ಡ್ರೀಮ್ ಗರ್ಲ್ ಅಮೃತಾ ಗೌಡ

“ಈಕೆ ಸಕಲೇಶಪುರದ ಕುವರಿ ಅಮೃತಾ ಗೌಡ ಬಟ್ಟಲು ಕಂಗಳು, ಸಂಪಿಗೆ ಮೂಗಿನ ಚೆಲುವೆ, ಕಣ್ಣೆದುರು ನಿಂತರೆ ಹುಣ್ಣಿಮೆಯೇ ಹೆಣ್ಣಾಗಿ ಮೈತಳೆದಂತೆ ಭಾಸವಾಗುತ್ತದೆ. ಜೊತೆಗೆ ಬುದ್ಧಿವಂತಿಕೆ ಮತ್ತು ಆತ್ಮವಿಶ್ವಾಸ ಈಕೆಯಲ್ಲಿ ಹದವಾಗಿ ಮೇಳೈಸಿದೆ. ಈಗಾಗಲೇ “ಕಾದಲ್” ಚಿತ್ರದಲ್ಲಿ ಬಣ್ಣ ಹಚ್ಚಿರುವ ಈ ನಟಿ, ನಾಟ್ಯ ಪ್ರವೀಣೆ. ಸ್ನೇಹಿತರಿಂದ ಜಿಂಕೆಮರಿ ಎಂದು ಕರೆಸಿಕೊಳ್ಳುವ, ಈ ಬೆಡಗಿ ತಂದೆ ತಾಯಿಯ ಮುದ್ದಿನ ಮಗಳು. ಮೂಲತಃ ಸಕಲೇಶಪುರದವರಾದ ಅಮೃತಾ ಗೌಡ ಓದಿ ಬೆಳೆದಿರುವುದು ಬೆಂಗಳೂರಿನಲ್ಲೇ. ತಂದೆ ತಾಯಿಯ ಮುದ್ದಿನ ಮಗಳಾದ ಇವರು ನ್ಯೂ ಹಾರಿಜೋನ್ ಕಾಲೇಜಿನ ಬಿ ಕಾಂ ಪದವೀಧರೆ. ದಕ್ಷಿಣ ಭಾರತದಲ್ಲೆಲ್ಲಾ ಕಾರ್ಯಕ್ರಮ ನೀಡುತ್ತಿರುವ “ಇನೋರ್‍ಶಿಯಾ” ತಂಡದಲ್ಲಿ ಡ್ಯಾನ್ಸರ್ ಆಗಿ ಕಲಾ ಪಯಣವನ್ನು ಪ್ರಾರಂಭಿಸಿದವರು. ಚಿಕ್ಕವಯಸ್ಸಿನಿಂದಲೇ ಡ್ಯಾನ್ಸ್ ಮೇಲೆ ಅಗಾಧ ಆಸಕ್ತಿ ಹೊಂದಿರುವ ಇವರು ಭರತನಾಟ್ಯಂ ಕಲಾವಿದೆ ಕೂಡ. ಜಾಹೀರಾತುಗಳಲ್ಲೂ ಕಾಣಿಸಿಕೊಂಡಿರುವ ಅಮೃತಾ “ವಿಟಮಿನ್ ಡಿ” ಟ್ರೂಪ್ ನಲ್ಲೂ ಫ್ರೀಸ್ಟೈಲ್, ಸಾಲ್ಸಾ , ಡ್ಯಾನ್ಸ್ ಕಾರ್ಯಕ್ರಮಗಳನ್ನು ನೀಡುತ್ತಾರೆ.
ವಿದ್ಯಾಭ್ಯಾಸದ ನಂತರ ಎಮ್.ಎನ್.ಸಿ ಕಂಪೆನಿ ಒಂದರಲ್ಲಿ ಕೆಲಸಕ್ಕೆ ಸೇರಿಕೊಳ್ಳುವ ಅಮೃತಾ, ದಿನಾಲೂ ಡ್ರಾಮಾ, ನಾಟ್ಯ, ಸ್ನೇಹಿತರು ಹಾಗೂ ಕಾರ್ಯಕ್ರಮಗಳಲ್ಲಿ ಸದಾ ನಿರತರಾಗಿದ್ದವರು. ನಾಲ್ಕು ಗೋಡೆಗಳ ಮಧ್ಯೆ ಕಛೇರಿಯ ಕೆಲಸ ಮನೆಗೆ ಬರುವುದು ಮತ್ತೆ ಕೆಲಸ ಈ ತರಹದ ದಿನಚರಿಯಿಂದ ಲವಲವಿಕೆಯಿಂದಿದ್ದ ಅಮೃತಾ ಗೌಡ ಬೇಜಾರಾಗಿಬಿಡುತ್ತಾರೆ. ಕೆಲಸನೇ ಜೀವನನಾ? ಕಲೆಯಲ್ಲಿ ಅಥವಾ ಚಿತ್ರರಂಗದಲ್ಲಿ ಏನಾದರೂ ಸಾಧಿಸಬೇಕೆಂದು ಕೆಲಸಕ್ಕೆ ರಾಜೀನಾಮೆ ಕೊಟ್ಟು, ತಮ್ಮ ತಾಯಿಯ ಆಸೆಯಂತೆ ಚಿತ್ರ ನಟಿಯಾಗಲು ತಯಾರಾಗಿಯೇ ಬಂದಿದ್ದಾರೆ. ಡ್ರೀಮ್ ಗರ್ಲ್ ಮತ್ತು ಗೂಗಲ್ ನಲ್ಲಿ ನಾಯಕಿಯಾಗಿ ಮಿಂಚಿದ್ದ ಅಮೃತ ರಾವ್ ಮುಂದಿನ ದಿನಗಳಲ್ಲಿ ಮತ್ತಷ್ಟು ಚಿತ್ರಗಳ ಮೂಲಕ ಕನ್ನಡಿಗರನ್ನು ಅಮೃತಾ ಗೌಡ ರಂಜಿಸಲಿ.