`ತ್ರಯ’ ಚಿತ್ರದ ಚಿತ್ರೀಕರಣ ಪೂರ್ಣ

2ಸ್ಟೇಟ್ಸ್ ಫಿಲಂಸ್ ಲಾಂಛನದಲ್ಲಿ ಕೌಶಲ್ ಮಹಾಜನ್ ಹಾಗೂ ರಾಜ್ ಅವರು ನಿರ್ಮಿಸುತ್ತಿರುವ `ತ್ರಯ` ಚಿತ್ರದ ಚಿತ್ರೀಕರಣ ಮುಕ್ತಾಯವಾಗಿದೆ. ಮಾತಿನ ಜೋಡಣೆ ಕೂಡ ಮುಕ್ತಾಯವಾಗಿರುವ ಈ ಚಿತ್ರಕ್ಕೆ ಚಿತ್ರೀಕರಣ ನಂತರದ ಚಟುವಟಿಕೆಗಳು ಬಿರುಸಿನಿಂದ ಸಾಗಿದೆ. ಚಿತ್ರಕ್ಕೆ ಬೆಂಗಳೂರು ಸುತ್ತಮುತ್ತ 30ದಿನಗಳ ಚಿತ್ರೀಕರನ ನಡೆದಿದೆ. ಏಪ್ರಿಲ್‍ನಲ್ಲಿ `ಒಂದು ಕಥೆ ಹೇಳ್ಲಾ` ಎಂಬ ಶೀರ್ಷಿಕೆಯೊಂದಿಗೆ ಆರಂಭವಾಗಿದ್ದ ಈ ಚಿತ್ರ ಈಗ `ತ್ರಯ` ಎಂದು ಶೀರ್ಷಿಕೆ ಬದಲಿಸಿಕೊಂಡಿದೆ.
ಕುತೂಹಲಕಾರಿ ಕಥಾಹಂದರ ಹೊಂದಿರುವ ಈ ಚಿತ್ರಕ್ಕೆ ಕೃಷ್ಣಸಾಯಿ ಅವರು ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ಆರ್.ಕೆ.ಪ್ರತಾಪ್ ಛಾಯಾಗ್ರಹಣ, ಯತೀಶ್ ಮಹದೇವ್ ಸಂಗೀತ ನಿರ್ದೇಶನ, ವೆಂಕಟರಮಣ್ ಸಂಕಲನ ಹಾಗೂ ನಾಗರಾಜ್ ನಾಗಿ ಅವರ ನೃತ್ಯ ನಿರ್ದೇಶನವಿರುವ ಈ ಚಿತ್ರದ ತಾರಾಬಳಗದಲ್ಲಿ ಸಂಯುಕ್ತ ಹೊರನಾಡು, ಕೃಷ್ಣ ಹೆಬ್ಬಾಳೆ, ಟೆನ್ನಿಸ್ ಕೃಷ್ಣ, ಶಂಕರ್ ಶ್ರೀಹರಿ, ಅಮೋಘ, ರಾಹುಲ್, ಮದನ್ ಗೌಡ, ವಿಜಯ್ ಚೆಂಡೂರ್, ನೀತು ಬಾಲ, ನಿಮಿಷ ಪ್ರಕಾಶ್ ಮುಂತಾದವರಿದ್ದಾರೆ.