ಪೃಥ್ವಿ ಅಂಬಾರ್ (Pruthvi Ambaar) ಮತ್ತು ‘ಬಿಗ್ ಬಾಸ್‌’ ಖ್ಯಾತಿಯ ಪ್ರಿಯಾಂಕಾ ತಿಮ್ಮೇಶ್ (Priyanka Thimmesh) ನಟನೆಯ ‘ಶುಗರ್ಲೆಸ್’ (Sugarless Movie) ಸಿನಿಮಾವು ರಿಲೀಸ್‌ಗೆ ಸಜ್ಜಾಗಿದೆ. ಜುಲೈ 8ರಂದು ಅದ್ದೂರಿಯಾಗಿ ಸಿನಿಮಾವನ್ನು ತೆರೆಕಾಣಿಸಲು ಚಿತ್ರತಂಡ ಪ್ಲ್ಯಾನ್ ಮಾಡಿಕೊಂಡಿದೆ. ಈ ಹಿಂದೆ ‘ಡಾಟರ್ ಆಫ್ ಪಾರ್ವತಮ್ಮ’ ಸಿನಿಮಾವನ್ನು ನಿರ್ಮಾಣ ಮಾಡಿದ್ದ ಕೆ.ಎಂ. ಶಶಿಧರ್ ‘ಶುಗರ್ಲೆಸ್’ ಸಿನಿಮಾವನ್ನು ನಿರ್ಮಿಸಿರುವುದು ಮಾತ್ರವಲ್ಲದೆ, ಮೊದಲ ಬಾರಿಗೆ ನಿರ್ದೇಶನವನ್ನೂ ಮಾಡಿದ್ದಾರೆ. ಇದೀಗ ಸಿನಿಮಾ ತೆರೆಗೆ ಬರಲು ದಿನಗಣನೆ ಆರಂಭವಾಗಿರುವ ಹೊತ್ತಿನಲ್ಲಿ, ಚಿತ್ರತಂಡಕ್ಕೆ ಒಂದು ಸ್ವೀಟ್ ನ್ಯೂಸ್ ಸಿಕ್ಕಿದೆ. ಅದೇನೆಂದರೆ, ‘ಶುಗರ್ಲೆಸ್’ ತೆರೆಕಾಣುವುದಕ್ಕೂ ಮುನ್ನವೇ ಅದರ ರಿಮೇಕ್ ಹಕ್ಕುಗಳು ಮಾರಾಟವಾಗಿವೆ.
‘ಶುಗರ್ಲೆಸ್’ ಸಿನಿಮಾದ ಹಿಂದಿ ರಿಮೇಕ್ ಹಕ್ಕುಗಳನ್ನು ಹೆಸರಾಂತ ಸಂಸ್ಥೆಯಾದ ಬ್ಲ್ಯಾಕ್ ಪ್ಯಾಂತರ್ ಮೂವೀಸ್ ಲಿಮಿಟೆಡ್‌ನ ಶಿವ ಆರ್ಯನ್ ಅವರು ಖರೀದಿ ಮಾಡಿದ್ದಾರೆ. ‘ಶುಗರ್ಲೆಸ್’ ಚಿತ್ರದ ಕಂಟೆಂಟ್, ಮೇಕಿಂಗ್ ಹಾಗೂ ನಿರೂಪಣೆ ಅವರಿಗೆ ತುಂಬ ಇಷ್ಟವಾಗಿದ್ದರಿಂದ, ಉತ್ತಮ ಬೆಲೆ ನೀಡಿ ರಿಮೇಕ್ ಹಕ್ಕುಗಳನ್ನು ಅವರನ್ನು ಖರೀದಿ ಮಾಡಿದ್ದಾರೆ ಎನ್ನಲಾಗಿದೆ. ಅಂದಹಾಗೆ, ಶಿವ ಆರ್ಯನ್ ಕೂಡ ಪ್ರತಿಭಾವಂತ ಕಲಾವಿದ, ನಿರ್ಮಾಪಕ ಹಾಗೂ ಉದ್ಯಮಿಯಾಗಿದ್ದಾರೆ. ಈ ಸಿನಿಮಾವನ್ನು ಹಿಂದಿಯಲ್ಲಿ ಯಾವಾಗ ಶುರು ಮಾಡಲಿದ್ದಾರೆ? ಯಾರೆಲ್ಲ ನಟಿಸಲಿದ್ದಾರೆ ಎಂಬ ಬಗ್ಗೆ ಇನ್ನಷ್ಟೇ ಮಾಹಿತಿ ಸಿಗಬೇಕಿದೆ.
