ಬಂಗಾರಪ್ಪನ ಗುಡ್ಡದಲ್ಲಿ ಕುಣಿದ ಝಾನ್ಸಿ!

ಬೆಂಗಳೂರು ಹೊಸಕೆರೆಹಳ್ಳಿಯ ಬಂಗಾರಪ್ಪ ಗುಡ್ಡದಲ್ಲಿ ಗಣೇಶನ ಮುಂದೆ ಜನರು ಡ್ಯಾನ್ಸ್ ಮಾಡುತ್ತಿದ್ದರು. ಮುಂದಿನವಾರ ಹಬ್ಬ ಇರುತ್ತದೆ ಎಂದು ನೀವುಗಳು ಯೋಚಿಸುವ ಮುನ್ನ ತಮಗೆ ವಿಷಯ ತಿಳಿಸಲಾಗುತ್ತಿದೆ. ಆಕ್ಷನ್ ಪ್ರಧಾನ ‘ಝಾನ್ಸಿ’ ಚಿತ್ರದಲ್ಲಿ ಬರುವ ಗೀತೆಗೆ ಗಣೇಶನ ಹಾಡು ಅವಶ್ಯಕವಾಗಿದ್ದರಿಂದ ಆ ಭಾಗದಲ್ಲಿ ಚಿತ್ರೀಕರಣ ನಡೆಯುತ್ತಿತ್ತು. ಪತ್ರಕರ್ತರು ಸ್ಥಳಕ್ಕೆ ಹೋದಾಗ ಕೆ.ಕಲ್ಯಾಣ್ ಸಾಹಿತ್ಯದ ‘ಕೇಳಿದ್ದು ಕೊಡುವ ದಮ್ಮಿರೋ ದೇವ್ರೆ ನೀನೊಬ್ಬನೇ ಗಣಪ’ ಎನ್ನುವ ಹಾಡಿಗೆ ಲಕ್ಷೀರೈ ಗುಂಪಿನೊಂದಿಗೆ ಹೆಜ್ಜೆ ಹಾಕುತ್ತಿದ್ದರು. ಬಿಸಿಲು, ಧೂಳು ಹೆಚ್ಚಾಗಿದ್ದರಿಂದ ಹೆಚ್ಚಿಗೆ ಮಾಡಿಸಬೇಡವೆಂದು ನಟಿ ಕೋರಿಕೊಳ್ಳುತ್ತಿದ್ದರು. 5-6 ಟೇಕ್ ನಂತರ ನೃತ್ಯ ನಿರ್ದೇಶಕ ಧನ್‍ಕುಮಾರ್ ಓಕೆ ಎಂದಾಗ ಅಲ್ಲಿದ್ದವರು ನೆರಳಿನತ್ತ್ತ ಧಾವಿಸಿದರು.
ನಂತರ ತಂಡವು ಮಾದ್ಯಮದ ಮುಂದೆ ಹಾಜರಾಗಿ ಅನುಭವಗಳನ್ನು ಹಂಚಿಕೊಂಡಿತು. ನಿರ್ದೇಶಕ ಗುರುಪ್ರಸಾದ್ ಮಾತನಾಡಿ ಅಧಿಕಾರದ ಶಿಪಾರಸ್ಸು ಇರುವರೊಬ್ಬರು ಇಲ್ಲಿರುವ ಜಾಗವನ್ನು ಕಬಳಿಸಲು ಪ್ರಯತ್ನ ಮಾಡುತ್ತಾರೆ. ಸ್ಲಂ ಜನರು ಇದಕ್ಕೆ ವಿರೋಧ ವ್ಯಕ್ತಪಡಿಸುತ್ತಾರೆ. ಬಾಂಬ್ ಇಟ್ಟರೆ ಖಾಲಿ ಮಾಡುವರೆಂದು ಒಂದು ಸ್ಥಳದಲ್ಲಿ ಇಡುತ್ತಾರೆ. ಅಲ್ಲೆ ಹುಟ್ಟಿ ಬೆಳದ ಝಾನ್ಸಿ ಯೋಜನೆಯನ್ನು ದ್ವಂಸ ಮಾಡುತ್ತಾಳೆ. ಮುಂದೆ ಖುಷಿಯಿಂದ ಗಣೇಶನ ಹಾಡು ಬರುವುದರೊಂದಿಗೆ ನಾಯಕಿಯ ಪರಿಚಯವಾಗುತ್ತದೆ. ಹಾಡಿಗೆ ಪುನೀತ್‍ರಾಜ್‍ಕುಮಾರ್ ಧ್ವನಿಯಾಗಲಿದ್ದಾರೆ. ಪಕ್ಕಾ ಆಕ್ಷನ್ ಚಿತ್ರವಾಗಿದ್ದು, ಕತೆಯಲ್ಲಿ ಡ್ರಗ್ಸ್ ಮಾಫಿಯಾ, ಆಕೆಯ ಜೀವನದಲ್ಲಿ ನಡೆದ ಘಟನೆಗೆ ಸೇಡು ತೀರಿಸಿಕೊಳ್ಳುವುದು, ನಾಡು-ಮನೆಗಳನ್ನು ಉಳಿಸಲು ಏನೇನು ಮಾಡುತ್ತಾರೆ ಎಂಬುದನ್ನು ಹೇಳಲಾಗುವುದು.

