ಹಲವು ದಾಖಲೆಯ ವೀರ ಚಿರಂಜೀವಿಗೆ ಇಂದು 66

ಮೆಗಾಸ್ಟಾರ್ ಚಿರಂಜೀವಿ ಇಂದು 66ನೇ ಜನ್ಮದಿನವನ್ನು ಆಚರಿಸಿಕೊಳ್ಳುತ್ತಿದ್ದು ಅವರ ಸಾಧನೆ ಭಾರತೀಯ ಚಿತ್ರರಂಗದಲ್ಲಿ ಹಲವು ದಾಖಲೆಗಳನ್ನು ನಿರ್ಮಿಸಿದೆ.

ಟಾಲಿವುಡ್​ನ ಅತ್ಯಂತ ಜನಪ್ರಿಯ ನಾಯಕ ನಟ ಆಗಿರುವ ಅವರು ಈಗಲೂ ಚಿತ್ರರಂಗದಲ್ಲಿ ಸಕ್ರಿಯ ಆಗಿದ್ದಾರೆ. ಕೇಂದ್ರ ಸಚಿವರಾಗಿ ಕಾರ್ಯನಿರ್ವಹಿಸಿದ್ದ ಚಿರಂಜೀವಿ ಅವರು ಜನಪ್ರಿಯ ವ್ಯಕ್ತಿಯಾಗಿಯೂ ಗುರುತಿಸಿಕೊಂಡಿದ್ದಾರೆ.

1 ಕೋಟಿ ರೂ.ಗಳಿಗೂ ಅಧಿಕ ಸಂಭಾವನೆ ಪಡೆದ ಮೊದಲ ತೆಲುಗು ನಟ ಎನ್ನುವ ಖ್ಯಾತಿ ಚಿರಂಜೀವಿ ಅವರದ್ದಾಗಿತ್ತು. 1992ರಲ್ಲಿ ತೆರೆಕಂಡ ‘ಆಪತ್ಬಾಂಧವುಡು’ ಚಿತ್ರಕ್ಕೆ ಚಿರಂಜೀವಿ 1.25 ಕೋಟಿ ರೂ. ಸಂಭಾವನೆ ಪಡೆದಿದ್ದರು. ಆ ಸಮಯದಲ್ಲಿ ಚಿರಂಜೀವಿಯಷ್ಟು ಸಂಭಾವನೆಯನ್ನು ಅಮಿತಾಭ್ ಬಚ್ಚನ್ ಕೂಡಾ ಪಡೆದಿರಲಿಲ್ಲ.

‘ದಿ ರಿಟರ್ನ್ ಆಫ್ ದಿ ಥೀಫ್ ಆಫ್ ಬಾಗ್ದಾದ್’ ಎಂಬ ಹಾಲಿವುಡ್ ಚಿತ್ರದಲ್ಲಿ 1999ರಲ್ಲಿ ಚಿರಂಜೀವಿ ‘ಅಬು’ ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆದರೆ ಈ ಚಿತ್ರ ಕಾರಣಾಂತರದಿಂದ ಪೂರ್ಣ ಆಗಲಿಲ್ಲ.

ಅತ್ಯಂತ ಪ್ರತಿಷ್ಠಿತ ಪ್ರಶಸ್ತಿಯಾದ ಆಸ್ಕರ್ ಪ್ರಶಸ್ತಿ ಸಮಾರಂಭಕ್ಕೆ ಆಹ್ವಾನಿತರಾದ ದಕ್ಷಿಣ ಭಾರತದ ಮೊದಲ ನಟ ಚಿರಂಜೀವಿ ಆಗಿದ್ದರು. ಅವರು 1987ರ ಅಕಾಡೆಮಿ ಅವಾರ್ಡ್ಸ್​ಗೆ ಆಹ್ವಾನಿತರಾಗಿ ಆ ಕಾರ್ಯಕ್ರಮದಲ್ಲೂ ಭಾಗವಹಿಸಿದ್ದರು.

ಇಂಗ್ಲೀಷ್​ಗೆ ಡಬ್​ ಆದ ಮೊದಲ ದಕ್ಷಿಣ ಭಾರತೀಯ ಚಿತ್ರ ಚಿರಂಜೀವಿಯವರದ್ದು ಆಗಿದೆ.1990ರಲ್ಲಿ ತೆರೆಕಂಡ ‘ಕೊಡಮ ಸಿಂಹಮ್’ ಚಿತ್ರ ಇಂಗ್ಲೀಷ್​ಗೆ ಡಬ್ ಆಗಿತ್ತು.
1992ರಲ್ಲಿ ಬಿಡುಗಡೆಯಾದ ಚಿರಂಜೀವಿ ನಟನೆಯ ‘ಘರನ ಮೊಗುಡು’ ಚಿತ್ರವು ಬಾಕ್ಸಾಫೀಸ್​ನಲ್ಲಿ 10 ಕೋಟಿ ರೂ. ಗಳಿಸಿದ ಮೊದಲ ಚಿತ್ರವೆಂಬ ದಾಖಲೆಗೆ ಭಾಜನವಾಯಿತು.

1999- 2000ದ ಆರ್ಥಿಕ ವರ್ಷದಲ್ಲಿ ಚಿರಂಜೀವಿ ಅತೀ ಹೆಚ್ಚು ತೆರಿಗೆ ಪಾವತಿಸಿದ ವ್ಯಕ್ತಿಯಾಗಿದ್ದರು. ಈ ಕಾರಣದಿಂದ 2002ರಲ್ಲಿ ಚಿರಂಜೀವಿಯವರಿಗೆ ಕೇಂದ್ರ ಸರ್ಕಾರದ ವತಿಯಿಂದ ‘ಸನ್ಮಾನ್ ಅವಾರ್ಡ್’ ನೀಡಿ ಗೌರವಿಸಲಾಯಿತು.
__________