‘ಶುಗರ್ಲೆಸ್’ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡಿ, ನಿರ್ಮಾಣವನ್ನೂ ಮಾಡಿದ್ದಾರೆ ಶಶಿಧರ್. ಅವರ ಜೊತೆ ಸಹಾಯಕ ನಿರ್ಮಾಪಕರಾಗಿ ಪ್ರಜ್ವಲ್ ಎಂ. ರಾಜ ಹಾಗೂ ವಿಜಯಲಕ್ಷ್ಮಿ ಕೃಷ್ಣೇಗೌಡ ಸಾಥ್ ನೀಡಿದ್ದಾರೆ. ಅಲ್ಲದೇ, ಈ ಚಿತ್ರದ ಕಾರ್ಯಕಾರಿ ನಿರ್ಮಾಪಕರಾಗಿ ರಘು ಸಿಂಗಂ ಹಾಗೂ ದಿವ್ಯಾ ಶಶಿಧರ್ ಕಾರ್ಯನಿರ್ವಹಿಸಿದ್ದಾರೆ. ದಿಶಾ ಎಂಟರ್‌ಟೈನ್‌ಮೆಂಟ್ ಹಾಗೂ ಜಾಜಿ ಪ್ರೊಡಕ್ಷನ್ಸ್ ಸಹಕಾರದೊಂದಿಗೆ ನಿರ್ಮಾಣವಾಗಿರುವ ‘ಶುಗರ್ಲೆಸ್’ ಸಿನಿಮಾಕ್ಕೆ ಛಾಯಾಗ್ರಾಹಕರಾಗಿ ಲವಿತ್ ಕೆಲಸ ಮಾಡಿದ್ದಾರೆ.
ಚಿತ್ರದ ಹಾಡುಗಳಿಗೆ ಅನೂಪ್ ಸೀಳಿನ್ ಸಂಗೀತ ಸಂಯೋಜನೆ ಮಾಡಿದ್ದು, ಡಾ. ವಿ. ನಾಗೇಂದ್ರ ಪ್ರಸಾದ್ ಅವರ ಸಾಹಿತ್ಯ, ಗುರು ಕಶ್ಯಪ್ ಅವರ ಸಂಭಾಷಣೆ ಈ ಚಿತ್ರಕ್ಕಿದೆ. ಈ ಚಿತ್ರಕ್ಕೆ ಸಂಕಲನವನ್ನು ರವಿಚಂದ್ರನ್ ಮಾಡಿದ್ದು, ನೃತ್ಯ ಸಂಯೋಜನೆ ಮುರಳಿ ನಿಭಾಯಿಸಿದ್ದಾರೆ.
‘ಸಕ್ಕರೆ ಖಾಯಿಲೆ ಹಿನ್ನೆಲೆಯಲ್ಲಿ ನಡೆಯುವ ತುಂಬಾ ಹ್ಯೂಮರಸ್ ಆದ ನಿರೂಪಣೆ ಇರುವಂಥ ಚಿತ್ರ ಇದಾಗಿದ್ದು, ಕಥೆಯಲ್ಲಿ ಹಾಸ್ಯವೇ ಪ್ರಧಾನವಾಗಿರುತ್ತದೆ’ ಎಂದು ಶಶಿಧರ್ ಮಾಹಿತಿ ನೀಡುತ್ತಾರೆ. ಇನ್ನು, ನಾಯಕಿಯಾಗಿ ಪ್ರಿಯಾಂಕಾ ತಿಮ್ಮೇಶ್ ಕಾಣಿಸಿಕೊಂಡಿದ್ದು, ‘ಕಥೆ ಕೇಳುವಾಗಲೇ ನನಗೆ ಸಿಕ್ಕಾಪಟ್ಟೆ ನಗುಬಂತು. ಒಂದು ಕಾಯಿಲೆಯನ್ನು ಇಟ್ಟುಕೊಂಡು ಇಷ್ಟೊಂದು ಸುಂದರವಾಗಿ ಎಂಟರ್‌ಟೈನಿಂಗ್ ಆಗಿ ಕಥೆ ಮಾಡಬಹುದಾ ಎನಿಸಿತು. ತುಂಬ ಸ್ವೀಟ್ ಆದ ಸ್ಕ್ರಿಪ್ಟ್ ಇದು’ ಎನ್ನುತ್ತಾರೆ. ‘ರಾಮಾ ರಾಮಾ ರೇ’, ‘ರಾಬರ್ಟ್’, ‘ಇನ್ಸ್‌ಪೆಕ್ಟರ್ ವಿಕ್ರಂ’ ಸೇರಿದಂತೆ ಸಾಕಷ್ಟು ಸಿನಿಮಾಗಳಲ್ಲಿ ಬಣ್ಣ ಹಚ್ಚಿರುವ ಧರ್ಮಣ್ಣ ಕಡೂರು ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರ ಮಾಡಿದ್ದಾರೆ.
Be the first to comment