ಯಾರು, ಏತಕ್ಕೆ ಇಲ್ಲಿಗೆ ಬಂದರು, ಯಾವ ಉದ್ದೇಶಕ್ಕಾಗಿ ಹೋರಾಟ ಮಾಡುತ್ತಾರೆ ಎಂಬುದು ಕ್ಲೈಮಾಕ್ಸ್‍ನಲ್ಲಿ ತಿಳಿಯಲಿದೆ. ರವಿಕಾಳೆ ಮೂರು ದಿವಸ ಭಾಗವಹಿಸಿದ್ದಾರೆ. ಬಾಲಿವುಡ್ ನಟ ಮುಖೇಶ್‍ರಿಷಿ ಮುಂದಿನ ದಿನಗಳಲ್ಲಿ ತಂಡಕ್ಕೆ ಬರಲಿದ್ದಾರೆ. ನಾಲ್ಕು ಅದ್ದೂರಿ ಫೈಟ್ ಮತ್ತು ಒಂದು ಭರ್ಜರಿ ಚೇಸಿಂಗ್ ಇರಲಿದೆ. ಇದಕ್ಕಾಗಿ ಮೇಡಂ ಮಾರ್ಷಲ್ ಆಟ್ರ್ಸ್ ತರಭೇತಿಯನ್ನು ಪಡೆಯುತ್ತಿದ್ದಾರೆಂದು ಹೊಗಳಿಕೆ ಮಾತನ್ನು ಮೀಸಲಿಟ್ಟರು.
ಇಷ್ಟದ ದೇವರು ಗಣೇಶ. ಈ ಹಾಡಿಗೆ ಡ್ಯಾನ್ಸ್ ಮಾಡುತ್ತಿರುವುದು ನನಗೆ ಸಿಕ್ಕ ಅದೃಷ್ಟ. ಪ್ರಸಕ್ತ ನಾಯಕಿ ಪ್ರಧಾನ ಚಿತ್ರಗಳು ಬರುತ್ತಿರುವುದು ಖುಷಿ ತಂದಿದೆ. ಪಾತ್ರವು ಬೇರೆ ರೀತಿ,ರೂಪದಲ್ಲಿ ರೌಡಿ, ಕಾಪ್ ಅಂತ ಎಲ್ಲವು ಕೊನೆಯಲ್ಲಿ ತಿಳಿಯುತ್ತದೆ. ರಿಯಲ್ ಆಗಿ ಯಾರಿಗೂ ಹೆದರದ ನಾನು ನೇರಸ್ವಭಾವದವಳು. ಇದನ್ನು ರೀಲ್‍ನಲ್ಲಿ ಮಾಡುತ್ತಿದ್ದೇನೆ. ಚಿತ್ರರಂಗದ ಹಿನ್ನಲೆಯಿಂದ ಬಂದವಳಲ್ಲ. ಆದರೂ 12 ವರ್ಷದಲ್ಲಿ ಯಶಸ್ಸು, ಸೋಲು, ಕಷ್ಟಗಳು ಎಲ್ಲವನ್ನು ಎದುರಿಸಲಾಗಿದೆ. ಬಾಲಿವುಡ್ ಸಿನಿಮಾಗೋಸ್ಕರ ಎರಡು ವರ್ಷ ಸೌತ್ ಇಂಡಿಯಾಗೆ ಬಂದಿರಲಿಲ್ಲ. ಹೀರೋಯಿನ್ ಕತೆ ಇರುವ ಚಿತ್ರದ ಮಾರ್ಕೆಟ್ ತೆರೆದುಕೊಂಡಿರುವುದರಿಂದ ಮುಂದೆ ಇಂತಹುದೆ ಸಿನಿಮಾಗಳು ಬರಬಹುದು. ಕುರುಕ್ಷೇತ್ರ, ಕೆಜಿಎಫ್ ಚಿತ್ರದಿಂದ ಕರೆ ಬಂದಿತ್ತು. ಹೆಚ್ಚು ದಿನಗಳನ್ನು ಕೇಳಿದ್ದರಿಂದ ಒಲ್ಲೆ ಎನ್ನಲಾಯಿತು. ಒಟ್ಟು 30 ದಿನಗಳನ್ನು ನೀಡಲಾಗಿದೆ. ಇದು ಮುಂದುವರೆಯಬಹುದೆಂದು ನಿರ್ಮಾಪಕರನ್ನು ನೋಡುತ್ತಾ ಲಕ್ಷೀರೈ ಮಾತಿಗೆ ವಿರಾಮ ಹಾಕಿದರು. ನಿರ್ಮಾಪಕ ರಾಜೇಶ್‍ಕುಮಾರ್ ಮೌನಕ್ಕೆ ಶರಣಾಗಿದ್ದರು.