‘ಭರಣಿ’ ಸಿನಿಮಾಕ್ಕೆ ಚಾಲನೆ ಸಿಕ್ಕಿತು.

ದುನಿಯಾ’ ಚಿತ್ರದ ಮೂಲಕ ನಿರ್ವಪಕ ಟಿ.ಪಿ. ಸಿದ್ದರಾಜು ಚಿತ್ರರಂಗಕ್ಕೆ ಅಡಿಯಿಟ್ಟರು. ಅವರ ಪುತ್ರರಾದ ‘ಲೂಸ್ ಮಾದ’ ಯೋಗಿ, ಮಹೇಶ್ ನಟರಾಗಿ ಸ್ಯಾಂಡಲ್​ವುಡ್​ನಲ್ಲಿ ಕಾಣಿಸಿಕೊಂಡರು. ಇದೀಗ ಆ ಕುಟುಂಬದಿಂದ ಮತ್ತೋರ್ವ ನಟ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ನೀಡುತ್ತಿದ್ದಾರೆ. ಸಿದ್ದರಾಜು ಅವರ ಸೋದರಿ ಮಗನಾಗಿರುವ ಮಾಧವ ‘ಭರಣಿ’ ಸಿನಿಮಾಗೆ ಹೀರೋ. ಈ ಹಿಂದೆ ‘ದುನಿಯಾ’ದಲ್ಲಿ ಸಣ್ಣ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಅವರೀಗ ಪೂರ್ಣಪ್ರಮಾಣದ ಹೀರೋ ಆಗಿದ್ದಾರೆ. ಇತ್ತೀಚೆಗಷ್ಟೇ ನಟ ಯೋಗಿ ಕ್ಯ್ಲಾಪ್ ಮಾಡಿ, ಶುಭ ಕೋರಿದರು. ಎ.ಪಿ. ಅರ್ಜುನ್, ‘ಭರ್ಜರಿ’ ಚೇತನ್​ಕುಮಾರ್ ಮುಂತಾದವರ ಬಳಿ ಸಹಾಯಕರಾಗಿ ಕೆಲಸ ಮಾಡಿದ ಅನುಭವ ಇರುವ ಚನಾನಿರಾಜ ಈ ಚಿತ್ರಕ್ಕೆ ಆಕ್ಷನ್-ಕಟ್ ಹೇಳುತ್ತಿದ್ದಾರೆ. ಅವರ ಹೆಸರಿನಲ್ಲೂ ವಿಭಿನ್ನತೆ ಇದೆ. ಅವರ ಆಪ್ತ ಸ್ನೇಹಿತರ ಹೆಸರಿನ ಮೊದಲ ಅಕ್ಷರಗಳನ್ನೆಲ್ಲ ಜೋಡಿಸಿಕೊಂಡು ಚನಾನಿರಾಜ ಎಂದು ಹೆಸರಿಟ್ಟುಕೊಂಡಿದ್ದಾರೆ ಅವರು. ‘ಭರಣಿ’ ಶೀರ್ಷಿಕೆಯಾದರೂ, ‘ಪಾರ್ವತಮ್ಮನ ಮಗ’ ಎಂಬ ಅಡಿಬರಹವೂ ಈ ಚಿತ್ರಕ್ಕಿದೆ. ಶಿವರಾಜ್​ಕುಮಾರ್ ಕೂಡ ಈ ಸಿನಿಮಾದ ಕಥೆ ಕೇಳಿ ಮೆಚ್ಚುಗೆ ಸೂಚಿಸಿದ್ದಾರಂತೆ. ‘ಇದು ಸಂಪೂರ್ಣ ಹಳ್ಳಿಯಲ್ಲಿ ನಡೆಯುವ ಕಥೆ. ತಾಯಿ ಸೆಂಟಿಮೆಂಟ್ ಕೂಡ ಈ ಸಿನಿಮಾದಲ್ಲಿ ಯಥೇಚ್ಛವಾಗಿದೆ. ನಾಯಕನ ತಾಯಿ ಪಾತ್ರವನ್ನು ತಾರಾ ನಿಭಾಯಿಸುತ್ತಿದ್ದಾರೆ. ಚಿತ್ರಕ್ಕಾಗಿ ಮಾಧವ ಕಳೆದ 8 ಎಂಟು ತಿಂಗಳಿನಿಂದ ಕಸರತ್ತು ಮಾಡಿದ್ದಾರೆ. ಅವರಿಗೆ ನಾಯಕಿಯಾಗಿ ‘ವೆನಿಲ್ಲಾ’ ಖ್ಯಾತಿಯ ಸ್ವಾತಿ ಕೊಂಡೆ ನಟಿಸುತ್ತಿದ್ದಾರೆ’ ಎಂದು ಮಾಹಿತಿ ನೀಡುತ್ತಾರೆ ಚನಾನಿರಾಜ.