ಸೆಪ್ಟೆಂಬರ್ 22ಕ್ಕೆ 7 ಹೊಸ ಚಿತ್ರಗಳು ರಿಲೀಸ್, ಹೊಸಬರದ್ದೇ ಪಾರುಪತ್ಯ

ಸೆಪ್ಟಂಬರ್ 22ರಂದು ಒಟ್ಟು 7 ಚಿತ್ರಗಳು ಬಿಡುಗಡೆಯಾಗುತ್ತಿದ್ದು, ಬಹುತೇಕ ಹೊಸಬರು ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ.

ದ್ವಂದ್ವ, ಆರಾರಿ ರಾರೋ, ಹನಿಮೂನ್ ಇನ್ ಬ್ಯಾಂಕಾಕ್, ಪರಿಶುದ್ಧಂ, ಬನ್ ಟೀ, ಒಲವೇ ಮಂದಾರ2, ದಿಗ್ವಿಜಯ ಬಿಡುಗಡೆ ಆಗುತ್ತಿರುವ ಚಿತ್ರಗಳು. ತಿಲಕ್ ಹಾಗೂ ಅನಿತಾ ಭಟ್ ನಟಿಸಿರುವ ದ್ವಂದ್ವ ಚಿತ್ರವನ್ನು ಹೊರತುಪಡಿಸಿ ಉಳಿದ ಎಲ್ಲಾ ಚಿತ್ರಗಳು ಹೊಸಬರದ್ದು ಆಗಿದೆ. ಇವರ ಒಟ್ಟು ನಾಲ್ಕು ನಿರ್ದೇಶಕರು ಹಾಗೂ ಹೇಳು ಹೊಸ ನಿರ್ಮಾಪಕರು ಕನ್ನಡ ಚಿತ್ರರಂಗದಲ್ಲಿ ತಮ್ಮ ಅದೃಷ್ಟ ಪರೀಕ್ಷೆಯನ್ನು ಮಾಡುತ್ತಿದ್ದಾರೆ.

ದ್ವಂದ್ವ ಚಿತ್ರ ಫೋಟೋಗ್ರಾಫಿಕ್ ಮೆಮೊರಿ ಎನ್ನುವ ವಿಚಿತ್ರ ಸಮಸ್ಯೆಯ ಕುರಿತು ಕಥೆಯನ್ನು ಹೊಂದಿದೆ. ಈ ಚಿತ್ರವನ್ನು ಪ್ರದೀಪ್ ಕೌದಳ್ಳಿ ನಿರ್ಮಿಸಿದ್ದಾರೆ. ಭರತ್ ಅವರು ಕಥೆ ಚಿತ್ರಕಥೆ ಬರೆದು ನಿರ್ದೇಶಿಸಿದ್ದಾರೆ. ಅನಿತಾ ಭಟ್, ತಿಲಕ್, ಆಸಿಯಾ, ದಿನೇಶ್ ಮಂಗಳೂರು, ಶೋಭರಾಜ್ ಇತರರು ಚಿತ್ರದಲ್ಲಿ ನಟಿಸಿದ್ದಾರೆ.

ದಿಗ್ವಿಜಯ ಚಿತ್ರ ರೈತರು ಎದುರಿಸುತ್ತಿರುವ ಸಮಸ್ಯೆಗಳಿಗೆ ಪರಿಹಾರವನ್ನು ಹುಡುಕುವ ಕಥೆಯನ್ನು ಹೊಂದಿದೆ. ಸಿನಿಮಾವನ್ನು ದುರ್ಗಾ ಪಿ ಎಸ್ ಅವರು ನಿರ್ದೇಶನ ಮಾಡಿದ್ದಾರೆ. ಜಯಪ್ರಭು ಆರ್ ಲಿಂಗಾಯತ್ ಚಿತ್ರ ನಿರ್ಮಿಸಿದ್ದಾರೆ.

ಹೊಸಬರ ಚಿತ್ರವಾದ ಬನ್ ಟೀ ಚಿತ್ರವನ್ನು ಕೇಶವ್ ಅವರು ನಿರ್ಮಿಸಿದ್ದಾರೆ. ಉದಯಕುಮಾರ್ ಚಿತ್ರದ ನಿರ್ದೇಶಕರು. ಚಿತ್ರದಲ್ಲಿ ಶಿಕ್ಷಣ ಕ್ಷೇತ್ರ ಎಷ್ಟು ಕಮರ್ಷಿಯಲ್ ಆಗುತ್ತಿದೆ ಎನ್ನುವ ವಿಚಾರವನ್ನು ಹೇಳುವ ಯತ್ನವನ್ನು ಮಾಡಲಾಗಿದೆ.

ಪ್ರೀತಿ ಮಾಡುವುದು ಕ್ರೈಂ ಅಲ್ಲ ಎನ್ನುವ ಕಥೆಯನ್ನು ಹೊಂದಿರುವ ಒಲವೇ ಮಂದಾರ 2 ಚಿತ್ರವನ್ನು ಎಸ್ ಎಸ್ ಪಾಟೀಲ್ ನಿರ್ದೇಶನ ಮಾಡಿದ್ದಾರೆ. ರಮೇಶ್ ಮರಗೋಳ ಮತ್ತು ಬಿ ಎಂ ಸತೀಶ್ ಅವರು ಚಿತ್ರವನ್ನು ನಿರ್ಮಿಸಿದ್ದಾರೆ. ಸನತ್, ಪ್ರಜ್ಞಾ ಭಟ್, ಭವ್ಯ ಇತರರು ಚಿತ್ರದಲ್ಲಿ ನಟಿಸಿದ್ದಾರೆ.

ಇವರ ಬಿಡುಗಡೆ ಆಗುತ್ತಿರುವ ಹನಿಮೂನ್ ಇನ್ ಬ್ಯಾಂಕಾಕ್ ಚಿತ್ರ ಕಾಮಿಡಿ ಕಥಾವಸ್ತು ಹೊಂದಿದೆ. ಪರಿಶುದ್ಧಂ ಥ್ರಿಲ್ಲರ್ ಕಥಾವಸ್ತು ಹೊಂದಿದೆ.

ಸೆಪ್ಟೆಂಬರ್ 22ರಂದು ಬಿಡುಗಡೆ ಆಗುತ್ತಿರುವ ಇಷ್ಟು ಚಿತ್ರಗಳಲ್ಲಿ ಯಾವ ಚಿತ್ರವನ್ನು ಪ್ರೇಕ್ಷಕರು ಹರಸುತ್ತಾರೆ ಎಂದು ಕಾದು ನೋಡಬೇಕಿದೆ.
____