಯಾಮರಾ ಕೈಚಳಕವಿದೆ. ಚಿತ್ರದಲ್ಲಿ ಖಳನಟನಾಗಿ ಅಭಿನಯಿಸಿರುವ ಸುಧೀರ್ ಕಾಕ್ರೋಚ್ ಮಾತನಾಡಿ ನನಗೆ ಒಳ್ಳೆಯ ಪಾತ್ರವೇ ಸಿಕ್ಕಿದೆ ಎಂದು ಹೇಳಿದರು.
Be the first to comment